¹ Biga jerub baal(Al howo Gideon) gum fi sabah bediri, wa kulu nas al kan ma howo, homon dugu khemat tomon fi mahal isim tuo harod wan as midian dugu khemat tomon kan fi shamal tomon fi kariya gerib ma wadi al fi jebel ta moreh, ² Rabuna kelim le Gideon, asakir taki de ketir ashan keda ana ma bi wodi le inta nusra did nas midianiin, ashan iyal ta Israel keli ja dala gal nina kalisu nufus ta nina bi guwa ta nina, ³ Hasa de, kelimu fi adana tan as inu, kulu zol al gi kafu wa gi rugus, keli howo reja wa ruwa min jebel ta gilead biga 22,000 nas eja wara, wan as al fadulu 10,000. ⁴ Rabuna kelim le Gideon, nas del lesa ketir, silu homon fi moya wa hinak ana bi nagisu adad tomon le inta, iza ka ana kelim zol de bi ruwa ma inta, howo bi ruwa wa iza kan ana kelim zol de ma bi ruwa howo ma bi ruwa, ⁵ Biga Gideon jibu nas de fi mahal ta moya wa rabuna kelim le howo, tala bara ai zol al gi alasu moya ze kelib yau gi alasu min nas al dengiri tehet wa gi asharab, ⁶ Nas al alasu moya, homon zoo biga nas del kulu dengiri tehet wa ashrab moya, ⁷ Rabuna kelim le Gideon be 300 rujal al alasu moya de, ana kalisu intum wa ana bi wodi le intum nusura did midianiin, wa biga nas del keli kulu wahid reja fi mahal tuo, ⁸ Biga nas al azilu del homon limu limu hajat tomon wa buruji tomon. Gideon rasulu kulu rujal ta Israel, kulu zol fi beit tou lakin howo sibu 300 rujal wa kan mahal tan as midian kan tehet jambu howo fi wadi, ⁹ Wa biga fi bilel dak rabuna kelim le howo gum ruwa kum hajimu midianiin, leanu ana bi wodi le inta nusura did homon, ¹⁰ Lakin iza kan inta gi kafu ashan bi nezil tehet, nezil tehet fi mahal tan as del ma purah khadam taki, ¹¹ Wa asuma le kalam al homon gi wonusu, wa inta bi ligo gowa ashan bi hajimu homon, biga Gideon ruwa ma khodam tou purah, tehet fi mahal ta huras ta khem, ¹² . Midianiin, amale kiin wa kulu nas al fi sherik ja geni tataf, wadi homon ketir ze jarat. Jumal tomon ma bi agdeer edu/hasibu adad tomon ketir min rumla al araf bahar, ¹³ Zaman Gideon wosulu hinak, howo ligo zol tani gi haki helim le sabi tou. Zol de kelim, ana indu helim, wa ana ainu es/rekef ta sheriya gi waga fi khema tan as midian. Howo ja fi khema wa howo dugu khema de shedid kalis lahadi ma khema de waga tehet, wa gelibu ras min tehet le fok, ¹⁴ Yala biga fi zol tani kelimu de ma iz zol tani ila de seaf ta Gideon jena ta joash, rujul Israel. Rabuna wodi le howo wa jesh tou nusura did midianiin. ¹⁵ Wa zaman Gideon asuma khabar wa tefsir ta helim de, howo dengiri tehet wa abidu rabuna, howo reja wara fi khema ta Israel wa kelim gum kun fok! Rabuna wodi le intum nusra did jesh ta midian, ¹⁶ Howo gesimu 300 jesh de ila talata mujmu wa wodi le homon kulu gurun ta bagara wa jakat fadi wa batariya fi kulu dakil jak ¹⁷ Howo kelim le homon, ainu takum le ana wa amulu kum haja al anan amulu, ainu fi zaman al ana ja fi taraf ta khema, intum lazim kheli amulu haja al ana amulu, ¹⁸ Fi zaman al ana afuku gurun ta koruf, ana wa kulu nas al ma ana, keli intum Kaman afuku gurun ta koruf hawi kulu mahalat ta khema, wa kore kore takum kelim le rabuna wa le Gideon. ¹⁹ Biga Gideon wa 300 rujal al kan ma howo ja fi taraf ta khema tuwali fi mahal al awel al fin us al huras gi geni fogo de, bes fi zaman al midianiin gi geiru huras, homon afuku gurun ta koruf, wa kasuru jakat al kan fi iden tomon, ²⁰ Mujumuat al talata de afuku gurun ta koruf wa kasuru jakat tomon. Homon amsuku batoriya de fi iden tomon ta shamal wa gurun ta koruf fi iden ta homon yemin ashan homon bi afuku homon kore fok, seaf ta rabuna wa ta Gideon, ²¹ Kulu zol wegif fi mahal tou fi khema wa jesh ta midianiin kulu jere, homon kore wa jere, ²² Zaman homon afuku 300 gurun ta koruf, rabuna geru kulu seaf ta midianiin did zemil tou wa kulu jesh tomon, ashakir de jere fib eth shittah wa fi zererah wa lahadi hudud ta abel meholah, gerib le tabbath, ²³ Biga iyal ta Israel limu kulu min Naphtali, asher wa kulu Manasseh nadi homon wa homon ruwa wara midian, ²⁴ Gideon rasulu kabara le kulu nas al fi jebel ta sphrah gi kelimu le homon inu keli homon hajimu midian wa keli homon silu musuliya ta nahar moya ta Jordan wa lahadi fib eth barah, ashan bi wogif homon, yala biga kelim le kulu rejal ta epharah ashan bi shilu musuliya ta moya wa lahadi beth barah wa nahdr ta Jordan, ²⁵ Humon gobudu/amsuku itniin amir ta midianiin. Oreb wa zeeb homon katulu oreb fi hajer ta oreb, wa homon katulu zeeb fi mahal ta zeeb ta amulu mushrub tae nab, homon ruwa wara nas midianiin, wa homon jibu ras ta oreb wa zeeb le Gideon al kan howo be hinaak le Jordan.