¹ Yahwa wonusu le Musa fi Arabat Moab safa ta Ordon fi Ariha wa kelimu, ² ''Wori le shab ta Israel kede wodi baad min nisba ta warisa tomon le Lawin. Umon lazim kede wodi le umon mudun ashan bi geni fogo wa mahalat al mawash bi akulu fogo min hauili mudun de. ³ Lawin bi geni fi mudun de. wa bagarat wa ganamayat ma kulu haiwanat tomon bi akulu min fadaya al taraf mudun. ⁴ Fadayat al bi wodi le umon taraf mudun de lazim kede kun musafa ta alif metir min Heta ta medina min kulu tijahat. ⁵ Intum lazim kede aburu alfen mitir min bara medina min safa sherik, wa alfen le safa ta junub, wa alfen mitir le safa gharib, wa alfen metir le safa ta shamal. De yau bi kun fadayat ta mudun tomon. Mudon de bi kun fi nus. ⁶ Sitta min mudun al intum bi wodi le Lawin de lazim kede kun mudun le lajiin. Bi kun ze mahal al zol al katulu zol bi jere fogo. Kaman intum bi zidu fogo itniin wa arbein mudun. ⁷ Mudun al intum bi wodi le lawin bi kun tamaniya wa arbein. intum kede wodi fadayat tomon sawa. ⁸ Ze le mudun al inta bi wodi min mumtalakat ta iyal ta Israel, min gebila al kebir inta bi shilu ketir. Wa min gebila al suker bi wodi mudun besit. Ai gebila be hasab warisa kede wodi mudun tanin tomon le Lawin."' ⁹ Baad dak Yahwa wonusu le Musa wa kelim, ¹⁰ ''Wonusu le shab ta Israel wa kelim le umon, 'Kan intum gata nahar Ordon le ard Canaan, ¹¹ kede intum iktar mudon ta Lajiin le intum, mahal al kan fi zol katulu zol budun gasit bi jere fogo. ¹² Mudun del bi kun malja takum min zol al der integim, ashan zol al amulu jerima de ma bi katulu gubal ma wogif fi mahkama gidam ta mujtama. ¹³ Intum lazim bi iktar sita mudun ze malja. ¹⁴ Intum kede wodi talata mudun fi gata bahar Ordon wa talata fi ard Canaan. Umon bi kun mudun ta malja. ¹⁵ Le shab ta Israel , le ajanib, wa le ai zol al bi geni ma intum, sita mudun de bi kun mahal dusu le ai zol al katulu zol bidun gasit bi jere hinak. ¹⁶ Lakin kan zol al mutaham de durubu zol de be hadid, wa zol de mutu, Baad dak zol mutaham de huwo hagiga bi kun katil. Lazim bi katulu zol de. ¹⁷ Iza kan zol mutaham darab zol be hajer, wa hajer de bi agder katulu zol, wa iza kan zol de mutu, baad dak zol mutaham de bi kun katil. Lazim bi katulu huwo. ¹⁸ Kan zol mutaham dugu zol be kasab al bi katulu, wa zol de mutu, zol de bi kun katil. Lazim bi katulu huwo. ¹⁹ Mosuul ta zol al katulu de kede katulu zol al katulu zol tomon de. Kan huwo gabil ma zol de, kede huwo katulu zol de. ²⁰ Kan huwo dugu zol de be zalan au jada haj fi ras zol de lgiu huwo bi kemin le zol de, wa zol de mutu, ²¹ au kan huwo lizu zol de tehet be ida tou be zalan wa zol de mutu. Huwo katil. Mosuul ta zol al katulu de lazim bi katulu zol de kan huwo limu ma zol de. ²² Lakin kan zol al mutaham de lizu zol de faja ligo mafi zalan gubal kida au jada haja al durubu zol de budun gasit ²³ au kan huwo jada hajer al bi katulu budun huwo ma aiynu zol de, ligu zol al ishteki de ma adu ta zol al mutu de; wa huwo kan gasit awugu zol de. De haja al intum bi amulu zol de mutu. ²⁴ Mujtama lazim bi hakimu bein zol al mutaham de wa musuul ta zol al katulu de ze de be hasab ganun del. ²⁵ Mujtama lazim bi angizu zol de min ahal ta zol al katulu de. Mujtama kede rija mutaham fi medina al huwo jere fugu. Huwo lazim bi geni hinak lahadi mutu ta khahin al fi de, al masaw be zet al mukadas. ²⁶ Lakin kan zol al ishteki de tala min hudud ta medina ta al huwo jere fogo de, ²⁷ yala ahal ta zol al huwo katulu de ligo huwo bara min hudud ta medina ta malja, yala huwo katulu zol de, ma bi iddu huwo katil. ²⁸ Ashan kan zol al ishteki de kan fadulu fi medina tou al huwo jere fogo de lahadi kan khahin al kebir de mutu. Baad mutu ta khahin al kebir, zol al ishteki de bi agder rija wara fi beled tou. ²⁹ De kede kun ganun le intum wa le ajial la bi ja fi kulu mahal al intum bi geni fogo. ³⁰ Ai zol al katulu zol lazim bi katulu huwo, kan sabitu be shuhud. Lakin kelima ta shahid wahid ma bi kun kifaya ashan bi katulu zol de. ³¹ Mata rudu diya min zol al katulu wa al indu jerima ta katulu. Lazim bi katulu zol de. ³² Mata shilu gurush ashan zol de bi jere le medina ta malja. Yala zol de bi rija wa geni fi beled tou, lahadi kan khahin al kebir de mutu. ³³ Matakum waskanu ard al intum bi geni fogo, Leanu dom ta zol al katulu bi waskanu wata. Wa mafi kafara bi amulu le wata kan dom kubu fogo, ile be dom ta zol al dofugu dom de. ''. ³⁴ Matakum nejisu wata al intum bi geni fogo. Ana Yahwa, bi geni fi nus ta shab Israel.