¹ Yahwa kelimu le Musa, ''Kata etnin lawhat min haja ze lawhat al awel. Ana bi katibu fogo lawhat del kelimat al kan fi lawhat al awel, al lawhat al inta kasuru. ² Kun jahiz fi sabah wa taal fok fi jebel Sinai, wa gedimu nefsa taki hinak le ana fok jebel. ³ Ma fi zol bi ja ma inta. Ma ta sibu aye zol tani kede ayenu fok jebel. Ma fi korufan aw haiwanat bi sugu gedam ta jebel. ⁴ ''Fa Musa gat etnin lawhat min hajar ze lawhat al awel, wa huwo ruwa fok bedri fi sabah wa tala fogo jebel Sinai, ze Yahwa kan kelimu lw huwo. Musa shilu lawhat al kin hajar fi edan tou. ⁵ Yahwa nezil tihit fi sihaab wa wogif ma Musa hinak, wa huwo nadi al isim ''Yahwa. '' ⁶ Yahwa kan ruwa mi gedam tou wa alinu, ''Yahwa, Yahwa, Allah al rahamn wa kerim bati al zalan, wa sabit fi muhaba wa amana, ⁷ bi hafizu muhaba tou al sabit le alaf, bi afi ''iithm, mukhalafa, wa katiya. Lakin huwo bi aye teriga bi nedifu al galat. Huwo bi jibu eiqab le katiya ta abuhat fogo iyal wa iyal ta iyal ze kaman jiel al tallit wa al rabe.'' ⁸ Musa deri denger tihit wa abidu ⁹ Yalla huwo kelimu, ''Kan hasa ana ligo neima fi uyuun taki Rabuna tai, malish ruwa fi nus tanina, leanu nas de ragabta toumon gowi. afi iithm ta nina wa katiya ta nina, wa shilu anina ze mirath taki.'' ¹⁰ Yahwa kelimu, ''Ayenu, ana gerib ruwa amulu itifaqia. Gedam nas taki kulu, Ana bi amulu muejazat al ma amulu fi kulu ard aw fi aye beled. Kulu nas fi nus takum bi ayenu amayiel tai, leanu huwo haja al bi kowufu de al ana bi amulu le inta. ¹¹ ihtaramu takum haja al ana wori le intakum alela. Ana gerib bi lizu Amoriean, Canaaniean, Hitisiin, Perizziin Hivitiin wa Jebusitiin bara min gedam takum, ¹² Kun haris ma ta amulu itifaqia ma muatin ta ard al inta bi ruwa fogo, aw huwomon bi kun sharak fi nus takum. ¹³ Lakin, intakum kede kasuru bara mazbaha toumon, demiru takum amida toumon, wa gata takum amud alssawari. ¹⁴ Leanu intakum ma bi abidu allah, tani leanu, Yahwa al isim tou ghuyur, huwo Allah al ghuyur. ¹⁵ Fa kun haris ma ta amulu itifaqia ma muatin ta ard, leanu huwomon amulu zina le aliha toumon, wa huwomon gedimu zebeha le aliha toumon. ¹⁶ Biga wahid min huwomon bi azimu inta wa inta bi akulu min zebeha tou, wa hata inta bi shilu bad min banat tou le iyal takum wa banat toumon amulu le aliha toumon wa huwomon bi kutu iyal amulu zina le aliha toumon. ¹⁷ Ma takum kutu nufus takum hadid al bi sihi. ¹⁸ Inta bi hafizu al eyd ta alfatir Ze Ana amiru intakum, Intakum bi akulu rigif bidon kamira le saba ayam fi zaman sabit fi shar ta Abib, leanu huwo kan fi al shar ta Abib de inta tala bara min Mesir. ¹⁹ Kulu bikir del tai, hata dhakar ta bikir ta haiwanat, kan min korufan wala galamayat. ²⁰ Itakum bi hariru al bikir ta humar ma koruf, lakin kan itakum ma biu huwo wara, biga intakum bi kasuru ragabta tou. Itakum bi haririu kulu bikir ta iyal takum. Mafi zol bi beinu gedam tai edan fadi. ²¹ Itakum bi ishtal fi sita ayam, lakin fi yom al sabe itakum bi akud raha. Hata fi zaman ta zira wa hasad, itakum bi akud raha. ²² Itakum kede lahizu eyd ta usbo ma intaj ta game ta hasad, wa intakum bi lahizu al eyd ta tajmie fi nihaya ta sena. ²³ Talat marat fi sena kulu rijaal takum bi beinu gedam ta Rabuna Yahwa, Allah ta Israel. ²⁴ Leanu ana bi lizu umam gedam takum wa ana bi wassae hudud takum Ma fi zol bi kun indu nia ashan bi shilu ard btakum ze toumon wokit kan intakum ruwa beinu gedam ta Yahwa Allah takum talata marat fi sena. ²⁵ Inta ma bi gedimu al dom ta zebeha tai ma aye kemira, wala aye laham min zebeha fi eyd ta alfasah bi sibu wara le sabah. ²⁶ Itakum bi jibu simar al kwes min mahal zira takum le juwa tai. Itakum haragu galamaya al soker al lisa bi rada.'' ²⁷ Yahwa kelimu Musa, ''Katibu tihit kelimat del leanu hasab kelimat del Ana amulu itifaqia ma inta wa Israel; ²⁸ Musa kan hinak ma Yahwa le arba ayam wa belel; huwo ma akulu aye akil wale asurubo aye moyo. Huwo katibu fi lawhat al kelimat ta itifaqia, al ta wosia al ashara. ²⁹ Zaman Musa ja tihit kin jebel Sinai ma etnin lawha ta karar ta itifaqia fi edan tou, huwo ma arufu inu jilid tou bi wala wokit kan huwo bi kelim ma Allah. ³⁰ Zaman Haron wa Israelien ayenu Musa, al jilid ta wosa tou kan bi wala wa huwomon kan khayifin ashan bi ja gerib ma huwo. ³¹ Lakin Musa nadi huwomon, wa Haron wa kulu qada ta mujtamae ja le huwo. Yalla Musa wonusu ma huwomon. ³² Bad de, kulu nas ta Israel ja le Musa, wa huwo wori le huwomon kulu wasaya al Yahwa wodi le huwo fok jebel Sinai. ³³ Zaman Musa kalasu wonusa ma huwomon, huwo kutu hijab fogo wosa tou. ³⁴ kullama kan ruwa gedam ta Yahwa ashan bi wonusu ma huwo, huwo bi shilu al hijab, hata huwo bi tala bara. Zaman kan huwo ta;la bara, huwo bi kelim le Israelien haja al wori le huwo ashan bi kelimu. ³⁵ Zaman Israelien ayenu wosa ta Musa bi wala, huwo bi kutu hijab fogo wosa tou tani mara hata huwo bi rija wara ashan bi wonusu ma Yahwa.