¹ Hasa Korah weled ta Izhar weled Kohath weled levi ma Dathan wa Abiram weled Eliab, fi weled Peleth, Judud ta Robin, limu Juzu min rujal. ² umon gum diid Musa, sawa ma rujal tanin min nas ta Israel, 250 kiadad ta mujtama al umon rujal al indum suma min nus al mujtama. ³ Umon limu nefsa tomon sawa ashan wajihu Musa wa Harun. Umon kelimu le umon. “intum Masha beid! Kulu mujtama jahizu, kulu wahid min umon, wa Yahwa fi nus tomon. Malu intum arfa nufus takum fok kulu mujtama ta Yahwa? ⁴ Zaman Musa asuma kida, huwo nam wusa tehet. ⁵ Huwo wonusu ma Korah wa nas al ma huwo, “fi sabah Yahwa bi wori munu yau tou wa del kasisu fakat le huwo. Huwo bi jibu zol dak gerib ma huwo, al huwo iktar huwo bi jibu gerib ma huwo. ⁶ Korah inta ma mojmu taki amulu kalam de Shilu Kanun. ⁷ Bukura kutu nar wa bahur fogo gidam ta Yahwa. Zol al Yahwa bi iktar, al rajil dak bi kasisu le Yahwa. Intum masha beid, intum iyal ta iyal ta Levi. ⁸ Musa kelimu le Korah tanimara, “hasa asuma, intum iyal ta iyal ta Levi. ⁹ Hal de haja suker le intum ashan Allah ta Israel ferigu intum min mujtama ta Israel, ashan bi jibu intum gerib ma Huwo, ashan amulu shokol fi mazba ta Yahwa, wa ashan wogif gidam mujtana wa akdim le umon. ¹⁰ Huwo Jibu intum gerib, wa kulu shikil ta iyal ta iyal ta levi, lisa intum gi fetisu shokol Gesis Kaman! ¹¹ Ashan kida intum wa kulu nas taki limu sawa diid Yah. Harun huwo munu al intum gi itzamar diid huwo?” ¹² Baad dak Musa nadi le Dathan wa Abiram, weled ta Eliab, lakin umon kelimu, “nina ma bi ja”. ¹³ Hal huwo haja suker al inta jibu nina bara min ardi al malian ma asel ma leben, ashan katulu nina fi beriya? Hasa inta deiru amulu nefsa taki reis fok nina! ¹⁴ Ziada fi de, inta ma jibu nina fi ardi Malian leben ma asel, wala wodi le nina mahal zara wa ginena ze warisa. Hasa inta deiru dagisu nina ma waad al fadi? nina mabi ja le inta.” ¹⁵ Musa kan tala zalan shedid wa kelim le Yahwa “mata iktaramu tegdim tomon. Ana ma shilu wahid Himar min umon, wa ana ma awugu wahid min umon.” ¹⁶ Yala Musa kelimu le Korah “ bukura inta wa kulu del al gidum inta bi ruwa gidam ta Yahwa- inta wa intum wa Harun. ¹⁷ Ai wahid min intum lazim bi silu kanun wa kutu Bakur fogo. Yala ai rajil bi jibu gidam ta Yahwa kanun tou, 250 kanun. Inta wa Harun Kaman lazim ai wahid bi jibu kanun. ¹⁸ Yala ai rajil shilu kanun bakur, kutu nar fogo, kutu Bakur fogo, wa wogif gidam kema ta ijtima ma Musa wa Harun ¹⁹ Korah limu kulu mujtama did Musa wa Harun fi gidam kema ta ijtima, wa mejid ta Yahwa zahir fi kulu mujtama. ²⁰ Baad dak Yahwa wonusu le Musa ma Harun. ²¹ Tala nefsa takum min bein mujtama de ashan ana bi demiru umon." ²² Musa wa Harun nam wusa tomon tehet wa gal, “Allah, Allah ta kulu roho al insania, iza wahid zol wahid amulu katiya, inta bi zalan be mujtama de kulu?" ²³ Yahwa Juwabu le Musa. wa gal, ²⁴ Kelim le mujtama, gal, tala bara min kem ta Korah, Dathan, wa Abiram.” ²⁵ Baad dak Musa gam fok wa masha le Dathan wa Abiram, shiyuk ta Israel ruwa wara huwo. ²⁶ Huwo wonusu le mujtama wa gal, “hasa siba kema ta ijtima ta nas al asrar del wa mata lemesu ai haja tomon, au bi demiru intum ashan katiya tomon. ²⁷ Yala mujtana fi ai tijah ta Korah, Dathan wa Abiram ja bara wa wogif fi gidam bab ta kem tomon, ma nusuwan tomon, awulad, wa iyal tomon al sukarin. ²⁸ Baad dak Musa kelim “be de intum bi arufu gal Yehwa rasulu ana ashan amulu shokol de kulu. Ana ma amulu kalam be muk tai. ²⁹ Iza rujal mutu mut al tebi ze daiman gi hasil, manau Yahwa ma rasulu ana. ³⁰ Lakin iza Yahwa kalagu haja jedid, wa al ardi fata kasma wa abula umon, be ai haja al umon endu, wa umon ruwa tehet hai fi turab, Baad dak intum bi fahim gal nas del alisu ana”. ³¹ Ze ma Musa kalasu kelim kalam del, ardi fata tehet rujal del. ³² Ardi fata kasmu wa abulau umon, wa usura tomon, wa kulu nas al taabi le korah, wa Kaman mumtalakat tomon. ³³ Biga umon wa kulu mumtalakat tomon takalu tehet hai fi wata. Ardi gofulu umon tehet, umon mutu min nus ta mujtama. ³⁴ Israeliin kulu al kan hawlu umon jere min kore tomon. Umon kelimu. “ Ardi de bi abulla nina Kaman!" ³⁵ Yala nar wala min Yahwa wa akulu 250 rujal al gedimu bakur ³⁶ Yahweh tanimara wonusu le Musa huwo gal, ³⁷ wonusu le Eleazar weled Harun al gesis wa keli huwo shilu kawaniin ta bakur bara min dukan, al kawaniin del kasisu le ana. Keli umon shetetu fahamat beid. ³⁸ Shilu kawaniin ta bahur ta del al fagidu haya tomon ashan katiya tomon. Keli dugu umon seniyat ashan kati ma mazba. Al rujal del gedimu gidam tai, yala umon kasisu leana. Umon bi kun Alama ta wujut tai fi wasat nas ta Israel”. ³⁹ Eleazer al gesis shilu kawanin al bronze al istagdimu be nas al haragu del, wa umon dugu le kati mazbah. ⁴⁰ Ashan bi zekiru ma nas ta Israel, ashan mafi zol al min bara al ma min iyal ta iyal ta Harun bija wa Huragu bakur gidam ta Yahwa, ashan umon ma bikun ze abna ta korah ma mojmu tou-ze Yahwa amiru be wasat Musa. ⁴¹ Lakin baad sabaa al tani kulu al mujtama ta shab ta Israel gedimu sokwa did Musa wa Harun. umon gal, “intum katulu nas ta Yahwa.” Yala hasal, wokit mujtama limu did Musa wa Harun, ⁴² Baad dak huwo hasil, zaman mujtama limu did Musa wa Harun, umon kan aiynu fi kema ta ijtima, wa shuf sihab gi kati. Mejid ta Yahwa zahir, ⁴³ Wa Musa wa Harun ja fi gidam kema ta ijtima. ⁴⁴ Baad dak Yahwa wonusu le Musa. Huwo gal, ⁴⁵ Ruwa bara min mujtama ashan ana bi demiru umon kulu hasa de.” Baad dak Musa wa Harun nam wusa tomon tehet fi wata. ⁴⁶ Musa kelim le Harun, “shilu kanun kutu nar min mazba, kutu bakur fogo, shilu guwom le mujtama, wa amulu tedhir ll umon, ashan zalan ja min Yahwa, Darbat de bada. ⁴⁷ Yala Harun amulu ze Musa wori. Huwo jere fi wasat ta mujtama. Darbat bada inteshir be sura fi wasat al nas, yala huwo kutu bakur wa bada amulu tedhir fi nas. ⁴⁸ Harun wogif bein nas al meitin wa al haiyin. Fi teriga de darbat wogif. ⁴⁹ Del al matu min darbat kan 14,700 fi adad, bara min del al mutu ma kalam ta Korah. ⁵⁰ Harun rija le Musa fi bab ta kem ta ijtima, wa darbat wogif.