¹ FI zaman dak, wokit alaf min al nas kan limu sawa ketir humon bi dusu nufus tomon, huwo bada kelmu le Talamiz tuo awelan amulu takum hisab min kamira ta Firiseen, al huwo yau kabasu. ² Lakin ma fi haja al dusu ma bi zahir, wa ma fi haja al kati al ma bi arufu. ³ Ashan keda aye haja ita kelimu fi duluma bi asumao fi nor, wa haja al ita wonusu fi adana dakil juwa bi alinu fogo ras juwa. ⁴ Ana kelim le inta, sabi tai, ma ta kafo min del al bi katalu gesim, wa bad dak humon ma indu al ketir al humon bi amulu. ⁵ Lakin Ana bi anziru intum an del al itakum bi kafo. Kafo min al bad kan katulu, indu sulta ashan bi jada intum fi jahanum. Num ana kelim le intum, kafu huwo. ⁶ Hal kamsa tiyuur ma ge ishteru ma etnin jine? wa sala wahid min humon ma bi nesitu fi ena ta Allah. ⁷ Lakin hata al shar ta ras takum kulu edu. Ma ta kafu .Intum ahsen bi ketir min tiyuu ⁸ Ana kelim le itakm, kulu wahid al iterif ma ana gidam nas, jena ta insan kaman bi iterif ma huwo gidam ta malaykat ta Allah, ⁹ lakin le de al anguru ana gidam ta nas bi anguru gidam ta malaykat ta Allah. ¹⁰ Kulu wahid al wonusu kelima deed jena ta insan, bi affi huwo, lakin le del al bi wonusu deed Roho al Kuduus, ma bi affi humon. ¹¹ wokit kan humon jibu intum gidam ta majama, al hukam wa sultatat, matakum kafu an kef intum bi kelim le difa ta nefsa takum, aw sunu al intum bi kelim, ¹² la anu al Roho al Kuduus bi derisu intum fi zaman dak an sunu intum bi kelim. ¹³ Yala wahid min al jumhuur kelimu le huwo, ''Mo alim, wori le aku tai ashan bi gesimu worisa ma ana.'' ¹⁴ Yesua kelim le huwo, Ya rajil, munu kutu ana ghadi aw wasit le itakum?'' ¹⁵ Huwo kelim le humon, '' Ayenu hafizu nefsa min kulu niyaat ta tamma, la anu haya ta zol ma bi kun min hajat al huwo indu.'' ¹⁶ Fa Yesua wori le humon misaal, kelimu, ''Mahal zara ta zol al ghani niqitu ketir, ¹⁷ wa huwo fekiri fi nefsa tuo, gali, 'Sunu ana bi amulu, la anu ana ma indu mahal ashan bi kutu fogo simar?' ¹⁸ Huwo kelim, ' de yua al ana bi amulu. Ana bi kasuru tihit gugu tai wa bi abinu wahid al kebir, wa inak Ana bi khazinu kulu dura wa kheirat tanin. ¹⁹ Ana bi kelim le nefsa tai, ''Nefsi, inta indu kheirat ketir kutu fok le senewat ketir. Akudu raha, akulu, ashrab, kun farhan.''' ²⁰ ,v 20 Lakin Allah kelim, 'Ya zol al beled, alela azu nefsa taki, wa hajat al ita jahizu, bi kun le munu?' ²¹ De yau ze zol khazinu hajat le nefsa tuo wa huwo ma ghani le Allah.'' ²² Yesua kelim le talamiz tuo, ''Ashan keda ana kelim le intum, ma takum kafu an haya takum, sunu intum bi akulu; aw an gesim takum, sunu itakum bi libisu. ²³ La anu haya afdal min akil, wa al gesim huwo afdal min gumash. ²⁴ Ayenu takum le guraab, humon ma bi zara aw bi agila. Humon ma indu magzan aw gugu, lakin Allah bi akilu humon. Godoor sunu intum ahsen min tiyuur! ²⁵ Munu min intum kan bi hafizu nefsa tuo bi agder zidu tul tuo mitir wahid? ²⁶ Fa kan intum ma bi agder amulu hajat del sukar, lei itakum bi kafu an bagi del? ²⁷ Ayenu le zuhuur__kef humon bi raba. Humon ma bi istakal wa humon ma bi taban Ana bi kelim le intum hata Suleiman fi mejid tuo ma libisu ze wahid min humon. ²⁸ Kan libisu gesh al fi mahal zara, al bi kun fi alela, wa bukura bi jadao fi nar, godoor sunu huwo bi libisu intum Oh intum ta iman besit! ²⁹ Ma ta ayenu le sunu ita bi auku wa