¹ Hasil fi Sabit Yesua kan mashi min mahal zira wa talamiz tuo kan bi gata ras ta sanabil, bein edenat tomon wa humon bi akulu sanabil. ² Lakin bad min Firiseen kelimu, ''lei intkum bi amulu haja al ma ganuuni fi yom Sabit?'' ³ Yesua juwabu humon, kelimu, ''Hal intum kulu kulu ma agara haja al Daud amulu wokit huwo kan zalan, huwo wa rijal al kan ma huwo? ⁴ Huwo ruwa le beit ta Allah, wa shilu al raigif ta tegdima wa akulu juzu wa kaman wodi juzu le rijal al ma huwo ashan bi akulu, hata lo kan huwo ganuuni le kahan ashan bi akulu. ⁵ ''huwo kelimu le humon, ''Jena ta Insaan huwo Rabuna ta Sabit ⁶ Hasil fi yom Sebit tani huwo ruwa le kenisa wa derisu nas inak. Kan fi rajil inak eden tuo al yemiin yabis. ⁷ Al kataba wa Firiseen kan bi ragebu huwo ashan bi ayenu hal huwo bi aliju fi yom Sabit, ashan humon bi ligo sabab le ishteki huwo. ⁸ Lakin huwo arufo sunu humo bi fekir wa huwo kelim le rajil al eden tuo yabis, ''Gum fok, wa wogif ini fi nus ta kulu nas. '' Fa rajil gum fok wa wogif inak. ⁹ Yesua kelimu le humon, ''Ana asalu intum hal huwo ganuuni fi Sabit ashan bi amulu kwes wala batal, wala bi alagu haya wala bi demiru?'' Fa ¹⁰ huwo ayenu le humon kulu wa kelimu le rajil, ''Midu eden taki huwo midu, wa eden tuo kan tala tamum. ¹¹ Lakin humon kan zalan wa humon wonusu le bad tomon an sunu humon bi amulu le Yesua. ¹² Hasil fi ayamat tanin huwo ruwa le jebel ashan seli. Huwo istemir belel kulu fi sala le Allah. ¹³ Wokit kan nahar huwo nadi talamiz le huwo, wa huwo iktar etnashar min humon semi humon rusul. ¹⁴ Asma ta rusul kan Samaan (al huwo kaman Butros) wa aku tuo Andarauos, Yakub,Yuhana, Filipos, Bartilimaus, ¹⁵ Matta, Toma, Yakub jena ta halfi, Samaan al kan nadi gayur, ¹⁶ Yahuza jena ta Yakub, wa Yahuza al Iscarioti, al ja selim Yesua. ¹⁷ Yesua nezil ma humon min jebel wa wogif fogo mahal al sawa sawa ma talamiz tuo al ketir wa ma adad keir ta nas min Yahudia wa Uruselim wa min Suur wa Seida. ¹⁸ Humon ja asuma le huwo wa ashan bi aliju humon min ayanat. Nas al kan indu roho shirir kaman kan aliju. ¹⁹ Kulu nas al fi zahma hawil lemesu huwo la anu guwa le ilaj kan bi tala min huwo, wa huwo aliju humon kulu. ²⁰ Huwo ayenu le talamiz tuo, wa kelimu, '' Baraka le del al masakin, la anu malakut ta Allah de tomon. ²¹ Baraka le del al ja an hasa, la anu intum bi shaban. Baraka le del al bi kore hasa, la anu intum bi atako. ²² Baraka le del al nas bi akrah intum wa gesimu intum wa shitimu itakum, ashan jena ta Insaan. ²³ Afarah fi yom dak wa kun murta, la anu intum endu ujura kebir fi sama, la anu judud tomon amulu le anbia bi nefsu teriga. ²⁴ Lakin bi kun kab le intum al ganiyanin, la an intum kalas shilu taziya takum. ²⁵ Woe le intum al shabanin hasa, la anu intum bi kun ja an baden. Woe le intum al bi atako hasa, la anu intum bi kun haznanin wa bi kore baden. ²⁶ Woe le intum, al nas wonusu kwes