¹ shab ta Israel kulu tala ze rajil whaid, min Dan ila Beersheba wa min Ard ta Gilead, lemo fi kidam ta Yahewa fi Mizpah ² keyadat ta kulu shab ta Gabail ta Israel , rowa fi makan al kulu shab ta Alaa be limo fogo, huwmon 400,000 Rajil al jahez ashaan shakila ma seef. ³ Iyal ta Benjamin asoma gali shab ta Israel rowa fok fi Mizpah. Shab ta Israel kelim , “ wori le anina kalam al batal de hasil keef.” ⁴ laowe , al mara tou katulo de, jowabo, “ana jai la Gibeah fi Ard al tabi le Benjamin, ana wa mara tai ashan be num henak. ⁵ fi belil rojal min Gibeah hajimo ana , huwomon haasiro bet ,wa gasid ashan katolu ana. Huwomon num ma mara tai, wa heya mutu. ⁶ ana shilo mara tai wa gata jisim tou sukeer sukeer, wa rasolo huwomon fi kulu makan al Israel woriso, leano huwomon amolo haja batal wa fasad fi Israel. ⁷ hasa intakom kulu ya shab ta Israel, wodi takon ershad wa nesiha hene. ⁸ Nas de kulu gum ze rajil whaid, wa huwomon kelim, : mafi whid min anina be rowa fi camp tou , wa Kaman mafi min anina be rija fi bet tou! ⁹ lakin has de haja nina ba amolo le Gibean: anina be hajimo huwo ze guura be wori le anina. ¹⁰ anina be shilo ashara rojal minmeagebila, wa anina be shilo mea min alif, wa alif min ashara alif, ashan be geni jahiz le nas de, ashan kan huwomon ja fi Gibeah fi Benjamin, huwomon be agder hokomo huwomon ma moskila al huwomon amolo fi Israel . “ ¹¹ yala rojal ta Israel huwomon lemo be fikra whaid fi medina. ¹² gabail ta Israel rasulo rojal kulu fi gabail ta benjemin, “ wa de katia yato al intakom amolo fi nus takon? ¹³ yala, wodi le nina rojal al batalin ta Gibeah, ashan nina be katulu huwomon, asahn nina be shilo katia de bara min Israel .“ lakin nas ta benjemin ma asoma le sowut ta akwaana toumon, nas ta Israel. ¹⁴ yala iyal ta Benjamin ja sowa fi medina ta Gibeah ashan shakila iayal ta isreal ¹⁵ nas ta Benjamin ja min medina toumon ashan shakila fi yom dak wa sita wa ashrin alif asakir al deribo ashan shakila ma seef. Be edaafa fi sobomea min rojal al aziilo min Gibeah. ¹⁶ wa fi nus ta asakir de fi sobomea rojal al azilo huwom abuu sahmal kulu Whid min huwomon kan loku hajir fi shar ma be jili. ¹⁷ Shab ta Israel , ma hasibu adad min Benjamin, adad 400,000 rajil , al deribo le harb ma seef. Kulu deel rojal ta harb. ¹⁸ Shab ta isreal gum, row fok fi Bethel , asalo Arshad min Alaa . huwomon asalo, “monu be rowa aowel ashan hajimo shab ta Benjamin le anina ?” Yahewa kelim “ Judah be hajimo aowel.” ¹⁹ Iyal ta Israel gum fok fi saaba wa medo camp toumon gerib ma Gibeah. ²⁰ rojal ta Israel rowa bara ashan shakila ma Benjamin fi Gibeah. ²¹ shab ta Benjamin tala bara min Gibeah, wa huwom katolu itnin wa ashrin alif rajil min shab ta Israel fi yom dak. ²² Lakin shab ta Israel gowi nefsa toumon wa kowonu saff ta harb fi nefsa makan al aowel . ²³ bega shab ta Israel rowa wa kori kidam Yahweh lahadi asheya ,asalo Arshad min Yahweh. humon kelim , “ hal anina be rowa hajimo akona ta nina , shab ta Benjamin?” Yahewa kelim, “ hajimo humon!” ²⁴ bega shab ta Israel rowa hajimo jiish ta Benjamin fi yom nimira talata. ²⁵ fi yom nimira itnin, Benjamin tala gabil huwomon fi Gibeah wa huwomon katolu tamantashar alif rajil min shab ta Israel. Huwom kulu min nas al deribo ashan shakila ma seef. ²⁶ Yala kulu shab ta Israel , rowa fok fi Bethel wa henak humon kori kidam ta