¹ Baad ayamat shuiya, fi zaman ta hasad ta dura(Gimih), Samson shilu ghanamayo wa huwo zuru mara tuo huwo kelim fi nefsa tuo”Ana bi ruwa fi jowa ta mara tai, lakin abu ta mara tuo ma rudu ashan huwo bi dakalu ² Abu ta hiya kelim, ana hagigatan fekiru enu inta gi akrahu biniya tai de, ashan keda ana wodi hiya le sabi taki. Fi ukut tuo al sukeir jemil shedid futu hiya hagiga, shilu hiya bedal tuo ³ Samson kelim le homon, hasa ana bi kun brie(Ma indu zamb) iza ka nana katulu phalastineen deel ⁴ Biga Samson ruwa amsuku tultumiya saalab wa Huwo robutu kulu itniin sawa, danaaba ma danaaba. ⁵ Biga Huwo wala nar fir as ta gesh deel, huwo bada turudu saalib deel dura al gi wagif wa dura al gatau kalas fi mahal zaraa. Sawa ma ashjar ta karma wa janem ta zietun ⁶ Phalastineen bada asalu gal”De munu yau amulu haja de?” wori le homon gali, Samson nesieb ta timiteen, Huwo amulu keda ashan timiteen shilu mara ta Samson wodi le sabi tou, biga al phalastineen ruwa haragu hiya wa abu tuo ⁷ Samson kelim le homon, kan de yau haja al intum amulu ana bi integim min intum wa baad keda, ana kalas bi wogif, ⁸ Biga Huwo gata nas deel gita gita, kuraa wa laham ta kuraa maa ketil shedid biga Huwo le tehet wa iesh fi dakil jebel fie tam ⁹ Biga al phalestineen jaa geni fi yahudiya wa mala fi lehi ¹⁰ Biga ruja al fi yahudiya kelim, malu intum jaa deed nina?” humon kelim, nina jaa ashan bi amsuku Samson wa nina deeru amulu le huwo ze ma huwo amulu le nina ¹¹ Biga talata alf min rujal ta yahudin lahadi tehet jebel ta etal, wa humon kelim le Samson, hal inta arufu inu phalestineen deel humon yau gi hakimu nina? De shunu al inta amulu le nina de? Samson kelim le humon”humon bada amulu le ana ashan kida ana dafa le humon” ¹² Humon kelim le Samson,”Nina jaa ashan bi robutu inta wa wodi inta le idan ta phalestineen”, Samson kelim le homn, halifu takum le ana gal intum ma bi katulu ana ma iden takum” ¹³ Humon kelim le huwo, La nina bes bi robutu inta bi hubal wa nina bi wodi inta le homon. Nina bi waadu inta nina ma bi katulu inta. Biga humon robutu huwo bi itniin hubal al jedid wa humon tala Huwo min jebel ¹⁴ Zaman huwo wosulu fi lehi, phalestineen bada kore ma soot shedid wokit homn ainu huwo, yala ruhu ta yahwah nezil be gowa le huwo- hubal al robutu ma iden tuo de biga ze kheit al haragu, wa humon waga bara min iden tuo ¹⁵ Samson ligu adom ta kasma ta humar al lisa ma afiin wa bada shilu wa huwo katulu alfi rujal ma haja de ¹⁶ Samson kelim”Bi adom ta kasma ta humar, laham ta kura fok laham ta kura, bi adom ta kasma ta humar ana katulu alfi rujal, ¹⁷ Zaman Samson intaha min kalam tuo, huwo jadau adom ta kasma ta humar de bara wa huwo bada nadi mahal de Ramat lehi, ¹⁸ Samson kan biga atshan shedid wa huwo bada kore le yahwah wa kelim, inta wodi Intisar al azim del le khadim taki-lakin hasa ana gi ruwa waga fi iden tan as al ma taharu deel? ¹⁹ Allah gesimu wa fata mahal fadi fi lehi wa moyo bada nezil, zaman huwo ashrab, guwa tuo rejaa tani wa Huwo biga hai. Biga Huwo nadi isim ta mahal de En Hakkore, wa mahal de lisa fii fi lehi hata al yom, ²⁰ Samson hakumu ghadi ta Israel fi zaman ta phalestineen le mudat ishriin sena.