¹ Ama iyal ta Reuben wa iyal ta Gad kan indu adad kebir min mawashi. Wekit umon aiynu inu ard Jazer wa Gilead, kan mahal al tamam le Mawashi. ² Yala iyal ta Jad wa Reuben ja wa wonusu le Musa, wa le Eleazar al khahin, wa ruasa ta mujtama. Umon kelim, ³ ''De yau asma ta mahalat al nina aiynu: Ataroth, Dibon, Jazer, Nimrah, Heshbon, Elealeh, Sebam, Nebo, wa Beon. ⁴ De yau mahalat al Yahwa hajimu gidam mujtama ta Israel, wa umon mahalat kwes le mawashi. Nina kadamin taki, indu mawashi ketir.'' ⁵ Umon kelim, ''Kan nina ligo rahma fi ena taki, kede wodi wata de le nina kadamin taki, ze miras. Kede nina ma gata Ordon.'' ⁶ Musa juwabu le iyal iyal ta Gad ma Reuben, ''Hal akwana takum yau bi ruwa fi harib wa intum bi geni hini? ⁷ Malu intum bi karabu geliba ta shab Israel ashan ma bi wosulu le wata al Yahwa wodi le umon? ⁸ Abuhat takum amulu nefsa haja zaman Ana rasulu umon min Kadesh Bernea ashan bi ruwa jasisu wata de. ⁹ Umon ruwa lahadi wadi Eshkol. Umon aiynu wata de yala ja karabu gulub ta shab ta Israel ashan umon bi aba dakalu fi beled al Yahwa wodi le umon. ¹⁰ Zalan ta Yahwa ja fi Yom dak de. Huwo halifu wa kelim, ¹¹ 'Wele zol wahid min nas al tala min Masir min umor ishirin sena le fok, ma bi dakalu fi beled al Ana halifu le Ibrahim, Ishak, wa Yakub, leanu umon ma dowru wara tai tamam, ile bes ¹² Kalib weled ta Jephunneh al min Henzi, ma Joshua weled ta Nun. Bes Kalib ma Joshua yau dowru wara tai tamam.' ¹³ Zalan ta Yahwa kan kalis le Israel. Huwo sibu umon woduru fi sahara le arbein sena lahadi jil al amulu katiya gidam tou de kulu demiru. ¹⁴ Suf intum gumu fi mahal ta abuhat takum, bes nas ta katiya, ashan bi zidu zalan ta Yahwa fi shab ta Israel. ¹⁵ Kan intum rija wara min wara tou Huwo bi sibu intum fi beriya wa intum bi, wa intum bi mutu shab de kulu.'' ¹⁶ Umon ja gerib ma Musa wa kelim, ''Sibu nina abinu le nina hos hina le mawashi ta nina wa mudun le usar ta nina. ¹⁷ Wa nina be nufus ta nina bi kun jahis musalahin bi ruwa gidam jesh ta Israel lahadi nina bi gedim umon le mahal tomon. Lakin usar ta nina bi geni mudun al abinu gowi ashan kalam ta nas al lisa bi geni fi beled de. ¹⁸ Nina ma bi rija fi biyut ta nina lahadi kan ai zol min shab Israel bi ligu warisa tou. ¹⁹ Nina ma bi worisu beled ma umon fi safa tani Ordon, leanu worisu ta nina fi hini fi safa sherik ta Ordon.'' ²⁰ Musa juwabu le umon, ''Kan intum bi amulu kalam al intum kelim, kan intum wodi silah le badum taki gidam ta Yahwa le harib, ²¹ lazim ai zol min rujal al musalahin bi gata Ordon gidam ta Yahwa, lahadi Huwo bi turuju adu tou min gidam ²² wa wata de selimu gidam tou. Yala baad kida intum bi rija. Intum bikun ma indu zam gidam ta Yahwa wa gidam ta Israel. Wata de bikun miras takum gidam ta Yahwa. ²³ Lakin kan intum ma amulu kida, intum amulu katiya did Yahwa. Wa arufu takum katiya takum. ²⁴ Abinu takum mudun le Usar takum wa iyal takum wa zaraib le korufan takum; wa amulu takum haja la intum kelim.' ²⁵ Iyal ta Gad wa Reuben wonusu le Musa wa kelim, ''Kadamin taki bi amulu, ze ma said ta nina kelim. ²⁶ Iyal ta nina al sukerin, wa nasawin ta nina, wa kulu mawashi ta nina bi fadulu hinak fi mudun ta Gilead. ²⁷ Wa nina kadamin taki be ruwa gidam ta Yahwa fi harib, ai rajil be silah le harib, ze inta, said ta nina kelim.'' ²⁸ Yala Musa wedi tuojihat be kusust tomon le Eleazar al khahin, le Joshua weled ta Nun, wa ruwasa ta abuhat ta gabail ta Israel. ²⁹ Musa kelim le umon, ''Kan iyal ta Gad ma Reuben gata bahar Ordon ma intum, ai rajil al indu silah le harib gidam ta Yahwa, wa kan intum gobudu wata de, yala intum bi wodi le umon ard ta Gilead ze miras. ³⁰ Lakin kan umon ma ruwa ma intum ma rujal musalahin, umon bi ligu nisba tomon ma intum fi ard ta Canaan.'' ³¹ Yala iyal iyal ta Gad ma Reuben juwabu wa kelim, ''Ze Yahwa kelim le nina, kadamin taki, de haja al nina bi amulu. ³² Nina bi ruwa musalasin gidam ta Yahwa le ard Canaan, lakin miras ta nina bi fadulu nina fi safa ta Ordon.'' ³³ Yala le iyal iyal ta Gad wa Reuben, wa nus ta gebila ta Manassa weled ta Yusif, Musa wodi le umon mamlaka ta Sihon, melik ta Amorin, wa Og melik Bashan. Huwo wodi le umon, wa gesimu le umon mudun tou kulu ma hudud tomon, wa mudun ta beled al hawuli umon. ³⁴ Iyal iyal ta Gad abinu Dibon, Ataroth, Aroer, ³⁵ Atroth shophan, Jazer, Jogbehah, ³⁶ Bet Nimrah, wa Beth Haran ze mudun al gowi ma zaraib ta korufan. ³⁷ Iyal ta Reuben abinu Heshbon, Elealeh, Kiriatham, ³⁸ Nebo, Baal Meon al asma tomon ja geiru, wa Sibmah. Umon wodi asma tani le mudun al umon abinu. ³⁹ Iyal iyal ta Makir weled ta Manasseh ruwa le Gilead wa shilu bara min Amoriin al kan bi geni fogo. ⁴⁰ Musa wodi Gilead le Makiriin, iyal iyal ta Manasseh, wa nas tou geni hinak. ⁴¹ Jair weled ta Manasseh, ruwa wa gobudu mudun tou wa wodi isim tomon Havvoth Jair. ⁴² Nobah ruwa wa gobudu Kenath ma bilad tou, wa huwo wodi isim Nobah, wara isim tou.