¹ Diadu male amera anyi, maadinjii, ofu loso maangele anyi ri si, pi anya ai le ongu anya edereega rii, ² anyalariru ofu loso di si de anyede lejo maangele ri ni ga okpo nai, de andaa ani ku anya a'i ibu ako. ³ Adusiku make anyini nga ati okpo maisaa maa esule ri, ajo Christo da ama enji si alande buku okole ri ajozo ri ani, ⁴ ajo ase Andaa ni ra, ongu enji da aga si pi odu na avuga buku okole ri ajozo ri ani. ⁵ Christo edete ru Kefa ni, ongu maju mudi alimbi eri ri ni; ⁶ Pi Edeteru adiinji mia tou adi ndere ra ri pi ni vu alu si. Zipi adi na olu lidi, ki zi pi jo odu ga. ⁷ Ongu edeteru Yacobo ni pi maju twadu ri pi ni. ⁸ Vulega ri edeteru mani kelende bura tile saa ego ri si ri ani. ⁹ Adusiku ma majug vule ga rii. Mesiku lungwele maju du'u i adusiku mecandi 'ba Christo di okposi. ¹⁰ Ki kiza Rubanga Mecoru dini ni ayo si, pi andaa kiza maniaga ri laga isa kuru. Ki duna si mede ibu nja zwa a'i twadu ra. Ki ile mai ku ki kiza Rubanga di mani aga rii. ¹¹ Disidu, de tebe amange nga anyini mai kusa kunge kii anyini ni saa, disidu amange nga anyini, anya i ra. ¹² Diadu de ange ofu ama Yesu enji da ga si ra na, ki anyi zipiri kujoo enjikaa da ga si iyo adusi? ¹³ Ki de enjikaa daga si iyo, kujoru Yesu i saa enji daga si kuru du.; ¹⁴ pi de Yesu ni enji daga si kuru kujoru nga ama ngele anyini ri pi saa ibu ako ongu anya a'i saa ibu ako. ¹⁵ Ile wo, kesua ama sadenia enjo Rubanga di i adusiku ajo Rubanga enga Yesu ni da ga si ra. Ki esu enga Yesu ni daga si kuru, de gbadu ba daka ra ri enji daga si ku na i. ¹⁶ De ba daka ri enji daga si ku, Yesu isaa enji daga si kuru; ¹⁷ pi de Yesu enji daga si kuru, anyisaa anya a'i ekwi ako pi anyolu adi enji aga. ¹⁸ Dedini 'ba daka Yesu ni aga ri da kii isa. ¹⁹ De ama igeni Yesu ni aga ri te dini, amasa anda injwi si vudige dia ama i. ²⁰ Ki dia Kristo ni, o'a ati 'ba oda'ba ra ri pi dii ri, enga andaa ni da ga si ra. ²¹ Adusiki da a emukaa modi alu si si, onjika 'ba oda'ba ra ri di saa emu mo'di alu si. ²² Kelende 'ba borodu a dazo ra Adam ni aga ri ani, alua ri ani Kristo ni aga saa 'ba borodu avo enzia lidi. ²³ Ki modi alu alu andaa ovi si kolu mgbi: Kristo ni o'a atizoa ri i, 'ba Kristo dii ri pi adi enzia lidi Andaa emu zo rininga. ²⁴ Ileni vuga vu ni ti kudi loko, kesua kuke opi Rubanga ni Ataa di, kesua Andaa kuluga cara borodu ongu mori to borodu. ²⁵ Adusiku kulea Andaa kolu opi ga bili Andaa kufu oja baazi Andaa di ri epi borodu vuru Andaa paga. ²⁶ Oja rezi vulega rere kulea akenji ra ri da. ²⁷ Adusiku "Andaa ba nga borodu vuru Andaa paga," Ki de kujoru "Andaa ba nga borodu,"di ekwi na eriru ca ama ile modi nga borodu bare ibuga Andaa paga ri aru iyo. ²⁸ De Andaa kunde nga borodu ni di ni, kujoru Ngwaa ni andaanga si kumu kolu modi nga borodu bare andaa paga ri di i, ayosidu Rubanga kunde di na ni. ²⁹ Kusaa 'ba ake a'ini batisimu da dii ri pi kede aduninga? De 'ba oda'ba ra enga lidi ga kuru kwa rere na, ake a'ini batisimu na aduni? ³⁰ Dia ama tesaa nga injwi ri ni ga saa cidu aduninga si? ³¹ Mada oducidu si! Di nga bga rii ni recu maa bale anyaruge maa bazo Kristo Yesu ama Opi a ruge ri ani. ³² De kolu 'ba a rakaa ri ani, mesi oja dire nyaraga Efeso aga ri a ruge, ikonyi na kolu mani adu, de 'ba odakaa ra nga daga si ku na i? "Kulee akunyakii nga pi akumvukii nga, adusiku obusi odakii ra." ³³ Akulunjwa anyi ku: "Rozi kukaa 'ba injwi ri to kenji 'ba loso ri ra." ³⁴ Anyengwi lidi anyidi anda rini ga! anyebe enji edekaa ra! 