¹ Shaab rahalu min Elim, wa kulu mujtama ta shaab ta Israel ja fi sahra ta sin, al waga beina Elim wa sina, fi yom kamistashar ta shahar Nimira itnin baad ma humon gum min wata ta masir. ² Kilu mujtama ta shaab Israel amulu shokuwa did Musa wa Haun fi Shahra, ³ Shaab ta Israel kelim le humon, “kan bes kede nina mutu be idan ta Yahwa fi wata ta masir wokit kan nina be geni fi gurmat ta laham wa nina kan sabanin be akulu ess. Inta ja tala nina bara fi sahra de ashan bi katulu mujtama ta nina de be jiyan.” ⁴ Biga Yahwa kelim le Musa, “Ana bi kubu ess min sama le intakum. Shaab bi ruwa bara wa bi legetu godur ta yom kulu yom lahadi Ana bi Jeribu humon wa bi aynu kan sei humon bi dowuru fi ganun tai wele la. ⁵ Biga bi ja fi yom nimira sita, humon bi bada legetu dobul min al kan humon bi legetu kulu yom, wa humon bi rakabu hajat al humon jibu juwa.” ⁶ Biga Musa wa Harun kelim le shaab ta Israel del kulu, “fi misa badin intakum bi arufu gali Yahwa yau talau intakum bara min wata ta Masir. ⁷ Fi sahah intakum bi aynnu mejid ta Yahwa, ashan huwo asuma shokuwa takum did huwo. Nina shunu le intakum lahadi intakum bi gedimu shokuwa did nina?” ⁸ Musa Kaman kelim, “intakum bi arufu de kan yahwa wodi le intakum laham fi misa wa ess fi sabah wa intakum shabanin ashan huwo asuma shokuwat al intakum wonusu wonusu did huwo. Del Harun wa ana? Shakuwat takum ma did nina; lakin did Yahweh.” ⁹ Musa kelim le Harun, “wori le mujtama ta shaab Israel del kulu, taal takum gerib gidam Yahwa, ashan huwo kalas asuma shokuwat takum.” ¹⁰ Biga hasil wokit Harun bi kelim le kulu mujtama ta shaab Israel, humon gum aynu fi safa ta shara, wa biga mejid ta Yahwa gum beinu fi sihab. ¹¹ Biga Yahwa bada wonusu le Musa gali, ¹² Ana asuma shokuwat ta shaab ta Israel, wori le humon gali, “fi misa intakum bi akulu laham, wa fi sabah intakum bi mala be ess, wa intakum bi arufu gali Ana yau Yahwa Allah takum”. ¹³ Wa fi misa salwa mala mahal al humon bi geni fogo de wa fi sabah nada kubu hauli mahal tomon de ¹⁴ Wokit nada de intahat, fi sahra hinak hajat tannin beinu ze gisir ta samaga abiad maliyan tehet fi wata ze lelij. ¹⁵ Wokit shaab ta Israel aynu hajat dok, humon bada wori le badu, “de sunu? Humon kan ma arufu de sunu”? Humon kan ma arufu de sunu. Musa wori le humon, “De ess al Yahwa wodi kede intakum akulu. ¹⁶ De talimat al Yahwa wodi: lazim kede intakum legetu, ai wahid min intakum, godur al intakum der akulu, godur omer le ai zol godur adad ta shaab takum. Intakum bi legetu zede; legetu takum kifaya al intakum bi akulu le ai zol al fi kema takum” ¹⁷ Shaab ta Israel amulu kida. Tannin legetu ketir, wa tannin legetu besit. ¹⁸ Wokit wozinu fi mizan ta omer, del al legetu ketir ma fadulu haja min humon, wa del al legetu besit ma nagis min humon haja. Ai zol legetu kifaya godur al bi timu humo. ¹⁹ Musa kelim le humon, “mafi zol kede dusu min akil de tani le sabah” ²⁰ Lakin, humon ma asuma kalam ta musa, Tanin bada dusu tani le sabah, bada afin wa tala dud. Musa tala zalan min humon. ²¹ Humon legetu sabah be sabah Ai zol legetu kifaya al bi akulu fi yom dak. Wokit shemis biga sukun, hajad del sih ze moyo. ²² Wa hasil fi yom nimira sita humon legetu ess maraten, itnin omer le ai zol, kulu kaid ta mujtama jaw a kelim kida le Musa. ²³ Huwo kelim, “De Yahwa yau kelim: “Bukura utla, sebit al mukadas intiran le yahwa. Amulu takum kak ze al intukum der amulu, wa rakabu takum ai akil al intakum der rakabu. Ai bi fadulu, le nufus takum le sabah” ²⁴ Humon gum dusu le sabah ze al Musa kelim le humon Dur de biga ma afin wa tala fogo dud. ²⁵ Musa kelim, “Akulu takum akil dak alela, ashan alela de yom sebit al nina bi ihterimu Yahweh. Alela intakum ma bi ligo fi mahal zara, ²⁶ Intakum bi legetu kida sita yom, lakin yom nimira saba bikun mukadas. Fi yom al mukadas de ma bi kun fi manna.” ²⁷ Hasil fi yom nimira saba dak nas tannin ruwa ashan bi legetu manna, lakin humon ma ligo wole wahid. ²⁸ Biga Yahwa kelim le Musa, “lahadi miten intakum bi aba hafisu talimat tai wa gawanin tai? ²⁹ Aynu, Yahwa wodi le intakum yom al mukadas. Wa fi yom nimira sita huwo bi wodi le intakum ess ta yomen. Ai wahid min intakum lazim kede geni fi mahal bito; mafi zol kede tala min mahal bito fi yom nimira saba de.” ³⁰ Shaab biga akudu raha fi yom nimira saba de” ³¹ Shaab ta Israel kan bi nadi isim ta akil de gali “manna” shikil bito abiad ze tirab ta karbara, wa hilu bito ze bisuit lakabatu be asel. ³² Musa kelim, “de Yahwa yau kelim: “kede omer ta manna hafisa fi kulu zaman le ajiyal takum ashan iyal ta iyal takum bi aynu ess al Ana kan akilu intakum fi sahara, baad ma ana talau intakum bara min wata ta Masir” ³³ Musa kelim le Harun, “shilu gurma wa kutu fogo omer ta manna. Ashan kede hafisu gidam Yahwa le ajiyal takum.” ³⁴ Ze Yahwa wodi talimat le Musa, Harun hafisu sonduk ta tifagiya. ³⁵ Shaab ta Israel akulu manna le muda arbein sena lahadi humon ja fi wata al waadu le humon. Humon akulu lahadi humon wosulu fi hudud ta wata ta Canaan. ³⁶ Wa biga wozinu omer de be godur ushur ta Ephah.