¹ Hasil seri bad dak Yesua bada safir hawli mudun al barawu barawu wa belad, bi beshiru wa alinu al kabar kwes an malakuut ta Allah. Al etnashar kan ma huwo, ² wa kaman mara al aliju min aruwa al shirir wa ayanaat: Mariam al bi nadi Majdeliya, al saba shayatiin turuju bara min heya, ³ Yuna, mara ta Kozi, wokil ta Herodus; wa Susanna; wa tanin ketir al humon, bi akdim ihteyajat min amuwal, tomon. ⁴ Wokit nas ketir kan limu, wa nas kan jayiin le humon min medina, huwo wori misaal: '' ⁵ Al muzari ruwa le zara zira tuo. Ze ma huwo zara, tanin waga taraf sika wa kan dusu ma kura, wa tiuur ta sama akulu. ⁶ Tanin waga fok hajer, wa ze ma huwo raba fok, huwo nashif bara, ashan huwo ma indu rutuba. ⁷ Tanin waga nus shok, wa shok raba fok sawa ma bizira kangu huwo. ⁸ Lakin tanin waga fi turab al kwes wa tala samar al kan aktar min mia.'' Bad Yesua kelim hajat del, huwo nadi, ''Al indu etnin adana kede huwo asuma.'' ⁹ Talamiz tuo asalu huwo mana ta misaal de sunu. ¹⁰ Huwo kelim, ''marafa ta sir ta malakuut ta Alllah wodi le intum, lakin le tanin Ana bi wonsu ma misaal, ashan hata humon bi ayenu ze ma bi ayenu, hata humon bi asuma ze humon ma bi fahim.' ¹¹ Hasa de yau mana ta misaal: Al bizira huwo kelimu ta Allah. ¹² Wahid al waga fi sika humon al asuma, lakin shitan ja wa shilu bara al kelima min gelba tomon ashan humon ma bi amin wa bi kalis. ¹³ Wahid al waga fi hajer humon yau al wokit asuma kelima, humon gabilu ma fara. Lakin humon ma indu irig; humon bi amin le fatra besid, wa fi zaman ta tajarib humon bi waga. ¹⁴ Al bizira al waga fi nus ta shok de yau nas al asuma kelima, lakin humon ruwa fi sika tomon, kangu humon ma humum ta haya gena tuo wa hajat ta dunia ta haya, wa smar tomon ma nigitu. ¹⁵ Lakin al bizira al waga fi turab al kwes, del al asuma kelima ma gelba al nedif wa ma gelba kwes, wa bi tala samar ma subur. ¹⁶ Ma fi zol bi wala lamba wa bi kati ma gufa aw kutu tihit serir. Lakin huwo bi kutu fok ashaan kul zol al dakalu bi ayenu nur. ¹⁷ La anu mafi haja al dusu ma bi kun maruf, wa ma haja sir al ma bi bi kun maruf wa bi ja fi nur. ¹⁸ Fa asuma tamum, le wahid al huwo indu ketir bi wodi le huwo , lakin le wahid al ma indu, hata al huwo bi fekir huwo indu bi shilu bara min huwo.'' ¹⁹ Bad dak uma tuo wa akuwana ja le huwo, lakin humon ma agder ja gerib ma huwo la anu nas ketir. ²⁰ kan kelimu le huwo, '' uma taki wa akuwana taki wogif bara, der ayenu inta. ²¹ ''Lakin Yesua juabu wa kelimu le humon, ''uma tai wa akuwana tai humon al bi asuma kelima ta Allah wa bi amulu ma huwo. '' ²² Hasa wahid yom huwo dakalu fi murkab ma talamiz wa huwo kelimu le humon, ''Kede anina ruwa le tija tani ta bahar. ''Humon bada ruwa. ²³ Lakin ze ma humon bi ruwa huwo nuum. hawa shedid ja fi bahar, wa murkab tomon kan maliyan ma moyo, wa humon kan fi katar. ²⁴ Bad dak talamiz ta Yesua ja le huwo wa goumu huwo fok, kelim ''Saeed! Saeed! Anina bi mutu!'' Huwo gum wa intehir al hawa wa moyo, wa humon wogif, wa kan fi hudu. ²⁵ Bad dak huwo kelimu le humon ''Wenu imaan takum?'' Lakin humon kan kafo wa mustagarabin, wa humon asalu badon tomon, ''De biga munu ze de, al huwo bi ameru hawa wa moyo, wa humon bi ihtaram?'' ²⁶ Humon ruwa le beled ta Caisaria, al mugabil Jeilel. ²⁷ Zaman Yesua wogif fi ard, huwo kan gabil ma rajil tani min medina huwo indu shayateen. le zaman towel huwo ma lebisu gumsh, wa huwo ma bi geni fi juwa lakin fi nus ta turubat. ²⁸ Zaman huwo ayenu