¹ Baad dak Yahwa wonusu le Musa. Huwo kelimu, ² “Rasulu rijal tanin ashan ruwa bahisu ard ta Canaan, al ana wodi le shab ta Israel. Rasulu zol min kulu gebila ta judud tomon”. Ai zol lazim bikun reis fi nus tomon. ³ Musa rasulu umon min beriya ta Paran, ashan umon bi tii awamir ta Yahwa. Umon kan kulu ruasa fi nus ta shab ta Isreal. ⁴ De yau asma tomon: min gebila ta Reuben, Shammua weled ta Zakkur; ⁵ min Gebila ta Simeon, Shaphat weled ta Hori; wa ⁶ min gebila ta Yahuza, Caleb weled ta Jephunneh; ⁷ min Gebila ta Issachar, Igal weled ta Yusif; ⁸ min Gebila ta Ephraim, Hoshea weled ta Nun; ⁹ min Gebila ta Benjamin Palti weled ta Raphu; ¹⁰ min gebela ta Zebulum, Gaddiel weled ta Sodi; ¹¹ min Gebila ta Yusif ( de bi kelimu min Gebila ta Manasseh), Gaddi weled ta Susi; ¹² min Gebila ta Dan.Ammiel weled ta Gemalli; ¹³ min Gebila ta Asher, Sethur weled ta Michael; ¹⁴ min Gebila ta Naphtali, Nahbi weled ta Vophsi; ¹⁵ min Gebila ta Gad, Geuel weled ta Maki. ¹⁶ De yau asma ta Rojal al jawasis al Musa rasulu le ard ta Canaan, Musa geiru isim ta Hoshea weled ta Nun le isim Joshua. ¹⁷ Musa rasulu umon ashan bi bahisu ard ta Canaan. huwo kelimu le umon : ruwa takum min Negev lahadi beled al fi ras jebel, ¹⁸ Bahisu ardi wa aiynu huwo kef. Aiynu takum nas al gi ish hinak, hal umon gowiin wele deifiin, wa umon besitiin wele ketir.? ¹⁹ Aiynu ardi al umon gi geni fogo de shikil tou kef. Huwo kwes wele batal? Yatu mudun yai hinak? Hal umon ze kemat, wele mudun al abinu goi ²⁰ Aiynu ard de shikil tou kef, Iza kan huwo kwes le zera wele batal ? wa iza kan fii asjar hinak wele mafi. Kun gowiin wa jibu takum shikil ta intaj ta ard dak “ Wokit de hasa ta musim ta awel inab al nijitu. ²¹ Yala Rojal de ruwa bahisu arde min beriya ta Zin le Rehob, gerib ma Lebo Hamath. ²² Umon ruwa fok min Negev wa wosulu fi Hebron. Ahiman, Sheshai, wa Talmai, iyal ta iyal ta Anak kan gi geni fogo. Hebron kan abinu saba senawat gubal Zoan al fi Masir. ²³ Zaman umon wosulu fi waadi ta Eshkol, umon gata fere wahid al fogo inab. Itnin min umon kutu fi kasab wa arfa fi kitfa tomon , wa Kaman umon jibu raman wa tiin. ²⁴ Semeu isim ta mahal dak Waadi ta Eshkol, leanu shab ta Isreal gata fere ta inab hinak. ²⁵ Baad arbein ayam , umon rija min bahisu ard ta Canaan. ²⁶ Umon rija le Musa, Harun ,wa kulu mojtama ta shab ta israel fi beriya ta Paran, fi Kadesh. Umon rija be kabar le umon wa mujtamat kulu, worii le huwomon haja al humon Eynu , wa wori le umon intajat min Ard dak. ²⁷ Umon wori le Musa: “Nina wosului le ard al inta rasulu nina fogo. Ardi malyan be leben wa asel de yau intaj min ardi dak, ²⁸ Ile bes nas al abinu biyut tomon hinak gowiin. Mudun tomon gowiin wa kubar. nina kaman aiynu iyal ta iyal ta Anak hinak. ²⁹ Amalekitiyin gi ish fi Negev. Wa Hittitiyin, Jebusiyin, wa Amoriyin endu biyut tomon fi medina al fi Jebel . wa shab ta Canaan aishin fi taraf bahar janbu nahar ta Jordan ³⁰ Lakin Caleb sakitu nas al kan gidam Musa huwo kelemu: “ keli nina ruwa wa shilu mumtalakat ta ardi dak, leanu nina be agder istelimu mahal dak” ³¹ Lakin rijal al ruwa ma umon kelimu, “Nina ma be agder hajimu nas dak leanu umon gowiin min nina”. ³² Yala umon wazau kabar al batal le shab ta Israel an ardi dak al umon bahisu. Umon kelimu, "Ardi al nina gi aiynu de huwo ardi ta nas al bi katulu nina. Nas kulu al nina aiynu de umon tuwal wa indum hajim. ³³ Nina aiynu nas gowin, iyal ta iyal ta Anak, shab al weledu ma nas al kubar wa gowiin fi tijah ta nina, nina ze jarat, kan bi Karinu be nina wa de yau nina fi ena tomon.