¹ Allah wonusu kulu kelimat del: ² “ana yau Yahwa Allah taki, al talan inta bara min wata ta Masir, bara min bet ta sokol kadam ³ Kede inta ma indu Allah tani gidam tai. ⁴ Mata salau le nefsa taki saram wole surs ta haya min hajat al fi sama fok, wole al fi wata tehet, wole al fi juwa moyo tehet, ⁵ Inta lazim kede ma dengir tehet le hajat del wa mata seli le humon, ashan ana yau bes Yahwa Allah taki. Ana Allah ta gira. Ana azibu shokol deif ta judud takum be jibu ikab le iyal iyal, lahadi jil nimira talata wa arba le del al bi abau Ana. ⁶ Lakin ana bi beinu muhaba tai al sabit le alaf ta nas al bi hibu ana wa bi hafisu talimat tai. ⁷ Kede inta lazim ma shilu isim ta Yahwa Allah taki, sambala, ashan ana ma bi sibu zol al bi shilu isim tai sambala. ⁸ Zekiru yom al mukadas, ashan bi kun bes le ana. ⁹ Inta lazim bi ishtakal wa amulu hajat taki fi sita yom. ¹⁰ Lakin yom nimira saba bi kun yom mukadas le Yahwa Allah taki. Inta lazim ma bi amulu ai shokol fogo, inta au jena taki, au biniya taki, wole kadam taki al rujal au kadam taki al nusuwan, wole ganamayat taki. Wole nas ta bara al ja fi juwa abuwab taki. ¹¹ Ashan fi sita ayam Yahwa salau samawat wa dunia, wa bahar, be kulu hajat al fogo, wa huwo akudu raha fi yom nimira saba. Ashan kida Yahwa bariku wa kutu yom nimira saba mukadas. ¹² Ihterimu abu taki wa uma taki, ashan inta bi geni zaman towil fi mahal al Yahwa Allah taki bi wodi le inta. ¹³ Mata katulu ai zol ¹⁴ Mata amulu zina ¹⁵ Mata seregu ¹⁶ Mata kun shuhud ta kidib al bi wonusu kidbi le jeran taki. ¹⁷ Kede niya taki ma waga fi bet ta jeran taki: Kaman niya taki kede ma waga fi mara ta jeran taki, wa Kaman fi kadamin bito al rijal wa al nusuwan, wole fi tor bito, wole himar bito, wole fi ai haja ta jeran taki. ¹⁸ Shaab kulu aynu nur wa asuma sot ta saga, wa aynu jebel bi tala dukhan. Wokit shaab aynu kida, humon kala wa wogif mia beid. ¹⁹ Humon kelim le Musa, “wonusu le nina, wa nina bi asuma; lakin mata sibu Allah kede wonusu le nina, nina bi mutu.” ²⁰ Musa kelim le shaab del, “matakum kafu, ashan Allah jaw a bi jeribu intakum wa ashan kafu bito bi kun fi intakum, wa ashan kede intakum ma amulu katiya,” ²¹ Biga shaab wogif beid, wa Musa ja gerib le dabab al Allah fi fogo de. ²² Yahweh kelim le Musa, “de yau al lazim kede inta wori le shaab ta Israel: “inta aynu be nefsa taki ana wonusu le inta min sama. ²³ Kede intakum ma salau rabunat tannin ma ana le intakum, rabunat ta fida wa rabunat ta dahab ²⁴ Salam takum le ana mazbah min turab, wa lazim kede intakum haragu fogo zebihat takum, wa zebihat ta limu takum al kuwes, ganamayat takum wa bagarat takum, fi ai mahal al bi kafu isim tai fogo, ana bi ja le intakum wa bi bariku intakum. ²⁵ Kan intakum salam le ana mazbah be hujar, kede ma abinu wa kede gatau hujar del, ashan kan intum istamilu fogo afasat ta shokol, bi tala nijis. ²⁶ Intakum kede ma nutu fi mazbah tai be silim ashan fadiya takum kede ma beinu.”