¹ Fi bilel dak mujtamaat kulu kore shedid, ² Wa kulu shab ta Israel nengneng ma Musa wa Harun. Mujtamaat kulu kelimu le umon, Aker kan nina mutu fi ard ta Masir, au heni fi beriya! ³ Lee Yahwa jibu nina fi ard de Ashan mutu be sef, Nusuwan ta nina wa iyal ta nina bikun dahaya. Hal huwo ma kwes ashan nina bi rija le Masir?” ⁴ Umon bada kelim le baad tomon “keli nina Iktar kaid tani , wa keli nina rija le Masir.” ⁵ Baad dak Musa wa Harun num wusa tehet gidam mujtama ta shab ta Israel, ⁶ Joshua weled ta Nun wa Caleb weled ta Jephunneh, umon yau min nas al kan ruwa wa bahisu ard dak, umon seretu gumasat tomon ⁷ Umon wonusu le mujtamaat kulu ta shab ta Israel. Umon kelimu, "Ard al nina ruwa wa bahisu de ardi kwes shedid. ⁸ Iza kan Yahwa rudu le nina, huwo bi shilu nina fogo wa bi wodi le nina , Ard al Malian ma leben ma asel ⁹ Lakin matakun amulu tomorud diid Yahwa, wa matakun kafu nas al fi Ard dak, umon ze esh le nina. Himaya tomon bi shilu bara min umon, leanu Yahwa fii ma nina. Matakun kafu umon.” ¹⁰ Yala biga kulu jama kelimu keli durubu umon be hujar.Lakin mejid ta Yahwa zahir fi kem ta ijtima le kulu shab ta Israel. ¹¹ Yahwa kelimu le Musa, lahadi miten shab de be alisu ana? Lahadi miten umon ma bi endu shigha fi ana, ragam inu kulu alamat ta guwa tai ana amulu fi nus tomon? ¹² Ana bi hajimu umon be darbat, ana bi aba umon, wa ana bi amulu min usra taki doula al bi kun azim wa gowi bara min umon”. ¹³ Musa kelimu le Yahwa, Iza kan inta amulu ze de, Masiriyin bi asuma kalam de, leanu inta ankisu shab del min umon be guwa taki. ¹⁴ Umon be kelimu le nas ta Ardi de , Umon asuma gali inta, Yahwa, fi hadir ma shab del, leanu aiynu inta wusa be wusa Sihab taki wogif fi ras shab. Inta bi ruwa gidam tomon fi shikil ta amud min sihab fi nahar fi shikil amud ta nar bilel. ¹⁵ Asa kan Inta demiru shab de fi wahid dur, dunia al kan asuma kabar de bi kelimu ¹⁶ Leanu Yahwa ma agder ashan shilu shab de le ardi al huwo waadu ashan bi wodi le umon, huwo katulu umon fi beriya.' ¹⁷ Hasa, Ana gi asalu inta, kede guwa ta Rabuna tai kun azim. Leanu inta kelimu, ¹⁸ Yahwa ma gi tala zalan be sura wa morbut be muhaba. huwo be afi katayat kulu, Be ai teriga ma bi afi galat kan huwo bi jibu ikaab ta katiya ta abuhat le iyal ta iyal tomon lahadi fi jil nimira talata wa arba. ¹⁹ Afi, ana bi asalu inta, galat ta shab de leanu ashan tifagiya ta mana taki, ze kulu yom inta bes gi afi shab min wokit umon lisa fi Masir lahadi hasa." ²⁰ Yahwa kelimu, “ Ana afi umon ze ma inta kelimu. ²¹ lakin hagiga, ze ma ana gi ish wa mejid tai be mala kulu dunia, ²² kulu nas al aiynu mejid tai, wa alamat ta guwa al ana amulu fi Masir wa fi beriya- umon asuma ana ashara marat wa ma asuma le sot tai. ²³ Mafi wahad