^{1 2 3} 1 Diadu a'i ni nga asi 'barega ri ni egenika pi nga ndele mi si ku ri ni egenika ayo. 2 A'i si Rubanga anjo a'bi amadi eze ri ra. 3 A'i si amani a'jo Rubanga bi vu 'di Andaa cara si, e'bedu nga ndele misi ripi abi nga ndele misi ripi si ku. ⁴ 4 A'i si Abele azi lazi Rubanga ni zwa Kaino di ra, lazi ilesi a'ba andaa ni mo'di anda rii, pi Rubanga 'jo nga loso ri andaa dile ga ra andaa lazi ilesi, pi a'i si Abele ni adi kolo'joru, kesu andaa kuda ra saa 'i. ^{5 6} 5 A'i si azi Enoka ni oru ru'buge lidi du nde da kuru. "Esu andaa ni kuru a'dusiku Rubanga zi andaa ni pi". Esu adi azi andaa ni oru pi kuru du ange le'jo andaa ruge a'jo andaa ede nga Rubanga ni anjo kere ayo rii. 6 A'i ni ako du mo'di kuke anjoanjo Rubanga ni kpe. A'dusiku mo'di emure Rubanga di ri kulee ka'i a'jo Rubanga ni 'aa pi Andaa kuke nga loso ri 'ba Andaa ni ndu'ba ri ni ⁷ 7 A'i si, de Nua ni ake laka ofu engare Rubanga di si nga adi lendere ku ri a ruge ri ra, laru Rubanga di si ede i'bo andaa 'ba zoga ri ni larizo. Andaa nga 'di ni edeka si andaa li le'jo vu ruge pi andaa esu andaanda esule a'i si ri ra ^{8 9 10} 8 A'i si Iburaimu ni de alungwe ile'dii andaa a'ira pi mu kare 'jole avo akee kolu andaa ni ri niga ra. Andaa mu ni ku du andaa kumu inguwa ya 'i. 9 Andaa olu vu kele andaa ni ileniga a'i si kende mo'di vu zi di ani. Andaa olu kema aga Isaka pito Yako'bo pito, a'i'ba nga ecarale ra alualua ile ri ni esu'ba ripi 'i. 10 A'dusiku esu andaa kunde nga andaga 'ba bile andaa pa to, aragi na pi bire na Rubanga 'i ri ni ga. ^{11 12} 11 Andaa ni a'i si, kesu anda Sara ni mo'di tire ku rii saa 'i, andaa esu mori 'a kozo ra. 'Di ederu ra kesu andaa ni idazi saa 'i, a'dusiku andaa a'i a'jo mo'di le'jo ileni 'jore ri kegeniru wa. 12 'Disidu, mo'di alu ile a ruge si, kesu andaa ni ire kolu mo'di dare ra ri ani saa 'i, otilele karako oyi kende lelego ani pi kularu kpe kende cinyakwi meri tige ri ani. ^{13 14} 13 'Ba 'dipi tuwadu odaki pi a'i aga esuki nga ecarale ile kuru. Rari ndeki a'i lolu pi a'iki a'i ra, pi niki a'jo a'i 'ba omu rii vu dige 'dia. 14 A'dusiku 'ba nga 'dini 'dipi ni lo'jo'ba ri ke'detee gbadu a'jo a'i 'ba vu zi oluzo ri ni ndu'ba ripi 'i. ^{15 16} 15 De kesu kurakii nga vu a'ia engarega si ri a ruge, tebe 'dii esukii a'ini kare ngwizo vule laka ra. 16 Rari 'bakii a'ia asi vu loso lagare pi ru'buge ri niga. Ayosi dinja ko Rubanga ni ku a'ini Andaa ni lungwerega a'ia Rubanga 'i du, a'dusiku Andaa ede a'ini 'ba ra oluzo. ^{17 18 19} 17 A'i si Iburaimu ni lele andaa ni 'a o'bizo ri niga, azi andaa ngwa Isaka ni ra, andaa 'burangwa alu papala rii, Iburaimu ni mo'di Rubanga ke Andaa cara laka rii. 18 Rubanga 'jo andaa ni a'jo, " Avo alungwe nyaa 'boronji Isaka a ru si". 