takum, la anu de yau judud tomon amulu le anbia al kadabiin ²⁷ Lakin ana kelim le intum del al bi asuma, hibu adu takum wa amulu kwes le del al bi akrah intum. ²⁸ Bariko del al lanu intum wa seli le del al amulu intum batal. ²⁹ Le de al nowuru inta fi yemin wodi le huwo tijs tani kaman. Iza zol shilu gamis, taki wodi le huwo bantalon kaman. ³⁰ Wodi le kulu zol al asalu inta. Iza zol shilu haja taki, mata asalu huwo ashan bi rija le inta. ³¹ Ze ma intum der nas kede amulu le intum umalu takum kaman le humon. ³² Kan intum hibu bes nas al bi hibu intum, yatu faida yau le intum? La anu katein bi hibu del al bi hibu humon. ³³ Kan intum amulu kwes bes le nas al amulu kwes le intum, yatu faida yau le intum? La anu hata katein bi amulu kaman. ³⁴ Kan intum bes deyinu nas al intum bi itwaka humon bi dafa le intum, yatu faida le intum? hata katein bi deyinu le katein, ashan bi ligo nefsu gurush. ³⁵ Lakin hibu adu takum wa amulu kwes le humon. Deyinu ma itwaka haja bi rijao wa ujura takum bi kun kebir wa intum bi kun iyal ta Allah al fok, la anu huwo nefsu ameen le nas al bi shokuru wa nas al batalin. ³⁶ Kun rehim, ze ma abu taki huwo rehim. ³⁷ Ma takum gata gadia, wa ma bi gatao gadia takum. Ma takum hukumu, wa bi hukumu itakum. Afi nas tanin, wa bi afi intakum. ³⁸ Wodi wa bi wodi le intum. Al ketir bi asuru tihit, bi hizu ma bad wa ma bi dofugu fi guaa aki. La anu godoor al inta wodi bi wodi le inta, '' ³⁹ Wa huwo wori le humon misaal. ''Hal zol amiyan bi agder gedimu zol amiyan? Kan huwo amulu, humon kulu ma bi waga fi hufura? ⁴⁰ Tilmiz ma kebir min mualim, Lakin kulu zol kan timu tedrib bikun ze mualim tuo. ⁴¹ Le inta bi ayenu le gesh al fi ena ta aku taki lakin inta ma lahizu le kashab al fi ena taki? ⁴² Kefe inta bi kelim le aku taki, 'Aku, kede ana shilu gesh al fi ena taki, ' wa inta bi nefsak ma ayenu kashab al fi ena taki? Intakum al marai awel tala kashab bara min ena taki, wa inta bi ayenu kwes ashan bi tala gesh min ena ta aku taki. ⁴³ La anu mafi shejera al kwes bi tala samar al batal, wa la fi shejera batal bi tala samar al kwes. ⁴⁴ La anu aye shejera bi arufu ma shikil ta samar al bi tala. La anu ns ma bi limu Teen min shok, wa la humon bi limu enab min gaba. ⁴⁵ Al insan al kwes min gelba tuo bi tala haja al kwes, wa insan al shirir min gelba al shirir bi tala haja al shirir. La anu al mala fi gelba yau kasam bi wonusu. ⁴⁶ Le intum bi nadi ana, 'Rabuna, Rabuna,' wa intum ma bi ihteramu hajat al ana kelim? ⁴⁷ Kulu zol al ja le ana wa asuma kelimat tai wa ihteramu, Ana bi wori le inta huwo ze sunu. ⁴⁸ Huwo ze zol abinu beit, hafura tihit wata wa abinu asas fi hajer, wokit moyo ja, mala tija ta beit, lakin ma hizu, la anu kan abinu tamum. ⁴⁹ Lakin zol al bi asuma kelimat tai wa ma bi ihteramu, huwo ze zol abinu beit fi wata bidon asas. Wokit moyo mala tija beit, tawali waga, wa kan waga tuo azim.''