¹ Ero naŋ dede to Kristo, ta taji nanaŋ etuhutek hijo owuon Oyiri lo Olibo ika naŋ, ² nyo obolo diahai ta taji nanaŋ ojo hidofe higigilo nobolo te'tai halasira hanaŋ hullo te Isarail. ³ Aremik naŋ wahan hapiahari tara Kristo ade amai no hima ta mai ne ilasira hanaŋ. Ara isia hiyyo ille Isarail. ⁴ Ellilloŋo Hollum isia lonyirok honyie. Etahwo isia, esio imuniti, hifahita, hituhutita ojo hitieriti. ⁵ Owuon hohonyiok hose illafa esuruni Yesu Kristo. Tojio hetihabwe Hollum ille agalik hirro daŋ tulaŋ. Amen. ⁶ Abe naŋ ajo hijo, opwak iso itieriti inno Hollum. Nyo ille esuru te Isarail obe isia daŋ ara lonyimot illo Hollum. ⁷ Ojo hidofe daŋ ille esuru tara Abramo obe isia daŋ ara lonyirok honyie, nyo otiorok ifa Hollum hijo, "Ehenuni iso illa afanu tara Isako hame." ⁸ Etuhutek innaŋ hijo obe durre illo wan ara adurre illo Hollum. Ati ehiana Hollum lonyirok illo otiorit honyie hame. ⁹ Nyo otiorok ifa Hollum hijo, lottubai holoŋitek: Atiorok iso naŋ ta far inna attu iso naŋ, ojo iso Sara orrumu hiito." ¹⁰ Hidofe, owodi ifa Rebeka lonyirok illohonyie lohorik to hohonyi hohoi Isako. ¹¹ Holobe ifa turet illia esini, onyirok Hollum isia to koi inno lafanu isia amanyari. Obe ifa ara te igem nia onyimuni isia, ati Hollum lia ara aheliloŋoni lawak. ¹² "Elimak ifa Hollum to Rebeka hijo, "Ottu iso lettok hira a hegiamani to letiŋ." ¹³ Iyya nia egioro hijo, "Amuno naŋ Yokobo, ati aliwari naŋ Isau." ¹⁴ Hejo iso iyyohoi jai? Obe Hollum obis? Hotobiaŋa ara ania. ¹⁵ Iyya nafa erarari inyia to Musa hijo, "Amehini iso naŋ to lia awak naŋ amehini, ajo iso hidofe naŋ egiem nalanyar to lia owuon himorot ta hanaŋ to honyie." ¹⁶ Obe ara to wahan no tuŋani iko to higiama honyie na anyar omehini Hollum, ati ara to wahan no Hollum. ¹⁷ Nyo ojo higierita hijo ta Faro, "Eniefiak ifa naŋ iyye ahabu lettok hijo anyar etuhutek naŋ to hoi golon nanaŋ iko kuatan no fure nanaŋ ellur fau daŋ." ¹⁸ Omehini Hollum hullo awak inyie hamehini ojo etik hullo awak inyie hitik ojo hidofe etidefer illa awak inyia hitidefer tajia. ¹⁹ Ojo iso lobo lahatai ta hanaŋ, ojo ati Hollum nyo odule hitipala iyyohoi? ojo ŋai ebo hiram nohonyie? ²⁰ ŋai nyi iyye do. Libe no tuŋani enyiak iyye hiro to Hollum. Horemik iso sihin inna no oyyeu hayyani hijo to monye lara hayyani hijo, "No nyo eyyeu iyye nayya tiji?" ²¹ Hobe mahu monye ho modie oremik hehumak modie nohonyie iyya awak inyia, atta hidofe ayyari hirro inno olibo to honyie, ojo nobo ihulo owuon ne egiamari hiyyo holoŋitek daŋ? ²² ŋa ladumu Hollum atta ŋetuhutek jore nohonyie ojo hifiriwa hotoliew, ottuni inyia hiram no jore nohonyie bi ne ehuhum inyia hetiruori. ²³ ŋa legiem inyie hidofe ania hetatturori lohuo no hamehini nohonyie, nafa ehumak inyia ahosiere ano lobie nohonyie. ²⁴ Ojo hidofe iyyohoi, illafa ellilloŋu inyia, obe ara to Yudei ati iko illo Jentail? ²⁵ Iyya ojo inyia to Hosea. "Ellilloŋo iso naŋ isia hiyyo illallaŋ illafa obe ara ahiyyo illallaŋ, ojo illafa abe naŋ amuno. Amuno iso naŋ. ²⁶ Ojo ifa Hollum to paganohien, ebe itai era a hiyyo illallaŋ. Ati iyyania ellilloŋo isia alonyirok illo Hollum hawuarani." ²⁷ Oyio ifa Isaya to hiyyo ille Isarail, "Obore ida hido durre illo Isarail iyya siŋata no hutuk na hari, eduhucio iso ille etilohini. ²⁸ Nyo oŋot iso Habu hirro inno hiyyo kokwak to golon nohonyie inna ta fau. ²⁹ Iyya ojo ifa Isaya beren, "Kuyya nobe ida Hollum esio iyyohoi lonyi honyie, hera da iyyohoi iyya Sodoma iko Gomora. Hibo no hiyyo ille Isaraile sayye.'' ³⁰ Eijo iso iyyohoi jai? Paganohien illafa obe egigilo to hijufuta hilibiti, hunna leniefu hikoi no libe to huruk. ³¹ Ati Isaraile illafa etufa hikoi no olibo opwahan obe orrumu hifahi no bisan. ³² Nyo ati obe isia orrumu, obe isia orrumu nyo obe isia etufa to huruk. Ati etufa isia te igem atta arrutari to moro ne'rrut. ³³ Iyya egioro to higierita hijo, "Itirriŋai, ettek naŋ moru to doŋe no Sion nele'rrut hetarrutai hiyyo. Ati ille eruk wan to honyie obe iso orrutari.