^{1 2 3} 1 'Disidu, kende sadenia 'ba a'i'ba ri di a amani kezo gbi 'di ani, kulee akuwakii pi teri angi ri pi enji amani pa ani'ba ripito. Akufekii asidi epika to angu 'bale ama andaga 'di niga. 2 Akutakii asi Yesu ni ruge, Andaa ni mo'di a'i amadi 'di ni e'dore pi ekore rii. Asi i'bwe 'bale Andaa andaga risi, Andaa ebi lajwaka kruce dige ri, ede dinja ra, pi Andaa ri di anda komi keri di Rubanga di niga. 3 'Disi anyira nga Andaa dilega, Andaa ni esu kipele karako 'ba enji'ba ridi si Andaa ruge ra, dudu anya asi le'jo ile niga ku. ^{4 5 6} 4 Adi anyi'ja enji to sa ko eri a ocurega kuru, 5 pi anya ta saru di le'jo anyini embazo kende 'bonji du ri niga: 'jore, " Ma ngwa, ede lamgba Opi di ku, pi lande ku de Andaa kedu nyi na 'i. 6 A'dusiku Opi kumgba 'ba Andaa lele ripi 'i, pi 'ba tuwadu Andaa a'ile ra 'bonji du rii Andaa kumgbaa pere si." ^{7 8} 7 Anyebi icandi kende lamgba. Rubanga kede i'bu anyito kende 'ba a i'bu edezo 'bonji a'idi to riani. A'dusiku 'bura ingo'i ata a mgbale ku rii ? 8 Ti de amgba anyi ku, ku'joru anyi 'bonji ezile laangwe si ripi 'i, 'bonji Andaa ni gba ri dii ku. ^{9 10 11} 9 Ongu saa, ama ata ri amani lumgbare pi amake a'ini laru ra. Kulee amake laru kalaga pi Ata endi tuwadu ri ni pi amolu du lidi ! 10 Ama ata lumgba ama saa gaangwadu ri ni aga a'ia lezo ri ani. Ti Rubanga kumgba ama ama loso ni, dudu amate remuka wa Andaa okole ni aga. 11 Saa lamgba di niga asi i'bwe iyo, rari asi lajwa. Ti lamgba kezi o'a i'bwe di pi andaanda to 'ba lenile lamgba si ilepi ni. ^{12 13} 12 Kulee anyemba anya di e'bwere ti ile pi anya a'ja mori ako ile to. 13 Anyedu leti anda anya pa ni dudu mo'di pa e'bwere ti ri ni pa kungu laka ku, rari pana kederu du laka ra. ^{14 15 16 17} 14 Anyoko i'bwe ni vu ayo 'ba tuwadu to, pi oluka okole ri to, a'dusi okole ako mo'di zi iyo Opi ni ndere na 'i. 15 Anyekukaru dudu kiza Rubanga di kolu iyo anyini ku, pi dudu ijwa anga di kumba ku icandi ezirega, 'ba karako ri ni endirega ayosi., 16 kulee mo;di zi asa edere na kolu iyo anya lelega, kusa mo'di nga andi ri ni edere na 'i, ovidu Esau ani na 'i, ita onya di alu risi andaa lezi andaa anda loso rutizo ati ri pi. 17 A'dusiku anyini ra de vulega andaa le anda loso ile ni esule, aga andaa ni imgbe, a'dusiku saa olu iyo andaa ni asi lufuzo, kesu andaa kowu du minda si saa 'i. ^{18 19 20 21} 18 A'dusiku anyevo 'be runa lole disi wa ri niga ku, 'be gwere asi si rii, vu ini to, vu foro to,pi lutulutu to rii. 19 Anyevo u'duku buruji di niga ku, pi u'duku loro'jore le'jo 'ba eri'ba ri oridu ra pi lekii ku u'duku ile kolo'joru a'ini idi rii. 20 A'dusiku makii kpe nga ecarale a'ini ile ni erika: a'jo, " De kolu anyukwa saa, esare ire 'be ile to rii, akuvi oni si kpo". 21 Nga ile esu kuke 'ba ni ori e'bedu Musa ni gba ri saa ku'jo, " Ori ko ma cwi pi maa ru koyoru oyo". ^{22 23 24} 22 Rari anyevo "be Zioni di niga pi 'ba Rubanga ni lidi ri di niga, Yerusaleme ni oru ru'buge ri niga, pi malaika alifu karako remure kare aluga anjo to ri di. 23 Anyevo lemu 'bura tile kayo ri di niga, runapi acwi ru'buge rii. Anyevo Rubanga di, Mo'di le'jo lalire 'ba tuwadu ni rii, pi anyevo endi 'ba anda ri di, a'i eco a'i okole ri di. 24 Pi anyevo Yesu di, Mo;di ra'ika u'di ri ni lamire rii, pi anyevo eri luyile ra loro'jore kuzwa Abele a eri ra ridi. ^{25 26} 25 Anyekukaru losodu dudu anyidi Yesu ni le'jo 'dini 'jore anyini ri ni ga imgbe ku. a'dusiku de 'ba anda le'jo Rubanga a 'jole Musa a tige si vu dige 'dia ri ni ga'ba imgbe ripi pikii kuru na, amavo amapi ingoni de amaga imgbe mo'di loro'jore amato rubuge si ri a le'jo 'i na 'i ? 26 Andani ezesi, Rubanga ni u'duku oyo vu ra. Ti diadu Andaa ecara a'jo, " Vu alu lesire 'di niga mamu moyo vu ayo papala ku moyo ru'bu to". ^{27 28 29} 27 Le'jo 'jore "Vu alu idi," 'di ni ekwi ku'joru nga oyole wa nga Rubanga a bile ri ni gasi ripi oyoo ra dudu nga oyole kpe ripi kelesi ni. 28 'Disidu, ama oluka keri oyole kpe ri to si, kulee amolu anjo to Rubanga ni laru kerega pi Andaa ni elegi re ga ori to. 29 A'dusiku ama Rubanga ni asi nga dure tuwadu ra rii.