Yesua, huwo kore wa waga tihit gedam huwo wa huwo kelimu ma sout fok, ''Inta malu ma ana, Yesua, jena ta Allah al fok? Ana bi asalu inta, ma ta azibu ana.'' ²⁹ La anu Yesua amiru roho al ma nedif ashan bi tala bara min rajil. La anu zman ketir huwo kan shilu mosuliya ta huwo, wa sala huwo kan robutu ma genzir wa hubal wa tihit herasa, huwo kan bi gata genzir wa bi sugu ma roho al shierir le sahara. ³⁰ Bad dak Yesua asalu huwo, ''Isim taki munu?'' Huwo juabu, ''Legion,'' la anu shayateen ketir kan dakalu fogo huwo. ³¹ Humon istemir asalu huwo kede ma rasulu humon le hawiya. ³² Wa kan inak kodoroof ketir bi akulu fogo Jebel. Al shayateen asalu huwo ashan bi sibu humon ruwa fogo, wa huwo rudu le humon. ³³ Fa shayateen tala bara min al rajil wa ruwa le kodoroof, wa humon tala seri le bahar wa kangu humon. ³⁴ Wokit del al bi harisu kodoroof ayenu al hasil, humon jere wa wori fi medina wa beled. ³⁵ Nas ruwa ashan bi ayenu al hasil, w a humon ja le Yesua wa ligo zol al shayateen tala min huwo. huwo kan geni fi kura ta Yesua, libisu wa huwo kwes fi muuk tuo; wa humon kan bi kafu. ³⁶ Bad dak del al ayenu wori le humon kef rajil al idu shayateen aliju. ³⁷ Yala kulu nas ta beled ta Jederein asalu Yesua ashan bi ruwa min humon, la anu kof kebir kan amsuku humon, Fa huwo dakalu fi murkab ashan humon bi rija wara. ³⁸ Zol al shayateen tala min huwo asalu huwo ashan bi sibu ruwa ma humon, lakin Yesua rasulu huwo, kelimu, ³⁹ Rija le beled taki wa gedimu hisab kamil an haja al Allah amulu le inta, '' Al rajil ruwa fi sika tuo, alinu fi medina kulu sunuYesua amulu le huwo. ⁴⁰ Wokit Yesua rija, al jumhuur rahibu huwo, la anu humon kulu bi estena huwo. ⁴¹ Rajil kan ismu Yairus, wahid min giyadad ta majma, ja wa waga tihit fi kura, ta Yesua, wa huwo asalu huwo ashan bi ja fi bet tuo ⁴² la anu biniya tuo al wohid, biniya ta etnashar sena, kan bi mutu. ze ma Yesua fi sika, al jumhuur ta nas amulu zahma le huwo. ⁴³ Mara kan fi inak al heya kan indu nezif le etnasar sena wa heya karabu gurush kulu wa ma bi agder aliju ma aye zol. ⁴⁴ Heya ja bi wara Yesua wa abisu taraf ta gumash tuo, wa nefsu zaman nezif ta heya wogif. ⁴⁵ Yesua kelimu, ''De kan munu al lemesu ana?'' Wokit nas kulu anguru, Butrous kelimu, ''Saeed, nas ketir jambu taki wa humon kulu bi asuru inta.'' ⁴⁶ Lakin Yesua kelimu, ''Zol tani lemesu ana, La anu ana arufu inu guwa tala min ana.'' ⁴⁷ Zaman mara de ayenu inu heya ma bi agder dusu nefsa, heya ja ma kafu wa waga tihit gedam huwo. fi gedam ta kulu nas heya alinu sabab al heya lemesu huwo wa kef heya tawali ligo ilaj. ⁴⁸ Bad dak huwo kelimu le heya, ''Biniya, iman taki kutu inta kwes. Ruwa ma salam.'' ⁴⁹ Wokit huwo kan lisa bi wonusu, zol tani ja min mosliin ta majma kelim, ''Jena taki mutu. ma ta tabu mualim ketir.'' ⁵⁰ Lakin zaman Yesua asuma keda, huwo juabu Yairus, ''ma ta kafu; bes amin, wa heya bi aliju,'' ⁵¹ Zaman huwo ja le bet huwo ma sibu zol kede dakalu ma huwo, illa Butros wa Youhana wa Yakub, wa abu ta jena wa uma tuo. ⁵² Hasa kulu nas kan haznanin le heya, lakin huwo kelimu, '' ma takum kore; heya ma mutu lakin heya nuum.'' ⁵³ Lakin humon atako le huwo, la anu humon arufu heya mutu. ⁵⁴ Lakin huwo amusuku heya min eden wa nadi, kelimu ''jena, gum fok!'' ⁵⁵ Roho ta heya rija, wa heya gum fok tawali. Huwo amiru humon ashan jibu le heya haja ta akulu. ⁵⁶ Abuhat ta heya kan mustagarabin, lakin huwo amiru humon kede ma wori le aye zol haja a hasil.