¹ Fi shahar nimir talata baad ma shaab ta Israel tal bara min wata ta Masir, fi nefsu yom dak, humon ja fi sahra ta sina. ² Baad ma humon ruwa min refidin humon wosulu fi sahra ta sina, humon dugu kema fi sahra gidam jebel. ³ Intakum aynu sunu al ana amulu le Masrin, ⁴ kef ana arfau intakum be jinah ta sogur wa ana jibu intakum le nefsa tai. ⁵ Hasa biga, kan intakum bi amulu wa bi asuma le sot tai wa hafisu tifagiya tai, biga intakum bi kun nas tai al kas min kulu nas, ashan dunia kulu tai. ⁶ Intakum bi kun mamlaka ta kahana wa shaab mukadas, le ana de yau kelimat al kede inta wonusu le shaab ta Israel.” ⁷ Biga Musa ja nadi shiuk ta shaab. Huwo biga wori gidam tomon kulu kelimat al Yahwa amiru humon. ⁸ Kulu shaab juwabu sawa gali, “nina bi amulu ai haja al Yahwa yau kelim.” Kaman Musa ja ashan bi wori kalam ta shaab le Yahwa. ⁹ Yahweh kelim le Musa, “ana bi ja le intakum fi sihab duluma ashan kede shaab asuma kan ana bi wonusu ma inta wa Kaman humon bi sedge intta kulu kulu,” biga Musa wori kalam ta shaab del le yahweh. ¹⁰ Yahweh kelim le Musa, “Ruwa le shaab. Alela wa kukura lazim kede inta ferigu humon le ana, wa kede humon kasulu gumasat tomon. ¹¹ Kun jahiz le yom nimira talata, ashan fi yom nimira talata hinak Yahweh bi ja tehet fi jebel sina. ¹² Inta lazim kede kutu hudud le shaab haul jebel de kulu. Wori le humon, “amulu hisab takum kede intakum ma ruwa arkab fok fi jebel wa kede intakum ma habisu hudud bito. Al bi lemesu jebel de hagiga kida bi katulu; ¹³ Mafi idan ta ai zol bi lemesu shikil zol de. Lakin, bi falagu au bi durubu, sala kan huwo biga shunu, haywan au zol, ma bi hai. Wokit buruji bi afuku buri towil, humon lazim kede ja fok fi kura ta jebel.” ¹⁴ Biga Musa gum nezil tehet min jebel le shaab. Huwo bada ferigu shaab le Yahweh wa humon kasulu gumasat tomon. ¹⁵ Huwo kelim le shaab, “geni takum jahiz le yom nimira talata; mata takum ruwa gerib ma nusuwan takum” ¹⁶ Fi yom nimira talata, be sabah hasil sot ta saga dugu wa wala wa sihab tala duluma fi jebel, wa sot ta buruji afuku shedid. Kulu shaab al fi juwa kema rogus wa kafu. ¹⁷ Musa gum talau shaab kulu bara min kema ashan bi gabil ma Allah, wa humon wogif fi kura ta jebel. ¹⁸ Jebel sina kati kulu be dukhan ashan Yahweh nezil fogo be nar wa dukhan. Dukhan dak kan bi gum fok ze dukhan ta furun, wa jebel kulu kan bi rogus. ¹⁹ Wokit biga sot ta buruji bi zidu ziyad, Musa wonusu, wa Allah Juwabu huwo be sot. ²⁰ Yahweh ja fi jebel sina, lahadi fok fi ras jebel, wa nadi Musa fok, Musa gum ruwa fok. ²¹ Yahweh kelim le Musa, “anzil tehet wa wodi inzar le shaab; kede humon ma hawil ashan bi aynu Yahweh. Wa ketir min humon bi mutu. ²² Kaman kede kahana al bi ja le ana gerib hini de wasa beid wa jahizu gisin tomon le ja tai ashan ana kede ma gilibu did humon.” ²³ Musa kelim le Yahweh, “shaab del ma bi agder ja fok fi jebel sina, ashan inta wodi talimat le nina: “kede kutu hudud haul jebel bes le Yahweh” ²⁴ Yahweh kelim le huwo, “Anzil tehet wa jibu Harun fok hini ma inta, lakin mata sibu kahara wa shaab ashan bi kalifu wa bi ja le Yahweh fok hini, an Huwo bi gilibu did humon” ²⁵ Biga Musa rija tehet wa wonusu ma shaab.