min umon be aiynu ard al Ana waadu le abuhat tomon. Mafi wahid min umon al alisu ana bi aiynu mahal de, ²⁴ ile khadam tai Caleb, leanu huwo indu roho al barau wa gi tabi ana. Ana bi jibu huwo fi ardi al huwo kan ruwa fogo, wa iyal ta iyal tou bikun mosuul fi mahal de. ²⁵ (Hasa Amalekiyin wa Canaaniyin be geni fi wadi). Bukura aglibu wa ruwa le beriya be sika ta bahar ta bush.” ²⁶ Yahwa wonusu le Musa wa Harun. Huwo kelimu, ²⁷ Lahadi miten ana bi istahmal mujtama al gi aridu ana de? Ana asuma sokwa ta shab ta Israel diid ana, ²⁸ Wori le umon, 'Ze ma ana aish- de karar ta Yahwa- ze ma wounsu fi adana tai, Ana bi amulu le Intum: ²⁹ Jusa takum bi fadul hini fi beriya, intum kulu al gedimu sokwa diid ana, intum al idu fi teidat al sukan,adad ta shab min ishirin sena le fok. ³⁰ Intum kulu kulu ma bi dakalu fi ard al ana waadu ashan bikun bet takum, ile Caleb weled ta Jephunneh wa Joshua weled ta Nun. ³¹ Lakin iyal takum al sukerin al inyum kelimu gali bi kun dahaya, Ana be shilu umon fi ard dak. Umon bi tala farhanin be ardi al intum aba! ³² Lakin le intum, jusa takum bi akir akir fi beriya. ³³ Iyal takum bikun ruha fi beriya le fetra ta arbyein sena , umon bi istahmal ukuba ashan amail al intum amulu lahadi nihaya ta akir ta jusa takum fi beriya. ³⁴ Be asab adad ta ayam al arbein yom al intum bahisu ardi dak, intum bi istahmal ukubat de ashan katiya takum le fetra ta arbein sena, wahid sena le yom wahid, wa intum bi arufu kalam tai. ³⁵ Ana Yahwa, kalas wonusu, Ana bi amulu hajat de le mujtama ta katiya al limu diid ana. bi gatau umon kulu kulu fi beriya de, wa umon bi mutu hini. ³⁶ Biga rijal al Musa rasulu ashan bi jasusu ardi dak, al rija wa umon kutu mujatmaat kulu kore kore diid Musa be wazau kabara galat an ardi dak, ³⁷ Rjal del al jibu kabara batal an ard de, katulu umon, wa umon mutu be darbat gidam ta Yahwa. ³⁸ Min nas al ruwa jasusu ardi dak, ile Joshua weled ta Nun wa Caleb weled ta Jephunneh yau be fadulu hai. ³⁹ Zaman Musa wori kabara de le shab ta Israel, umon kore shedid. ⁴⁰ Umon gum sabah bediri wa umon ruwa fi ras jebel wa kelemu, Aiynu, nina yau hini, nina bi ruwa fi mahal al Yahwa waadu, nina amulu katiya.” ⁴¹ Musa kelimu: “ Malu intum gi karabu awamair ta Yahwa? Intum ma bi najah ⁴² matakum ruwa leanu Yahwa mafi ma intum ashan bi hami intum ashan adu ma koumu intum ⁴³ Amalekitiyin wa Canaaniyin fi hinak, intum bi mutu be sef leanu intum aglibu dahar takum min douru wara Yahwa. huwo biga ma bikun ma intum” ⁴⁴ Lakin umon karir ashan be ruwa fok jebel, Musa ma sonduk ta waad ta Yahwa ma tala min kem. ⁴⁵ Nas Amalekiyin nezil tehet, wa Canaaniyin kaman al gi geni fok jebel dak. Umon hajimu Shab ta Israel wa dugu umon kulu tehet fi sika kulu lahadi Hormah.