¹ Di mgbo si, Kristo ke amani di mgbo ra. Ayosi, anyede okpo anya di mgbo ni aga, anya'i idi ku olurega opigo du. ² Anyinde, ma Paulo si, ma'joo anyini 'dini, de anya'i rolika ra, anyivo anyesu nga zi loso na alu saa ku Krist ni aga. ³ Make sadeni 'di mo'di alualu lere akuli andaa ni ra ri ni, caraga, kulee andaa koko cara tuwadu ri a le'jo 'i. ⁴ Ali anyi pi Yesu Kristo di si, anyi le'ba aku'ba anyi 'ba anda du cara ni vu okoka ayo si ripi, diadu anyesu kiza wo ku. ⁵ A'dusiku Endi Okole ri si pi a'i si amate geni anda anda di asi si. ⁶ Yesu Kristo ni aga ru olika pi ru olika ku to 'boro nga ekwi ako ripi 'i, ti a'i i'bu edere le si rii. ⁷ Esu anyife loso. A'di luga anyini nga gba ri ni erirega? ⁸ Nga anyini asidi vure ile enga Opi ni anyini lungwere ri di ku. ⁹ Akukwe gaangwadu ri kenga irafu ngile ri ni. ¹⁰ Anya asidi kolu okpo Opi ni aga dudu anyulura nga zi mgbi na ri ku. Mo'di anyini lunjware ile kumu kesu lamgba ra. ¹¹ Maa adiinji, de adi mange le'jo loso ru olika di a dige na, 'ba kuke icandi mani a'dusi? 'Dia ku'joru kuruce 'ba ni pa lusire kwedili du ile a'ba baraga! ¹² A'i anyini ecandi'ba ile malee kolikii a'i ru tu tu ! ¹³ Maa adiinji, alungwe anyi dimgbo aga. Ti anye'bu anya dimgbo ile fuco ru di ni edezo ayo ku, rari le si, anyekonyiru anyianyini. ¹⁴ A'dusiku cara ndutu ni ederu ra nga alu 'di ni aga, a'jo, " Kulee anyile nyaa rezi ni nyaa ru ni lezo riani." ¹⁵ Ti de anyosiru sisi pi anyogwiru anyukwa ani, kulee anyekukaru dudu anyidi reko anyianyini ku. ¹⁶ Ti majoo 'dini, anyalawe Endi Okole ri ni aga pi anyivo anyede fuco ru di a i'bu ku. ¹⁷ A'dusiku fuco ru di ku'di o'ja Endi Okole to, pi fuco Endi Okole di ku'di o'ja fuco ri di to. A'i ri 'di o'ja'baazi, 'disi anyate ku nga anya lele ayo ri ni ederega. ¹⁸ Ti de Endi Okole ri kuse anya di ni, okpo cara di anya ruge iyo. ¹⁹ I''bu ru di kelende pelere, a'i, asa, nga andi ripi, mi mgbaka, ²⁰ ori injwi ri ni ruka, ule, o'ja'ja, revuka, avi, anga injwi kanya ri, larafuka, larapika, ²¹ avi, mera, pi remuka lamvu di pi mera di to, pi nga zi'ba ovi 'dini 'dipito, ma'joo anyini, 'ba nga ovi 'dini 'dipi ni ede'ba rii vo esukii keri Rubanga di ku. ²² Ti o'a Endi Okole di andaa ni, le, anjoanjo, i'bwe, asi epika, ovi ni loso, kiza, a'i, ²³ oluka 'di, pi ru ekukaka, nga 'dini 'dipi niga cara zi iyo. ²⁴ A'i Yesu Kristo di ripi epakii a'ia ru fuco tuwadu ru di to kuruce dige. ²⁵ De amadi Endi Okole ri si, anyi'ba akalawe Endi si. ²⁶ Anyi'ba akecurukii ku, 'ba zipi ni asi enjizo, pi amani oluzo avi to ama lelega.