¹ Yalla Yahwa wonusu le Musa, ''Ruwa min hini, inta wa nas al inta tala bara min ard ta Mesir. Ruwa le ard al ana halifu mao le Abraham, le Ishak wa le Yakub, zaman ana kelimu, 'Ana bi wodi huwo le iyal ta iyal taki; ² Ana bi rasulu malaika gedam taki, wa ana bi bara al umam, Amoruean, Hittiean, Perizziin, Hivitiin, ma Jebusitiin. ³ Ruwa le ard al bi kubo leben wa asel, lakin ana ma bi ruwa ma inta, leanu intakum nas al ragabta takum gowi. Ana bi demiru inta fi sika.''' ⁴ Zaman nas asuma kelimat ta mashakil del, huwomon kore, wa mafi libisu fogo huwo aye silsila. ⁵ Yahwa kelimu le Musa, ''Kelimu le Israelien, Intakum nas al ragabta takum gowi. Kan ana ruwa fi nus takum hata fi lahza wahid bes, Ana bi demiru inta. Fa hasa shilu bara silsila taki ashan ana bi kariru sunu ana bi ma inta. ''' ⁶ Fa Israelien ma libisu silsila min jebel Hored min wokit dak le gedam. ⁷ Musa shilu kaima wa jada bara muaskar, masafa min muaskar. Huwo nadi kaima ta ijtema. Kulu wahid al asalu Yahwa ashan aye haja wa ruwa bara le kaima ta ijtema, bara min muaskar. ⁸ Zaman Musa kan ruwa bara le kaima, kulu nas bi wogif fok fi bab ta kaima wa bi ayenu le Muas lahadi huwo bi dakalu juwa. ⁹ kullama kan Musa dakalu le kaima, amud ta sihaab bi jaa tihit wa bi wogif fi bab ta kaima, wa Yahwa bi wousu ma Musa. ¹⁰ Kullama kulu nas ayenu al amud ta sihaab wogif fi baba ta kaima, huwomon bi gum fok wa abidu, kulu zol fi bab ta akaima tou. ¹¹ Yahwa bi wonusu le Musa wosa bi wosa, ze zol bi wonusu le sabi tou. Yalla biga Musa bi rija le muaskar, lakin kadim tou Joshua jena ta Nun, al soker bi fi kaima. ¹² Musa kelimu le Yahwa, ''Ayenu, inta kan bi kelimu le ana, Shilunas del fi safar; lakin inta ma sibu ana arufu munu al inta bi rasulu ma ana. Inta kelimu, 'Ana arufu inta ma isim, wa inta kaman ligo neima fi uyuun tai; ¹³ Hasa kan ana ligo neima fi uyuun taki wori le ana sikaat taki ashan ana bi arufu inta wa bi istermir ligo neima fi uyuun taki. Zekir inu uma de huwomon nas taki. '' ¹⁴ Yahwa juwabu, ''Wujud tai bi ruwa ma inta, wa ana bi wodi le inta raha. ¹⁵ ''Musa kelimu le huwo, ''Kan wujud taki ma ruwa ma anina, ma ta shilu anina min hini. ¹⁶ wa''illa kef bi arufu inu ana ligo neima fi uyuun taki, Ana wa nas taki? ma bes asham kan inta ruwa ma anina fa keda ana wa nas taki barao min nas tanin al fi wosa ta ard?''' ¹⁷ Yahwa kelimu le Musa, ''Ana bi kaman bi amulu haja de al inta asalu, leanu inta ligo neima fi uyuun tai, wa ana arufu inta ma isim. ¹⁸ ''Musa kelimu, ''Malish wori le ana mejid taki.'' ¹⁹ Yahwa kelimu, ''Ana bi amulu kulu kwes bi ruwa gedam taki, wa Ana bi alinu isim 'Yahwa gedam taki. Ana bi kun kerim le del al ana bi kun kerim, wa ana bi beinu rahama fogo del al ana der beinu rahama.'' ²⁰ Lakin Yahwa kelimu, ''Inta ma bi ayenu wosa tai, leanu mafi zol bi ayenu ana wa bi kun hay.'' ²¹ Yahwa kelimu, ''Ayenu, hini de yau mahalbi wasat ana; inta bi wogif fi hajar de. ²² Zaman al mejid tai bi rmururu, Ana bi kutu inta fi shaqq ta hajar wa kati inta ma edan tai lahadi Ana bi mururu. ²³ Biga Ana bi shilu bara edan tai, wa inta bi ayenu dahar tai, lakin wosa tai inta ma bi ayenu,''