19 Iburaimu egeni a'jo Rubanga kate wa Isaka ni enjirega pi daga si, ku'joru kende Iburaimu ni esu Isaka ni idi da aga si ani. ^{20 21 22} 20 A'i si saa e'be Isaka co tutu Yako'bo pi a ruge Esau to le'jo mure emure a'ini tozo andaga ri niga. 21 Ongu a'i si saa lele Yako'bo kudada ri co tutu 'bura alu alu Yozefu di ni ruge pa. Yako'bo wo atiru andaa bele lamuzo ri si kudi elegi Rubanga ni. 22 A'isi, Yozefu ni, de saa andaa di dazo ri esa ititi, andaa 'jo le'jo 'bonji Isaraele di ni ngazo pi vu Misiri di ni ga si ri a dile ga ra pi ecara a'i andaa kwa ni zizo pi vu ileni ga si. ^{23 24 25 26} 23 A'isi, de akuti Musa ni, ende pi ata to luzu andaa ni imba na, adusiku ndekii andaa ni 'bura tile pelere rii. Orikii cara opi ile di si kuru. 24 A'isi, Musa ni de kumbara, ga imgbe akulungwe andaa ni Farao a zwa a ngwa 'i du. 25 Andaa ovi icandi ndeka kare aluga 'ba Rubanga di to ri zwa asi i'bwe enji di saa gaangwadu ri niga ri ra. 26 Andaa ra icandi esuka dinja to Kristo a rusi ri losa zwa limi tuwadu Misiri ge ri ra, a'dusiku esu andaa kunde nga andaga nga Rubanga a mule kele andaa ni ri niga. ^{27 28} 27 A'isi, Musa ni e'be vu Misiri di ra. Ori anga opi Misiri di ri kuru, a'dusiku andaa epi asi kende andaa kunde Rubanga ni ndele misi ku ri ani. 28 A'isi, andaa oko cara Lalizo pi ( Paska ) ri ni vu pi luyi eri bilo di koti ge si, e'bedu malaika da di ri ku 'di 'bonji otile kayo Isaraeli 'ba di ku. ^{29 30 31} 29 A'isi, 'bonji Isaraeli di jwakii meri ika ni kende 'ba a lawezo inga 'a'ui dige si ri ani. De Misiri 'ba o'biki jwaka a'idi ani, meri ile emvu a'i ra. 30 A'isi, meri Yeriko di jo vuru pi, de lupikii bara na vu tuderi na 'i. 31 A'isi, Rahabu ni izi bate ile da kuru kare alu ga 'ba le'jo eri'ba ku ilepito, a'dusiku andaa a'i 'ba umiya ile i'bwe si. ^{32 33 34} 32 Menjaru andaga le'jo ingopi ni 'joka to ? A'dusiku saa kumu kolu mani iyo le'jo 'jore ga pelere Gidioni pi a ruge Baraki to, Samsoni pi a ruge Yafeta to, Daudi pi a ruge Samwele to pi profetaa azika ripito. 33 A'isi zwakii opi mgbimgbi karako ri ra, edekii andaanda ayo, pi esukii nga ecarale ri ra. La'bukii ibi ni ti cwi, 34 ezikii asi ni mori ra, pikii pi iligo sige si, ake a'ini mori saa a'i awiako ri niga, ecorukii 'ba mori to o'jaga ripi 'i, pi zwakii mundara juru di ra. ^{35 36 37 38} 35 Uku esukii 'ba a'idi oda'ba ri ra a'ia enjika pi da ga si ri si. 'Ba zi'ba ecandi a'i okposi, gakii a'ini ayuka imgbe dudu a'i kesu enjika pi daga si lagare pi ri ra. 36 Zi'ba ripi alu'da a'i okposi pi alumgba a'i ra, pi ombe a'i mgbirila si mabusu ge. 37 Aluvi a'i oni si. Alali a'i tu seresere si. A'di a'i iligo belengu si. Lawekii kulusukii indi ni eni pi bilo ni eni ayo. Ecorukii 'ba konyi ako ripi 'i, pi ecandi a'i ra. 38 Vu 'dii lende a'ini loso ku. Saa tuwadu si kalawekii kwesikwesi asi pi 'be dige si, pi ugi asi pi 'bu inga aga ri ni asi. ^{39 40} 39 De kesu 'ba 'dipi tuwadu Rubanga le a'ira a'ia a'i si saa 'i, ti esukii nga Rubanga ecarale a'ini ri kuru. 40 Rubanga lu'ba nga zi loso lagare pi ri ra amani, dudu ama ako du a'ba a'i kesi ca du ni kpe.