sunu ita bi asorubu, wa ma ta kun ma kafu. ³⁰ La anu kulu nas fi alam bi ayenu hajat del, wa Abu takum arufu inu ita muhtaj le humon. ³¹ Lakin fetisu malakuut, tuowa hajat del bi zidu le inta. ³² Ma takum kafu, karufan al sokerin la anu Abu takum murta shidid ashan bi wodi le intum malakuut. ³³ Beau hajat taki wa wodi le al meskin. Sala le nefsa taki keys al ma bi gidu __hajat al gali fi samawat al ma bi intaha, harami ma bi ja gerib, hasharat ma bi demiru. ³⁴ La anu mahal al hajat taki fogo gelba taki kaman bi kun inak. ³⁵ Libisu gumash taki jahiz ma gash, wa kede lamba taki istemir wala, ³⁶ wa kun ze nas al bi ayenu an saeed tumon kan huwo rija min iris, fa huwo kan ja huwo bi dugu, humon tuwali bi fatah al bab le huwo. ³⁷ Baraka le kudam del al saeed bi ja ligo humon bi ayenu. Hagiga ana kelim le intum, huwo bi libisu gumash tuo al tuwil wa bi kutu homon tihit fi tarabeza, wa huwo bi ja agdim humon. ³⁸ Kan saeed ja fi saa etnin aw saa talata belel, wa ligo humon jahiz, baraka le kudamin del. ³⁹ Lakin afham de, inu iza saeed ta beit arufu saa al harami bi ja, huwo ma bi sibu juwa de bi karabu. ⁴⁰ Kun jahiz kaman, la anu ita ma arufu saa miteen jena insaan bi ja.'' ⁴¹ Butrus kelim, ''Rabunua, ita bi wori misaal de bes le anina, wale kaman le kulu zol?'' ⁴² Rabunua kelim, '' Kan keda munu yau amin wa mudir al negit al Rabuna tuo bi kutu huwo le kudam tanin ashan bi wodi le humon akil fi zaman al saa? ⁴³ Baraka le khadim de al rabuna kan ja bi ligo huwo bi amulu dak. ⁴⁴ Hagiga Ana kelim le inta inu huwo bi kutu fok le hajat tuo. ⁴⁵ Lakin kan kadam kelim fi gelba tuo, 'Saeed tai bi akir wa bada dugu kudam tuo al rujal wa nuswan wa bi akulu wa asorubu wa bi tala sakaran, ⁴⁶ rabuna ta kadim bi ja bi nahar huwo ma mutwaga wa fi zaman huwo ma arufu wa bi gata huwo geta geta wa bi wodi gesma tuo ma ger aminiin ⁴⁷ Kadim dak, arufu irada ta rabuna tuo wa jahizu aw amulu hasab irada tuo, bi dugu ketir. ⁴⁸ Lakin zol al ma arufu wa amulu haja al bi istehik sout, huwo bi dugu ma besit. Lakin aye zol al wodi ketir, min humon bi asalu ketir, wa zol wodi le huwo ketir, al ketir bi asalu min huwo. ⁴⁹ Ana ja ashan bi jada nar fi ard, wa kef ana bi itmna inu huwo kalas wala. ⁵⁰ Lakin Ana indu mamudiya ashan bi amidu, wa ana zalan kef la hadi uwo bi kamilu! ⁵¹ Intum bi fekir ana ja ashan bi jibu salam fi ard? La, Ana bi wori le intum, lakin tegsim. ⁵² La anu min hasa le gidam bi kun kamsa fi wahid juwa__talata nas bi kun ded etnin, wa etnin nas ded talata. ⁵³ Humon bi kun mugesimin abu ded jena wa jena ded abu, uma de beniya wa beniya ded uma, nesiba ded beniya tuo wa biniya ded nesiba tuo.'' ⁵⁴ Yesua kan bi kelim le jumhuur kaman, ''Zaman kan ita ayenu sihaab gum fi garb, tuwale intum bi kelim muturo jayi; fa bi hasil. ⁵⁵ Zaman hawa kan afogu min junub, intum bi kelim, 'bi kun sakana ,' wa bi hasil. ⁵⁶ Ya kazabiin, itakum arufu ferigo manzar tasamawat wa ard, lakin kef intum ma arufu terjimu zaman ta hasa. ⁵⁷ Ma lo intum ma bi hukumu le nufus takum bi hagiga? ⁵⁸ La anu ita kan ruwa ma adu taki gidam ghadi, fi sika hilu mashakil; ma huwo ashan huwo ma bi sugu inta le ghadi, wa ashan ghadi ma bi wodi inta le dabit, wa ashan dabit ma bi jada inta fi sigen. ⁵⁹ Ana kelm le inta, inta ma bi tala bara min inak lahadi inta dafa aker gurush.''