¹ Azze kiru yesu kothuw b’eah olive rina nane nidii. ² Ama kossa a ie ri ‘se ‘bu’bu ku’se bou adi aneetheryru azze angwi lago kessa orri ri jo romomyile nane ri akulogo, azze lago korei bouwa azze kinne ri lob’a ne wo. ³ Ilia wo azze mo’se ri kakoko nine rib’a pi Jewb’a ri bukuka ro azze keazee ri mod’i izina ne oloro oruu thoworo azze kob’a nena napa ne keddeh agaga wo. ⁴ Azze lob’a ko’jo lago ni oddo, “rinne natha, acho mod’i izina ini oruu kowe thoworo ne. ⁵ Kiru elenini kakoko niah wa, mo’se iyuyuko amma oddo mod’i nizi ovwi eleni mowa kale any’se. ya kiru me rinane no’jo ad’unga ne?” ⁶ Lob’a ko’jo ileh kokka lago ning ne, anyi biya keazee kang’ong’o alokwa lago ning’ong’ozo anyo. Azze yesu kod’i dii ne bowa azze kid’ala ri iwro ne ing’a nidii wo awery de ningwa’se. ⁷ Ama ku’se ge adi lob’a kitunyo ri lago nozyi ne munyieru, azze lago kongi dii ne orou azze ko’jo lob’a ni oddo, mod’i oloro ammi ri agaga niah oloro ndo ge adi ossurossuku awe kowa ony ne athii nena napa ra.” ⁸ Angwi azze kod’i dii ne bouwa azze kiwro ri ing’a nidii. ⁹ Kiru nyopa napa eleni’se, azze lob’a kovvo kale wo alobe alobe, id’ala buluka nagwii ra lele’se. kiru oyee lago d’ule wo mod’i izina napa ro lago ri andanda. ¹⁰ Ilia wo azze yesu kongi dii ne orou azze ko’jo nena napa ni oddo, “me nena, lob’a eleki ingole? Ya alla alobe adi imwo me roku?” ¹¹ Azze nena napa kakkah oddo, “Ju alobe adi, imwo ma roku bulukago” ilia wo azze yesu ko’jo oddo, “ju ma angwi mimwo roku. Inga ki wo, (angwi) nodo rossu alla nowe quwo towe quwak.” ¹² Azze yesu kong’a lob’a ni angwi ko’jo oddo, “ma milili ri offo. Mod’i oloro kovwi ri ma rib u ne eleh andu away ofo naneethery niah quwo, ama eleh andu kolow offo lidy rina ra anyo wo.” ¹³ Ilia wo azze Jewb’a ri buluka kapa ko’jo lago ni oddo, “achobo me noryi me ri ruw ne anyo d’ule, kiru me ri oddo, “achobo me aryi napa thokiku.” ¹⁴ Azze yesu kakkah ko’jo lob’a ni oddo, “Ju eya ma moryi ma ri ruw ne anyo, ma ri aryi napa kolow thoki, ko’bwo ma monone eya ma meaki ingo ri lele ‘sena angwi eya eleh ma moki ingona. Ama ammi inneku eya ma meaki ingo ri lele’sena eyabo ma moki inona. ¹⁵ Ammi rikaki nolii lokiko ne foro, ama ma rinane alii mod’i alla ri lokikoku. ¹⁶ Azze ju eya ma andu molii lokiko ne, oggo ma molii lokiko napa ne thoki ka’bwo ma d’uleku, ama amma athema ma neab’b’u ri nane ro. ¹⁷ Eyo, azze achobo ammi ri kakoko napa nan era iwro aka oddo agoo kapele reek karyi thoki. ¹⁸ Ma awe oloro moryi ma ri ruw ne ma, angwi athema oloro ma neab’b’u ri nane koryi ma ne.” ¹⁹ Lob’a ko’jo lago ni oddo, “anyi atheki napa ingole?” azze yesu kakkah oddo, “ammi inne maku angwi andu ammi nonne athema ne onne.” ²⁰ Lago o’jo ari kapa eleki ofo okwe nub’ub’ale nane ra easu andda awery rinnezo nini orri ri jo romomyile nane niah, azze kiru mod’i alla adi oruu lago quwo ko’bwo lago ri lao adi essaku. ²¹ Ilia wo angwi