¹ Ma'joo 'dini, mo'di mure ata a limi ni esure ni ri de adi andaa olu 'bura andaa mgbimgbi iyo opigo to, kesu andaa kolu 'ba ile ni ata 'i sa 'i. ² Ti leyi andaa di kuzwa andaa ni ni kusa ko saa ataa ovile andaa ni mori kezo nga tuwadu zwazo ni ri niga. ³ Ile ani saa, adi ama oluzo 'bonji ciri du rii, amari olure opigo du ori injwi vu 'di ni lasere ni ri dii. ⁴ Ti de saa kumu ko'biru ra, Rubanga ezwe Andaa Ngwa ni, izi ti ni, ati cara 'aga, ⁵ dudu Andaa kate 'ba cara a ombele cwi ri ni larika wa, dudu akeco ama 'bonji du Rubanga ni. ⁶ pi diadu anya oluka 'bonji Rubanga di 'i si , Rubanga ezwe Endi Okole Andaa Ngwa di ri ama asige, Andaa kojwa, " Ata, Mataa." ⁷ 'Disidu diadu nyi opi ku, ti 'bura, pi de nyi 'bura nyi mo'di tozo mure nga 'bani vole esule Rubanga di si ri ni esure 'i. ⁸ Ti saa nasi, anya Rubanga ni nizo kuru rii, anyolu opigo du nga mori a'idi si 'ba a lungwele rubanga du kesu a'i Rubanga ku ripi saa'i. ⁹ Ti diadu anya Rubanga ni nika ra si, kusa diadu Rubanga anyini nika ra si, ongu anyingwi vule a'duga olurega opigo du nga mori ako pi ekwi ako pi endi andi vu lasere ni ri di ? Anyile aku'ba anyi opigo du idi? ¹⁰ Anyekuka o'du pi imba wilo pi saa ayi di meli to kinya aga! ¹¹ Ori kuko ma anyisi diyo nasi naa i'bu maa edele anya lelega ri mede isa. ¹² Ma'i anyi okposi, maa adiinji, anyolu maa ani, a'dusiku ma saa mecoru anyi ani. Anyede nga injwi mani kuru. ¹³ Ti anyini ra lele maa Ofu Loso ngezo anyini vu atizo ri si rii esu lajwa aa maa ruge, ¹⁴ pi kesu maa ru ni ovi kelende anyini injwi lele nasi saa 'i, anyede ma kuru pi anyiga ma kuru. Rari dusi anya'i ma asi tuwadu si kende anya'i malaika Rubanga dii ani, kende ma Kristo Yesu ni gba ri 'i ani. ¹⁵ Diadu anya anda loso ri wo inguwa? A'dusiku mange sadeni anya ruge wa, a'jo kesu kate wa rii, tebe'dii anyenge anya mi pi kele mani. ¹⁶ Ti diadu mecoru anya o'ja'baazi 'i maa anyini gba 'joka ayo si? ¹⁷ A'i 'ba azika ilepi takii asi okposi anyini kurega pi, ti ile konyi ako. Lekii a'i kalapi ama lele anyito ra dudu anyile a'i kuzwa ama ra. ¹⁸ Andaa ni loso amani nga loso ri ni lezo kalaga pi, anyede nga 'di te maa mi ni orika ayo si ku. ¹⁹ Maa 'bonji ciri ripi, ongu malajwa lajwa oti di anyisi idi kusa ko saa Kristo ni kelende anya 'aga to. ²⁰ Male esu amolu ire anyito diadu, dudu ameco maa u'duku ni ovi, a'dusiku maa di kiru ra anyisi. ²¹ Adi anyi'jo mani, anyi le'ba anyoko cara ni vu ayo ripi, anyeri nga cara a 'jole ri ku? ²² A'dusiku acwi ra a'jo, Iburaimu ni 'bonji na ri, aluzo ri opizi ri ti ni pi azika ri izi andaa di gba ri ti ni. ²³ Aluzo ri opizi ri ti ni le ru disi, ti azika ri izii ni gba ri tini cara Rubanga di si. ²⁴ Nga 'dipi 'ba kate ayuka na leti le'jo 'bezo ri di si, a'dusiku uku ri 'dipi o'bie ra'ika ri ripi to. Alu a'ia lelega ri enga 'be Sinai di ni gasi pi andaa kuti 'bonji opi du. 'Di andaa ni Hagari 'i. ²⁵ Hagari ni viruvi 'be Sinai di to vu Arabia di niga rii, pi andaa viruvi Yerusaleme ni vu dige 'dia ri to, a'dusiku andaa ni andaa 'bonji to tuwadu opigo. ²⁶ Ti Yerusalemu ni oru ri di mgbo to, pi andaa ni ama ende 'i. ²⁷ A'dusiku acwi ra, " Kulee anyanjoru, nyi mo'di tire ku ri, ojwa anjo si nyi oti ni lajwa erire kuru ri, a'dusiku 'bonji izi tire kuru ri di yayadu zwa 'bonji izi ago to pi tire ri di ra. ²⁸ Ti anyi 'i, maa adiinji, kende Isaka ani, anyi 'bonji nga ecarale ra ripi dii. ²⁹ Saa nasi, andaa ni tile le ru di si ri ecandi andaa ni tile Endi si ri ra. Diadu saa viruvi andaa to. ³⁰ Ti Buku ku'jo a'du? "Do izi opizi ile pi andaa 'bura to. A'dusiku 'bura opizi ile di mu lapi limi mule esule ri 'bura izi gba 'di di to ku. ³¹ 'Disidu, maa adiinji, ama 'bonji izi opizi ri dii ku, rari 'bonji izi gba ri dii.