¹ Hasa hasil, wokit nas kan limu ketir hawli Yesua wa bi asuma le kalam ta Allah, huwo kan wogif jambu bahar ta Jinasarat. Huwo ² ayenu etnin murkab wogif jumbu bahar. Sayadiin tala wa humon kan bi kasulu shabakat. ³ Yesua dakalu fi wahid min murkab, al kan ta Botrus, wa asalu ahsan bi kutu fi moyo masafa guser min turab. Bad da huwo geni tihit wa alimu nas al bara min murkab. ⁴ Zaman huwo kalasu wonusa, huwo kelimu le Botrus, '' ahilu murkab fi juwa moyo wa jada shabaka taki le gobudu. '' ⁵ Botrus juwabu wa kelimu, '' Saeed, anina ishtakal belel kulu, wa anian ma gobudu haja, lakin ashan kalam ta, Ana bi jada shabaka.'' ⁶ Zaman humon amulu ze de, humon limu adad kebir min samaga, wa shabakat kan bi kasuru. ⁷ Humon nadi nas al fi murkab ashan bi ja saidu humon. Humon ja wa mala etnin murkab, hata humon ba katis. ⁸ Lakin Samaan Botrus, wokit huwo ayenu, waga tihit rukuba ta Yesua, kelimu, ''Rowa min ana la anu ana zol kati, Rabuna. ⁹ Huwo kan bi ga istagarab wa kulu nas al kan ma huwo, fi gobudu samaga al humon shilu. ¹⁰ de kan dumu Yakub wa Yuhana, iyal ta Zebedee, al humon kan sabisabi ma Samaan. Yesua kelimu le Samaan, '' ma ta kafo, la anu min hasa le gidam inta bi gobudu nas.'' ¹¹ Wokit humon jibu murkab bara, humon sibu aye haja wa humon ruwa wara huwo. ¹² Ja hasil wokit huwo kan fi wahid min medina, zol maliyan jengeli kan fi inak. wokit huwo ayenu Yesua, huwo denger wosa tuo wa asalu huwo, kelim, ''Rabuna kan inta deiru, inta sala ana nedif. '' ¹³ bad dak Yesua amsugu iden tuo wa lemesu huw, kelimu, ''Ana deiru. kede inta kun nedif. ''nefsu zaman jengeli sibu huwo. ¹⁴ Huwo kelim le huwo kede ma wori le aye zol, lakin ruwa fi sika taki wa wori nefsa taki le kahin wa gedimu zebiha le nadafa taki, hasab awamir ta Musa, le shihada le humon.'' ¹⁵ Lakin al tegrir an huwo shetetu beit, wa nas kutar ja sawa ashan bi asuma le derasa tuo wa ashan bi aliju min ayanaat tomon. ¹⁶ Lakin bad marat huwo bi ruwa seli fi mahal al mafi fogo nas. ¹⁷ Wa kan hasil fi wahid yom huwo kan bi derisu, wa kan fi inak ferisieen wa mo alimeen ta ganuun geni inak humon kan ja min karia al baroa brao fi belad ta Jeiliel wa Yahudia, wa kaman min medina ta Urushelim. Guwa ta Rabuna kan fi ma huwo le aliju. ¹⁸ Hasa rujal tanin ja humon arufao zol al kan shelel fi birish, wa humon ayenu sika ashan bi dukalu huwo juwa fi gedam ta Yesua. ¹⁹ Humon ma ligo sika ashan bi dakalu huwo juwa la anu nas ketir, humon ruwa fok fi raas juwa wa nezil zol de tihit min telgim fi birish, fi nus ta nas, fi gidam ta Yesua. ²⁰ Wokit Yesua ayenu iman tomon kelim, Insaan katiya taki afi. ²¹ ''Al kataba wa Firiseen bada asalu, ''De munu yau bi kelim farig? Munu bi agder afi katiya ila Allah brao?'' ²² Lakin Yesua arufo afkar tomon sunu humon bi fekiru, huwo juwabu wa kelimu, ''Lei intakum bi asalu kalam de fi guluub takum? ²³ Yatu yau sahil ashn bi kelimu, 'Kataya taki afi wala bi kelimu gum fok wa amshi?' ²⁴ Lakin de ashan intum bi arufu inu jena ta Insaan indu sultaan fi ard ashan bi afi kataya, Ana kelim le intum, 'Gum fok shilu firish wa ruwa le beit.'' ²⁵ Nefsu wokit huwo gum fok fi gidam tomon wa shilu firish al huwo bi num fogo. Wa huwo ruwa le beit, bi mejido Allah. ²⁶ Kulu waid kan istagarab wa Humon mejido Allah. Humon kan mala ma kafo, kelimu ''Anina ayenu hajat ajib alele.'' ²⁷ Bad hajat del hsil, Yesua ruwa bara min inak wa ayenu zol al ta limu darayib isim tuo Lawi geni fi rakuba ta limu darayib. Huwo kelimu le huwo, ''tal wara tai. ²⁸ Lawi gum fok wa ruwa wara tuo, sibu aye haja wara. ²⁹ Wa Lawi amulu fi bet tou azuma kebir le Yesua nsa ketir ta limu darayib fi beit tuo azuma kebir le Yesua. kan fi inak nas ta limu darayib wa nas tanin al kan bi akulu fi tarbeza ma umon. ³⁰ Lakin Firiseen wa kataba kana bi neg neg le talamiz, kelimu '' Lei ita bi akulu wa ashrab ma nas ta darayib wa nas tanin katieen? ³¹ Yesua juwabu humon, ''Nas al humon kwes ma der dictor; bes del al humon ayaniin. ³² Ana ma ja ashan bi nadi nas al nedifin le tuoba, lakin ashan bi nadi al katieen le tuoba.'' ³³ Humon kelimu le huwo, ''Talamiz ta Yuhana dayiman bi suum wa bi sel, wa talamiz ta firiseen bi amulu ze kaman. Lakin talamiz taki bi akulu wa bi asharab. '' ³⁴ Yesua kelimu le humon, '' Hal zol tani bi agder kutu nas fi maha iris sum wa aris lisa fi ma humon? ³⁵ Lakin fi yom bi ja wokit aris bi shilu min humon, bad dak fi ayamat del humon bi sum.' ³⁶ Wa Yesua kaman wonusu misaal le humon. ''Mafi zol bi seretu gita gumash min jalabia al jedid wa bi rugaa ma gumash al gedim. Iza huwo amulu keda, huwo bi seretu jalabia al jedid, wa gita gumash min jalabia al jedid ma bi timu fi jalabia al gedim. ³⁷ Ma zol bi kutu khamur al jedid fi boksa al gedim. iza huwo amulu ze de, khamur al jedid bi faga boksa wa bi dufugo wa boksa de bi karabu. ³⁸ Lakin khamur al jedid lazim bi kutu fi boksa al jedid. ³⁹ Mafi zol bad ma huwo ashirab khamur gedim der khamur jedid, la anu huwo kelim, 'Al gedim huwo kwes.'''