azze lago ko’jo lob’a ni oddo, “ma wi moki kale wo, azze kiru eleh andu ammi nonduw ma ne wo azze eleh andu nuddaa ammi ri rossu napa’se wo. Ofo oloro ma moki aka nane, ammi neassa aka d’oku.” ²² Azze Jew ri b’anny kapa ko’jo oddo, “ya lago kondu ruw nidda ne kale wo? E’jo awery ojo kana oddo, ofo oloro ma moki aka nane ammi essa aka d’oku nane’se.” ²³ Azze yesu ko’jo lob’a ni oddo, acho ammi rikaki bubu ri lele’se, azze kiru ma rinane ororou lele’se. ammi milili ini rika, kiru ma rinane milili ini rinaku. ²⁴ Eleni awe, ma mo’jo ammi ni d’ise anyo oddo eleh andu nuddaa ammi ri rososu kapa’se wo. Ko’bwo eya adi ammi newo oddo ini maku, azze eleh andu nuddaa ammi ri rososu kapa eleki’se wo.” ²⁵ Ilia wo azze lob’a ke’jo lago ni oddo, “me ad’i da?” azze yesu ko’jo lob’a ni oddo, “ma a’jo ammi ni ad’unga rid’alale lele ‘sena anyo. ²⁶ Nga ab’iru od’ub’a ma mong’a ammi ni azze molii ammi ri lokiko ne wo. Achobo, lago oloro ma neab’b’u ri nane thoki, angwi nga andda ma ri eari kana lago ra lele’se kaki, nga kappa eleki achobo ma a’jo milili ni oho.” ²⁷ Kiru lob’a adi ikokoroku oddo andda lago kong’a lob’a ni atheh ri kiw ne anyo. ²⁸ Azze yesu ko’jo oddo, “Eya andu ammi nongi mod’i ri ngwago ne ororu wo, azze kiru eleh andu ammi nonne oddo ini ma, angwi nonne oddo adi ma awe nga ma ri ruw’se d’uleku. Easu athema ri rinnezo nini, kiru ma mong’a nga kapa eleki ne anyo. ²⁹ Lago oloro ma neab’b’u ri nane ma ro wo, angwi lago adi oyee ma d’uleku, ko’bwo ma mowe nga od’ub’a kokwe lago ni lonya ne anyo, daly leabithi.” ³⁰ Kiru easu yesu ri nga kapa no’jozo nini wo, azze b’anny nab’I kewo lago ra wo, ³¹ Kiru azze yesu ko’jo Jew ri b’anny od’ub’a ewob’a awe raka eleki ni oddo, “Eya ammi nasse ma ri aria anyo wo, azze kiru eleh andu ammi nolow b’anny ma ri inne kanaru anyo wo; ³² Azze kiru eleh andu ammi nonne thokithoki ne wo, azze kiru thokithoki napa eleh andu kokwe ammi nolow kala anyo wo.” ³³ Azze lob’a kinyopa ri lago ne oddo, “Amma aburamu ri licho angwi ge oggo adi molow mod’i alla ri nyaa ruku towe quwaki, anyi kiru me no’jo oddo, ammi eleh andu nolow kalla ad’oh?” ³⁴ Azze yesu kakkah ri lob’a ne oddo, “thoki, thoki, achobo ma mo’jo ammi ni oddo, b’anny leebithi odu’ub’a kowe rossu neka eleki rossu ri nyaa. ³⁵ Nyaa asse b’ahku nyonyo; ama nywago rina kase b’ah nyonyo wo. ³⁶ Ilia wo, kiru eya nywo oyee ammi kala oho, acho kiru eleh andu ammi nolow kala wo. ³⁷ Ma monone oddo ammi aburamu ri licho, ammi nondu ma ne iddale kale ko’bwo ma ri ari ri ofu ammi ra keway. ³⁸ Ma mo’jo ngo oloro ma monddeh athema ra, azze ammi, angwi nowe nga od’ub’a neari ri ammi ri atheeh ra lele’se.” ³⁹ Azze lob’a kakkah azze ko’jo lago oddo, “Ammary ab’b’i aburamu.” Azze yesu ko’jo lob’a ni oddo, “Eya ammi Aburamu ri erebi, sona nowe Aburamu ri eab’u ne anyo. ⁴⁰ Kiru, eelenini ammi nondu ma ne iddale kale, mod’i oloro kenna ri ammi ni anyo