¹ Olu nanira yesu ori romio ofo alura, sa oluri lago omirio, ‘banani awini ovi’ba ikiri ala ke’yo yesu ro odo osi ini amani roni esu yoane ri awiri ‘banani awini ovi’ba rika nini. ² Azi yesu ke’yo lu’baro odo iya nomiri omini, omiri ta romi ileni, ne’yo atha kwe miri ru kaku, kwe miri opopi keki. ³ Kichuluri inio kwe amani onyainini rina, ⁴ Yi amari injwi kale esu amari oyizo nini ‘banani o’du’ba owe ama injwi ru ileki, nondu amani oyi okaleku. ⁵ Azi yesu ke’yo lu’baro odo, iya sana amiri ala kolu awiri beregoro azi koki lagora inigo nalio, azi ke’yo awiri beregoro, mari berego, ekwe mani ususi kapile na. ⁶ Di a’dusiku mari berego ala oluri awiri awele lago ni esa manga’ba, esu mari nga ala kewe oluri mokwe aka. ⁷ Azi jori athe kakari lago nani jo nia ke’yo nondu mani I’dewuku, ilenini leth umorio mri on’yu’du ai maro ulari bwao, anga oru’doku ani akwe mini nga ala. ⁸ Iya ile menari amini ju sana lago onga oru’doku ani kokwe nga ala awiri beregoni. Ti di a’dusiku awiri berego kiri’diri awini twe, o’busi lago kongonga oru ani kokokwe nga ala lagoni esu awiri ondu zonini. ⁹ Iya ile meyo amiro odo izi okokwe amani, indu andu nesuri esu, igalethi andu opopi amini. ¹⁰ Di a’dusiku ‘banani lii azi’baki ka’yiri ai mo’di onduri ini kesuri esu, mo’di lethe nogarini opopi aka. ¹¹ Ami athasi a’di oluri iya ngwoa na ozi e’bi, azi e’biri ofo, okwe lagoni inini? ¹² De iya ozi auri ele azi okwe ithoni nani? ¹³ Iya ami ‘banani ninjwi ileki kononi on’yu’duni ngani nithani okweni o’busi athina amiri atha miri orurina o’busi kokokwe mo’di oluri ozio inini oyuru nithani. ¹⁴ Yesu odokale oyuru ninjwi oluri e’yeku, sa oluri oyuru ninjwi ekwi kaleo, azi mo’di oluri e’yoku nani kichuluri ari nongani, ‘banani lii oru ngakale. ¹⁵ Azi’ba alukwa ke’yo kenari’ba alukwani ke’yo yesu kudori oyuru ninjwini belejebula ri ombasi mo’di nagwi oyuru ninjwiri. ¹⁶ ‘Banani alukwa azi ki’bothiri yesuni kondu nga oluri keki oru. ¹⁷ Yesu oni lu’bari aside ri ario, kee’yo lu’baro, opopi lii api ruo ileki kosuri osu’ba oluri rio’ba ileni kossuri osu. ¹⁸ Iya satani angwi apiruo o’busi opopi na kolu ingoleni, di a’dusiku ami ne’yo mudori oyuruni ambamba belejebula ri ombasi. Amiri ‘banani kodo oyuruni kale a’diri ombasi. O’busi lu’ba konde aamiri ari nini. ¹⁹ Iya na mudor oyuru inijwini belejebula ri ambambasi, amiri ‘banani kudori oyuru ninjwini a’diri ambambasi ni, o’busi lu’ba konga amiri arimini. ²⁰ Ti iya ma monga ebuni oriri disi, ani mudo kale oyuru ninjwi, inoni odo opopi orirri esa kaleo amini. ²¹ Iya mo’di oluri ombaro otho lesiri ngao, azi kothe awiri joni, andu awiri bgali andu kolu osuru. ²² Iya mo’di ala oluri ombaro oluri kope awini ekio azi kesi lagoro, azi ombana kope awini andu kogu awiri nga lesiri kani oluri koni awiri runi ikozo ilekira. Azi kori ikozo awiri epakana ki napapi. ²³ Wai oluri olu mari andaku ini kesesi maro, wai oluri ononu maro ofo nalube ini kirari ira. ²⁴ Dingi oluri oyuru ninjwi eki kaleo mo’diri ru lelesi, azi kawe ofo oluri iyi akake kondondu ofo orizo ovwa, iya adi esu ofoku, andu ke’yo ma andu mongogwi manga’ba oluri meki akalelesi. ²⁵ Iya andu osao, azi kesuri jonani azi keweri jonanini twe osuru ithethena intharu. ²⁶ Andu awi kokoki azi keziri oyuru aalukwani tuderi o’du’ba injwika kope awini andu kokwi ithithi azi kori ichaka na. andu olu mo’di naniri mukona kotha injwiru twe kope anthiri nani. ²⁷ Yesu ri arinakini ochosi, mo’dini izi ala ‘banani nia ke’yo oru twe yesu ro, odo mo’di zina mini othiri ileni oluri indu ibanani kolu asidiri oforo twe. ²⁸ Azi lago ke’yo odo sana ne’yowi mo’di oluri keri arini o’du’ba oriri azi