¹ Yasrun, kahin ta midian, nesib ta musa, asuma be kulu hajat al Allah amulu ma Musa wa le Israel shaab bito. Huwo asuma gali Yahwa talau Israel bara min Masir ² Yasrun nesib ta Musa rizau safura, mara ta Musa, baad ma kan huwo rasulu fi bet. ³ Wa iyal bito kulu itnin awlad; isim ta wahid woled kan Gershom, ashan kan Musa kelim, Ana kan ajnebi fi wata garib” ⁴ Wa isim ta woled tani de kan Eliezer, ashan Musa kan kelim, “Allah ta nas jido tai kan yau bi saudu ana huwo talau ana min sef ta Faraun” ⁵ Yasrun, nesib ta musa ja ma iyal ta Musa wa mara ta Musa le Musa hinak fi sahra fi mahal al huwo dugu kema bito fogo fi Jebel ta Allah. ⁶ Huwo kelim le Musa, “Ana, nesib taki Yasrun, ana bi ja le inta be mara taki wa iyal bito itnin,” ⁷ Musa gum tala bara wa alagu nesib bito, huwo dengiri fi wata, wa amulu busa le huwo. Humon aslu ahwal tomon kulu sawa wa humon dakalu fi juwa kema. ⁸ Musa gum haki le nesib bito kulu hagat al Yahwa amulu le Faraun wa masrin be sabab ta Israel, wa be kulu zuruf al humon ligo fi sika, wa kef Yahweh saudu humon. ⁹ Yasrun tala mokosut be kulu hajat al kuwes al Yahwa amulu le Israel, wa al huwo alagu humon min idan ta Masrin. ¹⁰ Yasrun kelim, “kede mejidu yahwa, ashan huwo talau intakum min idan ta Masrin wa idan ta Faraun, wa talau shaab min idan ta Masrin. ¹¹ Hasa ana arufu gali Yahwa kebir futu kulu aliha, ashan wokit Masrin kan bi azibu Israel shedid, Allah ja alagu shaab bito” ¹² Yasrun, nesib ta Musa jibu hadiyat wa zebiha al haragu le Allah. Harun wa kulu shiuk ta Israel ja ashan bi akulu gidam ta Allah sawa ma nesib ta Musa. ¹³ Wa fi yom al Baadu Musa geni tehet ashan bi hukumu shaab. Shaab wogif haul huwo min sabah lahadi misa ¹⁴ Wokit nesib ta Musa aynu kulu hajat al huwo amulu le shaab, huwo kelim, “de shunu al inta bi amulu le shaab del? Le inta bi geni barau wa kulu shaab bi wogif le inta min sabah lahadi misa?” ¹⁵ Musa kelim le nesib bito, “shaab del ja le ana ashan bi asalu irshad ta Allah. ¹⁶ Kan humon indu shokuwa humon bi ja le ana. Ana bi karir bein wahid zol wa tani, wa ana ashan bi alimu humon kalamat wa gawanin ta Allah.” ¹⁷ Nesib ta Musa kelim le huwo, “inta bi amulu haja al ma kuwes. ¹⁸ Inta bi taabu gisim taki, inta ma kulu nas taki. Humon de tegil kalis le inta ma bi agder ishtakel barau be nefsa taki. ¹⁹ Asuma le ana. Ana bi wodi le inta irshadat, wa Allah bi kun ma inta, ashan inta bi mesil shaab del gidam ta Allah wa inta jibu shokuwat tomon le huwo. ²⁰ Lazim kede inta alimu le humon kalamat wa gawanin bito. Lazim kede inta wori le humon bi amulu. ²¹ Ziyada min kida, kede inta lazim hazilu min kulu shaab del nas al bi agder saudu, nas al bi ihterimu Allah, nas ta Hagiga al bi aba zulumu. Lazim kede inta arfau humon fok le shaab del, humon bi kan kaid wa mosulin le alaf, miyat, kausinat wa asharat. ²² Humon bi hukumu shaab fi kulu mashakil al bi hasil tuwali, lakin mashakil al gowi humon bi jibu le inta. Ze ma kulu mashakil al suker, humon bi agder hilu fi baad tomon. Be teriga de bi kun sahil le inta, wa humon bi arfau humula sawa ma inta. ²³ Kan inta amulu zede, wa kan Allah amiru inta ashan bi amulu zede, biga inta bi agder gum, wan as kulu bi agder ruwa fi bet be salam.” ²⁴ Musa biga asuma be kalam ta nesib bito wa amulu ai haja al huwo kelim. ²⁵ Musa gum hazilu nas kuwesin min Israel wa kutu humon fok le shaab, kaid mosulin le alaf, miyat, kamsinat, wa asharat. ²⁶ Kulu zaman human bi hukumu shaab be teriga kuwes wa besit. Mashakil al gowi. Humon bi jibu le Musa, wa lakin humon fi baad tomon bi hukumu mashakil al suker. ²⁷ Baad dak musa sibu nesib bito ashan bi ruwa, wa Yasrun rija wara le wata bito.