¹ Anyi Galatia 'ba anyi mamali. A'di ro anyi ni? E'dete Yesu Kristo ni anya andaga pelere a'jo epa Andaa ni Kuruce dige. ² Male amani nga alu 'dii papala anyidi si: Anyesu Endi Okole ri i'bu cara ni vu okozo ri si de le'jo a'i di ni erika si? ³ Anyecoru mamali 'dini? Anye'do Endi Okole si, diadu avo eco anyi 'ba anda du le'jo ru di si? ⁴ Anynde icandi nga karako aga 'dinipi godu isa - de gbadu kolu isa na'i? ⁵ Andaa ni Endi Okole ri ni kere anyini pi nyuma edere anya lelega ri kede nga 'di i'bu cara ni vu okozo risi de le'jo a'i di ni erika si? ⁶ Kende Iburaimu a Rubanga ni a'izo pi eco andaa ni du mo'di anda rii ri ani, ⁷ ovi alua ri ani saa, kulee anyini, a'jo a'i 'ba a'i to ripi 'boronji Iburaimu dipi 'i. ⁸ Buku Okole ri nde nga andaga ra, a'jo Rubanga kumu keco 'ba juru ri 'ba okole du ra a'i si, nge Ofu Loso ri ra Iburaimu ni dogodogo du, ku'jo, " Nyini aga suru tuwadu vo kesu tutu ra." ⁹ 'Disi, 'ba a'i di ni anda loso kare aluga Iburaimu ni mo'i a'i di ile to. ¹⁰ 'Ba tuwadu i'bu cara di ni egeni'ba ayo ripi alu a'i ra: kende cwizo ra Buku Okole ri niga riani, " Ba tuwadu nga cwile buku cara di niga ri ni ede'ba duwadu cwizo ri ani ku rii alu a'i ra." ¹¹ 'Di diadu e'dete pelere a'jo mo'di zi 'bale anda Rubanga andaga cara ni vu okoka ayo na si alusa iyo, a'dusiku acwira, " 'ba anda ri kuvo kadi ra a'i si." ¹² Ti cara ni nga a'i dii ku, rari, acwi a'jo, " Mo'di i'bu cara di ni edere ri kadi ayosi." ¹³ Kristo lari ama lalu cara di ni aga si Andaa recoka lalu du amasi ri si - a'dusiku acwira, " 'Ba tuwadu epale kwe dige ripi alu a'i ra." - ¹⁴ e'bedu tutu Iburaimu di kemu juru ni Yesu Kristo ni 'aga, dudu a'i si amesu Endi Okole Rubanga a ecarale ri. ¹⁵ Maa adiinji, adi amolo'joru ovi 'ba a loro'jozo ri ani. De 'ba a'iru ra cara andaga, mo'di zi ra'ika ileni ngure na iyo kusa nga zi enjarega laka. ¹⁶ Nga ecarale ile Rubanga ecara Iburaimu ni andaa ngwa to. Buku Okole ri 'jo kuru, " Nyaa 'bonji to," ku'joru 'ba karako ni ku, ti mo'di alu ni, " pi nyaa 'bura ni," ku'joru Andaa ni Kristo 'i. ¹⁷ Diadu nga maa 'jole ri 'dii: Cara, kele 'bani kinya 430 a vuga ri , lufu ra'ika Rubanga a edele 'bato atisi ra ri ku, nga Rubanga a ecarale ra ri ni nguzo pi. ¹⁸ De nga Rubanga a ecarale ra ri 'ba kesuo cara ni vu okoka si, ku'joru nga ile emu Rubanga a ecaraka ra si ku. Ti Rubanga ke nga ile isa Iburaimu ni Andaa 'joka Andaa kumu kukee Iburaimu ni ra ri si. ¹⁹ Diadu cara ni i'bu wo a'du? Enja cara 'bani enji 'ba di si dudu kusa ko saa Iburaimu a Ngwa a emunga, Andaa ni ake nga ecarale ri ayosi rii. Cara ni emu 'bani malaika di ga si, mo'di edere 'ba lelega ri ni diga si. ²⁰ Mo'di de kede 'ba lelega kesuo 'ba ile ni weli zwa alu ni ra. Ti Rubanga ni alu. ²¹ 'Di ke'detee a'jo cara le nga Rubanga a ecarale ri ku? Ileni ku ! De kesu cara lidi ezire 'bani wa na akuke ra, tebe 'dii anda anda kemu 'bani cara ni vu okoka si wa. ²² Ti Buku Okole ri ombe 'ba tuwadu cwi enji aga dudu nga Rubanga a ecarale ra 'ba ni a'isi Yesu Kristo ni aga ile akuke a'i a'i'ba ri ni. ²³ Esu adi a'i iyo ri, ama 'borodu ombe ama cwi cara aga, ama mabusuge kusa du ko saa leti a'i di ni e'detere ga. ²⁴ 'Disidu cara ni olu ama leyi 'i sa ko Kristo a emunga, dudu aku'ba ama 'ba anda rii a'isi. ²⁵ Ti diadu a'i a esaka ra si, ama leyi diga ku. ²⁶ A'dusiku anyi tuwadu anyi 'bonji Rubanga di 'i Yesu Kristo ni a'ika si. ²⁷ A'dusiku anyi tuwadu ebatizale Kristo ni aga ri anyulusuru Kristo si. ²⁸ Mo'di zi Yudei 'ba go kusa Girigi go na diadu iyo, mo'di zi olure opigo du kusa dimgbo dii na iyo, mo'di zi olure ago du kusa izi du na iyo, a'dusiku anyi tuwadu nga alu rii Yesu Kristo ni aga. ²⁹ 'Disidu de anyi Kristo a 'i, anyi 'bonji Iburaimu dii, pi 'ba nga Rubanga a ecarale ra ri ni esu'ba ripi 'i.