kororu asidini o’busi kofo twe oriri e’yo nerisi. ²⁹ ‘Banani ri romiasi yesu ri anda, azi yesu ke’yo lu’baro ‘bani nandi, inini rika, ‘bani ninjwi. Lu’ba kondu nga efu’bani, ti o’busi nga efu’ba ena akaku ti nga efu’ba yona rika. ³⁰ Esu anda yona ri nga efu’ba rika niki’baanani na ninewe na, iya ile ma ngwoa mo’diri o’busi kolu efuru’banani oluniri kara. ³¹ Osi nagwi anda orule rina o’busi kongonga oru ani arini olizosi ‘banani o’du’ba oluni rika, o’busi oli arikani injwiru. Di a’dusiku lu’ba anda kevo buri muko, ari neri kongo solomona rika. Iya ile inde ta nga nagwi awa oluri kopope omba solomona rina. ³² Banani ninewe ri o’busi kongonga oru ini arini olizosi, ‘banani inini rika, o’busi arika oli injwikaru, di a’dusiku lu’ba kufuri asidini yona rirusi, iya ile inde ta nga nagwi o’du’ba owowe iki o’du’ba kopope yona rika. ³³ Mo’di ala kewe oluri kiliri asini, azi kambwe ri kale ebosi de kumori ebosi kale. Ti kideri oru ani ‘banani kondonde o’du’ba joni ariki. ³⁴ Miri mi oli miri ruri, angwi miri mi ithana ru minara iya onga twe ofosi. Ti iya miri mi injwinaku angwi miri ru kolu inigoru. ³⁵ Iya ile nde nga osuru ofo miri ruri nasi kondu olu inigoruku. ³⁶ Iya miri ruli oga ofosio, anda ala kewe oluri kolu inigoru, obusi lii kolu oforu esu asiri olizoni twe ouru awiri ofosi. ³⁷ Dingi oluri yesu iko ario, azi parusigo ala kungweri yesuni onya awiro ofo nalube. Azi yesu kokwi jo oria bwa onya. ³⁸ Parusigo oru nga twe awiri ondesi oluri adi yesu ujwe diku athirisi awiri onya ni ichulusi. ³⁹ Azi osi yesu ke’yo lagoro, ami parusi ‘basi, o’du’ba kujweri erepeni ai ejaro, azi amiria ana oga twe arasi ngani injwiro. ⁴⁰ Ami ‘bani o’du’ba oni nga alaku, mo’di ‘banani no’dwe’ba ngona kodwe angweni ‘dute azi adi o’dwe ithithiku. ⁴¹ Iya ile ikwe ta nga o’du’ba ithithiri ka iki okweru inde ngali o’busi kolu itharu amini. ⁴² Ata ami parusi’ba, ami nokwe anda ala ni nana ri ai olwero oluri olo, ai ibebiro lii oluri kithuri onyani, azi noyi arini olini tiriri ai riyero oriti naro, ileki nga o’du’ba sana nowowe iki azi koyi alukwani o’du’ba adi oweku iki. ⁴³ Ata ami parusi ri’ba, ami niyeri gara athiri kani jo romia leni angwi kiyeri okini otiti oyo rigele. ⁴⁴ Ata ami no’du esu‘budi nini oluri kolu esu nga oluri oniku inini. Azi ‘banani kawe anasi, oniku od’budi ile ilia. ⁴⁵ Mo’di nagwi ala oluri konde arini mose rika, kakari yesuni ke’yo yesu ro ni nilalaka ama twe. ⁴⁶ Azi yesu kakari lu’bani ke’yo mata ami agwi ariri ami nimwe ‘banani ni nga nagwisi twe oluri o’diku ogule amiri alari anyukwesi. ⁴⁷ Ata ami o’du’ba no’dwe amiri agwiri guluni o’du’ba abiki amiri ududa aka riki. ⁴⁸ Azi nakari olu o’du’ba amiri abi anda oweo iki lu’ba idida ’banani e’yo noni‘ba iki azi ko’dwe gulukani. ⁴⁹ Di ilenisi ambamba oriri na ke’yo odo o’busi awi kezweri lu’bani agwini al’banani ozwekana ikiro, azi o’busi kidari lu’bani o’du’ba airika, azi o’busi kichandiri lu’bani. ⁵⁰ Di ilenisi ‘banani oluni rika o’busi kingwiri eri banana lii ariri dio o’du’ba udau iki, kichuluri bu no’dwele na. ⁵¹ Kichuluri ebele ni dale ai jakariyaro agaga ofo thetheka knothole ai ofo nitha oluri ororu. Menari amini odo eri ileki lii o’busi ingwiri ingwi ‘banani oluniri kara dika. ⁵² Ata ami agwi e’yo noni’ba, inu kaleo nga lethi nopizo oluri ‘banani kokwi aka ari neni, ami, amiri rusi adi ikwi akaku. Azi nitengori ‘bananini o’du’ba sana kokwi aka. ⁵³ Dingi oluri yesu ekwi kaleo jonani ra lelesi, ‘banani e’yo niniba mose rika ai parusi rikaro kichuluri riri’dini airi erorika kuziri yesu ni e’yo na’bisi twe. ⁵⁴ Kimoririni lagoni nichani, ani koru awi, nga oluri yesu ko’yo’yo iki.