'ba zi anya lelega kalende ni kii Rubanga ku. Majo nga dii ayosidu dinja kuko anyi. ³⁵ De modizi kujo, "'Ba oda'ba ra ri kunga lidi ni ingoni, ongu aia ru ni ovi kemu kolu ingoni?" ³⁶ Amyi rere mamali! Ori anya yile ri edo mbakaa ngbe rere kurukuru ku ki kulee kuda pa kudi lidi udi rini esu. ³⁷ Ori nyaa yile ri ru na gba ri mu nga ni ku, ki zipi to. Kecoru ovidu lucweri kusaa ngazi ngbwi na i. ³⁸ Ki Rubanga ke aini ru anda lekaa ri ani, ongu ke ori alu-alu ni ru ngbwiingbwi ri i. ³⁹ Ru twadu viru kuru. Ki, ru zi alu tema 'ba twadu ni na aa, pi ru anyukwa di saa ngbi, ongu zina ariinji di saa ngbi, ongu zina ebi dii tema. ⁴⁰ Ru rubu dii sa ngbwi pi ru vu dii sa ngbwi. Ki Eku ru rubu ga ri di ovi na alu ongu eku ru vudige ri di saa zina i. ⁴¹ Eku itu di ngbwi, ongu eku zina imba dii, pi eku zina lelego di saa ngbwi. Adusiku eku lelego alu ri di kuzwa zina ri di ra. ⁴² Ovi 'ba daka ra ri a enjikaa saa kemu kolu andaa ani. Ru sele vuru ri kumwa wa, ongu Ru engale ra vuru si ri kumwa kpe. ⁴³ Ase laruako du; enga andaa ni eku to. Ase andaa ni mori ako to; enga andaa ni mori to. ⁴⁴ Ase andaa ni ru isa rii; enga andaa ni ru endi dii. De ru isa ri aa, ru ru endi si rii saa aa. ⁴⁵ Cwiru ra, "Modi bile ati Adam i ri ecoru endi lidi ri i." Adam ni vulega ri ecoru endi lidi kere ri i. ⁴⁶ Ki nga endi si ri emu ati ni ku ki nga ru si ri emu ati ni, nga endi si ri kudi emu vule ga. ⁴⁷ Modi ati ri andaa ni modi vu di i, abi utu si. Madi erizoa ri enga rubuge si. ⁴⁸ Modi bile dutu si ri viru kii modi modi vudige ri to vi ongu modi engare rubugesi ri viru kii ba rubuge ri to vi. ⁴⁹ Ama ruvikaa modi bile utu si ri to vi ri ani, amevo amviru modi rubu ge ri to vi. ⁵⁰ Madinjii, maajo ngadi, ama ru pi eri to esukii opi Rubanga di ku. Pi nga mware wa riisaa esu nga mware kpwe ri ku. ⁵¹ Anyinde! kulea meetede anyini nga ruzure di ri a anda-anda: Avokii Odare twadu ku, ki avo ecoru kii twadu ra. ⁵² Avo ecorukii emiangwadu, mi cozo ri di ani, ture vulega ri a owuzo ri ninga. Adusiku ture ile kemu kowu, ongu ngbe 'ba oda'ba ra enga ai ru mware ku risi, ongu eco ama ra. ⁵³ Adusiku ru mware wa di dubasi kulea kusu ru mware kpe ri i, pi ru bile utu si di kulea kusu ru bile utu si ku ri i. ⁵⁴ Ki de ru mware wa di kusu ru mware ku ri, ongu de ru bile utu si di kusu ru bile utusi ku ri ni, ngbe nga cwile ra ama, "Da ni avu co mori na azwa ra" ri kemu kederu ra. ⁵⁵ "Da, nyaa okpo inguwa? Da, nyaa okpo 'ba ekozo ri inguwa?" ⁵⁶ Mori da di andaa ni enji, ongu mori enji di andaa ni cara. ⁵⁷ Ki anjo kolu Rubanga ni amani okpo kere ama Opi Yesu Kristo si ri ni! ⁵⁸ Disidu, madinjii maalele ndo rii, kulea anyede okpo ongu akolozwe anyi kpe. Tesaa anyelenju ibu Opi di ri ni ga, adusiku anyini ndudu ama anya ibu Opi ni aga ri laga isu ku.