oloro ma ma meari ri orri ra lele’se. Achobo andda adi Aburamu owe ilehku. ⁴¹ Iwetua ammi ri atheh ri eab’u anyo.” Azze lob’a ko’jo lago ni oddo, “Adi othee amma thoworo ‘seku, Ammary atha alobe: orri.” ⁴² Azze yesu ko’jo lob’a ni oddo, “Eya sugo orri ammi ri atha, so ammi niyie ri ma ne niyie, ko’bwo ma adi meaki ma ri ruse d’uleku, ama awe eab’u ma ne. ⁴³ Kiru ammi nikokoro ma ri ari kapa kad’uda? Acho ko’bwo ammi neari mari ari kapaku. ⁴⁴ Ammi rikaki ammi ri atha, setan, angwi ammi nonduw nowe od’ia ammi ri atheh rika ne anyo. Lago ridda ri mod’i id’ala andda rid’ala ri lele ‘sena azze lago ole eddeh thokithokio anyoku ko’bwo thokithoki lago rake. Eya lago kong’a ari ne diya kong’a lado ne anyo, lago kong’a awery ari ri kaka ne anyo ko’bwo lago lado ri mod’i angwi lado rib’a ri atha. ⁴⁵ Kiru, ko’bwo ma mong’a thoki wo, azze ammi newo maraku. ⁴⁶ Ad’i ammi ra ilia kichandi ri ma ne ichandi rossu ‘se ne? eya ma mong’a thoki, kiru ammi newo maraku ad’u da? ⁴⁷ Lago oloro orri ri keari ri orri ri arari ne anyo; ammi neari apiku ko’bwo ammi orri riku.” ⁴⁸ Ilia wo azze Jew ri b’anny kakkah kiru ko’jo lago ni oddo, “Adi amma ajoku thoki oddo me ‘samari itago azze angwi setan kolow me ra anyo?” ⁴⁹ Azze yesu kakkah oddo, “setan mara keway, ama ma miwah ri athema ne anyo, azze ammi nimena ri ma ne kale anyo. ⁵⁰ Ma anduw akku mana makku, mana maku; mod’i alla eleh aka awe konduw angwi kolii lokiko ne ne. ⁵¹ Thoki, thoki, acho ma mo’jo ammi ni oodo, eya mod’i oloro kiruruka ri ma ri ari ne, ku’se eleh andu awe anddeh oddaku.” ⁵² Azze Jew ri b’anny kapa ko’jo ni oddo, “acho elenini kiru anne oho oddo me setan. Aburamu odda oho angwi mia ri b’anny oddaa oho; azze kiru me rinane no’jo oddo, “Eya mod’i oloro kiruruka ri ma ri ari ne, ku’se eleh andu id’ed’enya oddaku.” ⁵³ Me thumogona toweku ipeh amary ab’b’I aburamu oloro odda r inane d’oku, deah me nopopeh d’o? angwi mia ri b’anny pi ro oddaa oho. Ya kiru me rinane nowe ruw na ne anyi nolow ad’i?” ⁵⁴ Azze yesu kakkah oddo, “Eya ma mikku ri ruw ne anyo, ma makkuku, athema awe kikku ri ma ne ne – oloro ammi no’jo oddo lago ammi ri orri nane. ⁵⁵ Azze ammi adi inne lagoku, ama ma monne lago ne onne. Eya ma mo’jo oddo, “ma anne lagoku, ‘ku’se eleh andu ma mede easu ammi niku wo, lodo ri mod’I wo. Achobo, ma monne lago ne onne angwi miruruka ri lago ri ari ne iruruka? ⁵⁶ Achobo andda ammi ri ab’b’i napa aburamu inyonyori ma ri inne nonddeh ‘se oho; lago andda onddeh inne napa azze kolow lonya’se wo.” ⁵⁷ Azze Jew ri b’anny kapa ko’jo lago ni oddo, “achobo me ri kii adi ossa mudi thowku, azze me nondde aburamu ne?” ⁵⁸ Azze yesu ko’jo lob’ani oddo, “thoki, thoki, acho ma mo’jo ammi ni oddo, athii ku’se ndda adi aburamu keway, azze ma aka.” ⁵⁹ Ilia wo azze lob’a konun ony wo anyi kowa lago, azze yesu kombwe ri awery ruw ne azze koqui angweh orri jo romomyile nane ra lele’se.