¹ Yahwa wonusu le Musa, ² ''Wori le shab Israel wa kelim le umon, 'Kan intum dakalu fi ard Canaan, ard al bi ja kun takum, ard Canaan be hudud tou, ³ hudud takum ta safa junub bi zidu min sahara ta Zin lahadi safa hudud ta Edom. Nihaya ta safa sherik ta hudud ta junub bi kun fi kat al bi intaha fi bahar Mile. ⁴ Hudud takum bi gairu min murtafa ta Agarabim, le sahara ta Zin. Min hinak, bi ruwa le safa junub Kadesh Barnea wa bi istemir le Hazar Addar wa le Azmon. Min hinak, hudud bi geiru ⁵ min Azmon le safa ta wadi Masir wa bi ruwa le safa ta Bahar. ⁶ Hudud ta garib bi kun bahar al kebir. De yau bi kun hudud takum ta gharib. ⁷ Hudud takum ta shamal bi zidu sawa ma ,kat al intum bi resimu min bahar al kebir le jebel Hor ⁸ baad dak min jebel Hor le Lebo Hamath, Baad dak le Zedad. ⁹ Baad dak hudud bi istemir kida le Ziphron wa bi akir fi Hazar Enan. De yau hudud takum ta shamal. ¹⁰ Baad dak intum lazim resimu le intum hudud takum ta sherik min Hazar Enan junub le Shepham ¹¹ Baad dak hudud ta sherik de bi nezil kida min Shepham le Riblah, safa sherik ta Ain. Hudud de bi istemir le sherik ta Bahar Kinnereth. ¹² Baad dak hudud de bi istemir kida le junub Nahar Ordon le Bahar Mileh wa bi istemir le sherik hudud ta Bahar Mileh. De yau bi kun ard takum, bi hudud tou kulu.'' ¹³ Musa wodi awamir le shab Israel wa kelim, ''De yau ard al intum bi gesimu be gura ze mumtalakat, al Yahwa wodi awamir ashan wodi le tisa gabail wa nus gebila. ¹⁴ Gebila ta iyal iyal ta Reuben, de hasab mumtalakat al wodi le judud ta gabail, wa gebila ta iyal iyal ta Gad, wa hasab mumtalakat al wodi le judud ta gabail tomon, wa nus gebila ta Manassa kulu ligo wata tomon. ¹⁵ Bagi itnin gabail wa nus de ligo nisba tomon lahadi bahar ta Ordon fi safa sherik ta Ariha, safa tulu ta shemis.'' ¹⁶ Yahwa wonusu le Musa wa kelim, ¹⁷ ''De yau asma ta nas al bi gesimu le intum ard de le miras takum: Eleazar al khahin wa Yashu weled ta Nun. ¹⁸ Lazim intum bi azilu wahid zol min ai gebila ashan bi gesimu wata de hasab abuwab tomon. ¹⁹ De yau asma ta rujal de: Min gebila ta Yahuza, Calib jena ta Jephunneh. ²⁰ Wa min gebila ta iyal iyal ta Simeon, Shemuel jena ta Ammihud. ²¹ Wa min gebila ta Benjamin, Elidad jena ta Kislon. ²² Wa min gebila ta Dan rais Bukki jena ta Jogli. ²³ Wa min iyal iyal ta Yusif, min gebila ta iyal ta Manasseh, reis Hanniel jena ta Ephod. ²⁴ Wa reis min gebila ta iyal iyal ta Ephraim, Kemuel jena ta Shiphtan. ²⁵ Wa reis min gebila ta Zabulun, Elizaphan jena ta Parnak. ²⁶ Wa reis min gebila ta Issachar, Paltiel jena ta Azzan. ²⁷ Wa reis min gebila ta Asher, Ahihud jena ta Shelomi. ²⁸ Wa reis min iyal iyal ta Naphtali, Pedahel jena ta Ammihud.'' ²⁹ Yahwa wodi awamir le rujal del kede gesimu ard Canaan wa wodi le ai gebila ta Israel ze mumtalakat.