¹ Kinya mudi alimbi su a vuga mangwi idi Yerusalmu ga kare aluga Barnaba to, mazi tito ni to. ² Mamu naa lete si pi me'dete a'ini Ofu Loso maa ngele juru ni rii. Molo'joru vuruvuruni 'ba alu alu ripito - dudu madi olu mo'di lafere isa kusa anda lafere isa rii ku ³ Ti Tito ni Girigi go olure mato rii saa ari mori si kuru dudu akuli andaa ni ra. ⁴ A'i adiinji lunjwalunjwa di ile etorukii vuruvuru ni amani aga umiya du dudu a'i kuni ama di mgbo Opi Yesu Kristo ni aga ri. lekii amani 'bale opigo du, ⁵ ti amale le'jo a'idi ni erika ku kwa, dudu gba Ofu Loso di kolu anyito. ⁶ Ti 'ba ru'ba'ba 'ba amba du ile ( de a'i a'du'ba ya ni le'jo madii ku, a'dusiku Rubanga lapi 'ba ni lele ku )- a'i 'jo'ba a'i amba ilepi, ma'joo 'dini, enjakii ngazi mgbi na mani kuru. ⁷ Rari dusi, ndekii a'jo ake mani Ofu Loso ri ngele 'ba olile kuru ri ni, kende ake Petero ni Ofu Loso ri ni ngezo 'ba olile ra ri ni ani. ⁸ A'dusiku Rubanga ni i'bu edere Petero to maju du 'ba olile ra ripi ni ri, saa ede i'bu mato juru ni. ⁹ De Yako'bo pi Kefa to Yoani ni laka, a'i anda nile amba du olu'ba pelopelo ani ekelezia ga ripi, kunikii kiza kele mani ri, a'ikii ama Barnabo to di riri ri si remurega alu a'ito. A'ikii ra a'jo amavo juru ge pi a'i kuvo 'ba olile ra pi di. ¹⁰ Zikii ama ku'jokii rarii kulee amera 'ba nga ako rpi, nga 'di gba maa lele ndo edele rii. ¹¹ Ti de Kefa kemu Antioko ga, me'ja andaa ni gbo du a'dusiku andaa ede injwi. ¹² Esu adi 'ba zi evo Yako'bo pidi si kuru du, Kefa ri nga nyare 'ba juru ri to kare aluga. Ti de 'ba ile ku'jo a'i kesa, andaa e'be nga nyaka juru to ri ra pi vuru mgbi a'ini aga si. Andaa ori ra 'ba rolika le'ba ayo ilepi si. ¹³ Yudei 'ba zi ripi saa emurukii andaa to lunjwalunjwa 'di niga. Kesu Barnaba 'i saa 'i aku pi a'ito a'ia lunjwalunjwa ni aga. ¹⁴ Ti de amande nga a'ia edele 'di viru gba Ofu Loso di to kuru, ma'jo Kefa ni a'i tuwadu ile ni andaga, " De nyi Yudei 'ba go, pi nyolu ovi juru di ani Yudei 'ba di ani ku, nyiri juru mori si ingoni olurega Yudei 'ba ani ?" ¹⁵ Ama amanga si oti ama Yudei 'ba pi ama juru enji'ba ripi 'i ku, ¹⁶ kesu ileni saa amani ra a'jo mo'di zi iyo 'bale anda na'i i'bu cara ni vu okozo risi ti a'i Yesu Kristo ni aga risi. Ayosi ama saa ama'i Yesu Kristo ni ra dudu aku'ba ama 'ba anda rii Kristo ni a'ika si, i'bu cara di si ku. A'dusiku i'bu cara di si avo a'ba mo'd zii anda du ni ku. ¹⁷ Ti de ama 'ba lari ndu'ba Yesu Kristo ni aga ripi, ama saa akesu ama enji aga juru ani, 'di ke'detee a'jo Kristo ni enji ni ata ? Ile ani ku kwa! ¹⁸ A'dusiku de amasi idi nga anda maa arele pi ripi ke'detee ma mo'di injwi rii. ¹⁹ A'dusiku cara aga mada ra cara ni, dudu amadi Rubanga ni. Epa ma kuruce digeKristo to, ²⁰ Diadu madi ma'i ku, ti Kristo ni kadi maa 'aga ni. Lidi diadu maa adile ruge 'di madi a'ika Rubanga a Ngwa ni aga risi, Andaa ni mani lere pi Andaa lidi ni kere masi rii. ²¹ Ma'ba kiza Rubanga di bara ga ku, de 'ba kesu andaanda wa cara ni vu okoka si, ku'joru Kristo da isa.