¹ Hasil fi wahid yom inu Yesua kan bi seli fi mahal tani. Wokit huwo kan kalasu, wahid min talamiz tuo kelim le huwo, ''Rabuna, derisu anina salawat ze ma Yuhana derisu talamiz tuo.'' ² v2 Yesua kelim le humon, ''wokit intum bi seli kelim takum, 'Abu, isim taki kede kun kuduus. Kede malakuut taki ja. ³ Wodi le nina rigif ta kulu yom. ⁴ Affi kataya ta nina, ze anina bi affi al amulu bataal le nina. Ma ta shilu anina fi tejiriba.''' ⁵ Yesua kelim le humon, ''Munu min intum indu sabi wa bi ruwa le huwo fi nus belel, wa kelim le huwo, ''Sabi, deinu le ana talata rigif, ⁶ sabi tai ja bes min sika, wa ana ma indu haja ashan bi wodi gidam tuo'? ⁷ Bad dak al fi juwa huwo juwabu huwo kelim, 'Ma ta tabu ana. Bab kalas gofulu, wa iyal tai, ma ana, fi serir. ana ma bi agder gum fok wa wodi rigif le inta.' ⁸ Ana kelim le inta, hata huwo kan ma gum fok wa wodi le inta rigif ashan inta sabi tuo, lakin ashan inta istemir asalu, huwo bi gum fok wa bi wodi le inta rigif ketir ze inta der. ⁹ Ana kaman kelim le intum, asalu bi wodi le intum; fetisu, wa ita bi ligo; dugu, wa bi fatauo le intum. ¹⁰ La anu kulu zol al bi asalu bishilu; wa al bi fetisu bi ligo; wa al bi dugu, bi fatau le huwo. ¹¹ Yatu abu fi nus takum, kan jena tuo asalu samaga, bi wodi le huwo debeba bidal samaga? ¹² aw kan huwo asalu beida, bi wodi le huwo agarab? ¹³ Ashan keda iza kan intum al ashrar arufu wodi hadia kwes le iyal takum, godoor sunu Abu al min sama bi wodi Roho al Kuduus le del al asalu huwo?'' ¹⁴ Hasa Yesua kan bi truju bara shayateen al kan atrash. zaman shitan ruwa bara, zol al kan atrash wonusu, wa kan jumhuur mustagarab. ¹⁵ Lakin juzu ta nas kelimu, ''Ma Beelzebul, hakim ta shayateen, huwo bi turuju bara sahyateen.'' ¹⁶ Tanin jeribu huwo wa asalu min huwo alama min sama. ¹⁷ Lakin Yesua arufu afkar tomon wa kelim le humon, ''Kulu mumlaka gasimu fi nefsa tuo bi demiru, wa beit al gasimu fi nefsa tuo bi waga. ¹⁸ Iza shetan gasimu fi nefsa tuo kef malakuut tuo bi wogif? La anu intum kelim Ana turuju shitan bara bi wasat Beelzebul. ¹⁹ Iza ana turuju shayateen bi wasat Beezebul bi wasat , munu nas al takum bi turuju humon bara? La anu ashan de humon bikun guda takum. ²⁰ Lakin iza ana turuju shayateen bi iden ta Allah, fa malakuut ta Allah ja le intum. ²¹ Zaman zol gowi al huwo musalah bi harisu beit tuo, buda tuo bi kun ameen, ²² Lakin kan zol gowi gilibu huwo, zol al gowi bi shilu daraga al zol indu sigah wa nahabu hajat ta zol de. ²³ Al ma ma ana huwo deed ana, wa al ma limu ma ana bi ferigu. ²⁴ Zaman roho al shirir tala bara min insaan, huwo bi ruwa min mahal al mafi fogo moyo wa bi fetisu raha. wokit huwo ma ligo, huwo bi kelim, 'Ana bi rija le beit tai al ana ja min fogo, ²⁵ 'Wokit huwo rija, huwo ligi beit nedifu wa nezimu. ²⁶ Bad dak huwo ruwa wa jibu ma huwo saba aruwa tanin shirir aktar min huwo wa humon kulu ja geni inak. Bad keda nihaya ta insaan de bi kun bataal min al awel.'' ²⁷ Hasil ze ma huwo kelim hajat del, mara tani arufa sout tuo fok min nas wa kelimu le huwo, ''Baraka le batana al hamilu inta wa baraka le suduur al inta rada.'' ²⁸ Lakin huwo kelimu, baraka le del al bi asuma kalam ta Allah wa bi hafizu.'' ²⁹ Ze ma jumhuur kan bi zidu, Yesua bada kelim, ''jeil de huwo jeil al shirir. bi fetisu alama, hata ma bi wodi le huwo bes alama ta Yonan. ³⁰ La anu ze ma Yonan biga alama le Ninawe, ze de kaman Jena ta isaan bi kun alama le jeil de. ³¹ Maleka ta Junub bi gum fok fi hukum ma rijal ta jeil de wa bi hukumu humon, la anu heya ja min akir ta ard ashan bi asuma hikma ta Suleiman, wa aye, zol kebir min Suleiman al fi hini. ³² Rijal ta Ninawe bi wogif fok fi hukum ma jeil ta nas de wa bi hukumu huwo, la anu humon tub ma bushara ta Yonan, wa ayenu, zol kebir min Yonan huwo hini. ³³ Ma fi zol, bi wala lamba, wa bi dusu aw bi kutu tihit gufa, lakin fok, ashan del al bi dakalu bi ayenu al nor. ³⁴ Ena taki huwo lamba ta gesim. Kan ena taki kwes. gesim taki kulu bi mala ma nor. Lakin kan ena taki bataal, gesim taki kulu bi mala ma duluma. ³⁵ Ashan keda, kun haris inu nor al fogo inta ma duluma. ³⁶ Fa iza gesim kulu maliyan ma nor, mafi tani fogo duloma, biga gesim taki kulu bi kun ze lamba al wala bi lama fogo inta.'' ³⁷ Wokit huwo kalasu wonusu, Firisee asalu huwo ashan bi akulu ma huwo fi beit tuo, fa Yesua ruwa wa geni. ³⁸ Al Firisee kan mustagarab inu Yesua ma kasulu awel gabli ghada. ³⁹ Lakin Rabuna kelimu le huwo, ''Intum, Firiseen bi nedifo cubaya wa zir min bara, lakin dakil intum maliyan ma sharr wa tamma. ⁴⁰ Intum rijal al beleteen! Hal al sala bara ma yau sala al bi dakil? ⁴¹ Wodi le al meskiin haja al fi dakil, wa hajat kulu bi kun nedif le inta. ⁴² ''Lakin bi kun kab le intum Firiseen, la anu intum limu nana wa waja wa bagi gesh ta jinena, lakin intum sibu adala wa muhaba ta Allah. Huwo muhim ashan itakum bi amulu adala wa hibu Allah, bidun waga fi amulu hajat tanin kaman. ⁴³ Woe le intum Firiseen, la anu intum hibu karasi al gidam al fi kenisa wa salam al ma ihteram fi mahal suk. ⁴⁴ Bi kun kab le intum, la anu intum ze turubat al dusu al nas bi doworu min ras tuo humon ma arufo huwo.'' ⁴⁵ Wahid min nas ta ganuun kelimu le huwo, ''Mo alim, haja al ita kelimu de shitima le anina.'' ⁴⁶ Yesua kelimu, ''Woe le itakum, mo alimin ta ganuun! La anu itakum kutu nas tiglla al sab ashan bi shilu, lakin itakum ma bi lemesu tiglla ma wahid min dufur takum. ⁴⁷ Bi kun kab le intum, la anu intum abinu turubat le anbia, wa kan de judud takum yau katulu humon. ⁴⁸ Fa itakum shuhudin wa itakum rudu shokul ta judud takum, la anu sei katulu humo wa intum abinu turubat tomon. ⁴⁹ L e sabab de kaman, hikmma ta Allah kelim, 'Ana bi rasulu le humon anbia wa rusul, wa humon bi azibu wa katulu tanin,' ⁵⁰ Jeil de, bi kun mosul le dom ta anbia al kubo min zaman alam bada, ⁵¹ min dom ta Habil le dom ta Zechariah, al katulu bein mazbah wa bet. Num, Ana kelim le intum, Jeil de bi kun mosul. ⁵² Bi kun kab le intum nas ta ganuun, la nau intum shilu bara muftah ta marifa; intum ma dakalu bi nfsa takum wa intum abosu del al bi dakalu.'' ⁵³ Bad Yesua ruwa min inak, al kataba wa Firiseen aridu huwo wa nagish ma huwo an hajat ketir, ⁵⁴ hawel ashan bi amsuku huwo fi kelimat tuo.