Yahweh, wa humon suum fi yom dak lahadi ashia, wa humon kedimo zibiah al harago ta salam le Yahweh. ²⁷ Shab ta Israel asalo Yahewa. Wa kan sondok ta ahad ta Alaa kan lisa fi henak. ²⁸ wa phinehas, jena ta Eleazar jena ta Aaron, kan huwomon be akdim fogo “hal keli nina rija ashan shakila akwaana ta nina tani iyal ta Benjamin weli keli nina wogif ashan katolu huwomon?” Yahewa jowabo: katolu huwomon leano bokora ana be gelibo huwomon”. ²⁹ wa shab ta Israel amolo kemin hawiil Gibeah, ³⁰ shab ta Israel huwomon rowa harib ma iyal ta Benjamin le dor nimira talata, huwomon wogif fi Gibeah ze mara alaowel wa itnin. ³¹ Yyal ta Benjamin tala ashaan be shakila ma shab, wa torodu huwomon bara min medina. Huwomon bada katolu bad min shab. Henak fi teletiin rajil min Israel al mutu fi mahal zara wa fi sika.whid sika be rowa fi Bethel, wa tani ila Gibeah. ³² Shab ta Benjamin fekiro gali huwomon intisir ila Israel ze mara alfat, “lakin shab ta Israel kelim keli nina jiri wara wa juru huwomon bara min medina ila sika.” ³³ kulu rojal ta Israel harik min mahalat toumon wa geni fi Baal Tamar, wa Israel amolo kemin min makan toumon min Maareh Gibeah. ³⁴ Ashaara alif rajil min isreal al azilo, wa harib kan shidid, Lakin asakiir ta Benjamin kan ma arof gali haja saab be rowa hasil le humon. ³⁵ Yahweh inticir ila iyal ta Benjamin kidam ta Israel , fi yom dak, shab ta isreal katolu 25,100 rajil min Benjamin. Deel kulu nas al deribu le shakila ma seef. ³⁶ Iyal ta Benjamin arofo gali hazimu huwomon. Kan shab ta isarel rija wara leno huwomon be etimid ala hojiom al mofaja. Huwom endu rojal dooso fi Gibeah. ³⁷ yala rojal al dooso baadon jeiri fi medina ta Gibeah. Huwomon bada shetito wa katolu eyi zol fi medina ma seyouf toumon. ³⁸ kan fi tifagia been rojal ta Israel wa rojal al dooso baadom toumon. yala rojal al dooso de kan be amolo eshara chaas. Huwomon kan be amolo dukan kebir. ³⁹ Laman iyal ta Israel gelibo fi harib iyal ta Benjamin bada doku wa katlu rojal ta Israel adad toumon teletin rojol , leano huwomon kelim: momkin huwomon be hazimo Israel ze harib alaowel . ⁴⁰ laman dokan bada rowa fok min medina iyal ta Benjamin lifo wara toumon wa eynu dukan be rowa le haadi fi samaa min kulu medina. ⁴¹ yala rojal ta Israel lifo, wa rojala ta Benjamin kafo leno huwomon eynu mosiba be ja le huwomon. ⁴² Humon jieri bara min Israel , wa rowa le sahara. Lakin harb wosolu le humon rojal ta Israel tala bara min medina wa katolu humon fi maka al humon be wogif fogo. ⁴³ Rojal ta Israel haasiro Rojal ta Benjamin wa bada torodu huwomon. Huwomo ma sebu le humon raaha. Huwomo hazimo humon fi montika ta sika ta Gibeah. ⁴⁴ tamantasar alif motu min shab ta Benjamin . humon kulu nas ta harb. ⁴⁵ humon lefo wa jeri fi sahara ila hajir Rimmon. Israel agdir katolu khamsa alif min humon fi sika wa humon istemir torodu humon lahadi Gidon,wa henak humon katolu aktar min alif tani. ⁴⁶ kulu asakir ta Benjamin al katolu kan khamsa wa asherin alif min rojal al deribo fi shakila ma seef, huwom kulu nas al ma be kafo harb. ⁴⁷ Lakin sooto mea rajil agdir ashaan jiri ila sahara, ila hajir ta Rimmon. humon geni henak le moda ta arba shahar. ⁴⁸ rojal ta Israel rija wara le iyal ta Benjamin humon katolu shab,kuluwa haiwanat fi kulu medina. humon demero hajat kulu al humon lego , wa Kaman harago kulu medina be nar.