¹ Rujal ta Israel kan halifo fi Mizfat, "Mafi zol min enna bi wodi biniya tou ashan zawjo min Benyameen." ² Baad dak humon gum ruwa le Beatieel wa geni gidam ta Allah lahadi missa, wa ma kore shedid be sout ali. ³ Humon kelimo, "Malo, Yahuwa, Allah ta Israel, haja de bi hasil fi Israel, ino wahid min gabail ta Israel bi woduro alela?" ⁴ Tani yom sabah shaab kan gum sabah bedri wa abino mazbah hinak wa harago zabaih wa zabaih ta salam. ⁵ Shaab ta Israel kelimo, "De yato min gabail ta Israel ma ja fi imajma ta Yahuwa de?" Ashan humon amolo halifa al kebear tou fi kalam ta zol al ma ja fi gidam ta Yahuwa fi Mizfat. Humon kan kelimo, "Bi katulo mait." ⁶ Shaab Israel kan hin le akwana tumon al fadulo min Benyamin. Humon kelimo, "Alela gebila wahid gatao min Israel. ⁷ Muno yao bi le humon nuswan le delin al fadolo, leano enna halifo gidam ta Yahuwa ino mafi zol bi sibo humon zaojo banat tenna?" ⁸ Humon wonoso, "De ya gebila fi Israel ma ja le Yahuwa fi Mozfat?" Kan ligo ino mafi zol ja min Yabish Jilaad. ⁹ Zaman wogifu nas hasab gabail tumon , humon ligo mafi zol ja min nas ta Yabish Jilaad. ¹⁰ Majama de kan rasulo itnasher alf min rujal al gaween be talimat ino, 'Ruwa takum wa katulo nas Yabish Jilaad be seaf, hata nuswan wa iyal. ¹¹ Amolo takom keda: Kulu rajil wa mara al geni ma rajil kede katulo."' ¹² Humon kan ligo orbumia fata fi Yabish Jilaad al ma geni ma rajil, wa shelo humon le majma al fi Shilowa fi Kanaan. ¹³ Majama kulu kan rasulo juwab wa kelimo le shaab ta Benjamin al fi sakhra Rimon shan ja le salam. ¹⁴ Benyamin kan rija wa wodi le humon nuswan ta Yabish Jilaad, lakin nuswan de ma timo le humon. ¹⁵ Humon kan haznanin min haja al hasil le Benyamin, leano Yahuwa amolo ingisam fi nus ta Israel. ¹⁶ Sheyok ta majmaa de kelimo, "Mono bi jibo nuswan le bagi Benjamin al fadulo, ashan nuswan tumon katulo kulu?" ¹⁷ Humon kelimo, Lazim bi hafizo miras ta deal al fadulo min Benyamin, ashan gebila de ma bi wodoro min Israel. ¹⁸ Enna ma bi akeder wodi nuswan le humon min banat tanna, ashan shaab Israel halifo, 'Laana kede kon le ai zol wodi mara le Benyamin."' ¹⁹ Fa humon kelimo, "Intum bi arufo ino fi ihtifal le Yahuwa bi amolo kulu sena fi Shelwa (fi shamal Beatel, sharg ta sika al bi ruwa fug min Beatel le Shakeem, wa junob Lebona)." ²⁰ Humon kan wodi fikra le rujal ta Benyameen, gali, "Ruwa takum wa dusu nefa fi janain. ²¹ Istena takum fi zaman al banat ta Shelwa bi tala ashan alabo, tala takum min jinena wa kulu zol kede shelo mara le nefsa tou min bata ta Shelwa, wa rija takum le ard Benyamin ²² Kan abuhat tumon aw akwana tumon ja wa ishtaki le enne, enna bi kelimo le humon, 'Wori takum raham le enna! Sibo humon geni ashan fi zaman ta harib enne kan ma akider ligo le kulu rajil mara. Intum abreta, leano intum ma wodi banat takum le humon."' ²³ Rujal ta Benyameen amolo ze de. Humon shelo nuswan goduro adad tumon min banat al kan bi alabo wa humon arufa banat dal ashan bi geni nuswan tumon. Humon reja le ard al kan gesimo le humon. Humon rija abino medina tumon wa geni fugu. ²⁴ Baad dak iyal ta Israel sibo mahal dak wa ruwa fi beat, kulu wahid le gebila wa bab tou, wa kulu wahid le mahal al kan gesimo le huwo. ²⁵ Fi zaman daak mafi melik fi Israel. Kulu wahid bi amolo al sah fi ena tou.