¹ Halasira hanaŋ, awak nayya isia bi nono tataji neti ajo hidofe nayya amojo to Hollum to hetilohini nohosie. ² Nyo arrumek nayya hijo owuon isia iko iduwanyit no Hollum, inna obe ara to ofioroho. ³ Obe isia oyyen ilibiti no Hollum, ati awak isia higiama hijo anyar etiwetik ilibiti innohoise to Hollum. Obe isia effaha to ilibiti inno Hollum. ⁴ Nyo eyyani Kristo hisidi no hifahita no libe to heruhok hullo eruk to libe. ⁵ Nyo egiorok ifa Musa hijo, "Iyye tuŋani le errumu libe to hifaha no hifahita, ewuar iso iyye to hifahita inno olibo." ⁶ Ati ero libei nia ottu to huruk hijo, "Baŋa lero ta taji nohoi, 'ŋai iso mahu orre edo?' (etihutek hijo, le eyyani Kristo enni afau). ⁷ Baŋa lero hijo, 'ŋai iso lohu etidietu Yesu to ye?"' ⁸ Ati hojo sihin nia nyo? "Eliaha hirro ta hatai, to hutuhe hatai iko ta ta tajia hatai." Inyia hirro no hiruk, inna etiyana iyyohoi. ⁹ Kuyya to hutuhe inna hatai emijak itai hijio ara Yesu Habu, ojo hidofe itai eruk ta tajia hijio etibuhu ifa Hollum inyia to ye, ati etilohini iso itai. ¹⁰ Ta taji eruk tuŋani te ilibiti, ojo to hutuk eruk inyia hetilohini. ¹¹ Nyo ojo Baibol hijo, "Iyye lobo tuŋani leruk to honyi ebe iso iyye eloliri." ¹² Obe nobo lufai to Yudea iko Grik. Ati ara Habu lia Habu lo hosie daŋ, owuon inyia to hiyyo illo ellilloŋo to honyie. ¹³ Nyo lia ellilloŋo to fure na Habu ohu iso inyia hetiluwahini. ¹⁴ Hofu iso isia hillilloŋo jai to honyi lia ille obe isia eruk? Ofu iso isia huruk to honyi lia obe isia etiru? Ojo hofu iso isia etiru lobe herarani? ¹⁵ Hero iso isia jai, lobe isia efahu?--Iyya nia egiorohini, "Elahaman hejek inno ilia hullo hayitak ho sayyie inno olibo!'' ¹⁶ Ati obe isia etira daŋ to sayye. Ero Isaya hijo, "Habu, ŋai lia eruk to hirro innohoi?" ¹⁷ Ati ottu huruk tara hitira to hirro no Kristo. ¹⁸ Ati ero nayya hijo, "Obe isia etira?" Etiru ifa isia dede. etirini ifa hiwoloŋita innohosie man ta fau, ojo hirorita inohosie atta hiba to hucuŋi na fau." ¹⁹ Ati ero nayya hijo, "Hobe ifa Israil oyyen?" Ero ifa Musa to hosiere hijo, "Etifitaŋ iso nayya itai to hayini ne illulluŋ inna obe ara hiyyo inno doŋe. Te iluluŋ no hiyyo iko to biaŋan no hitira, ahu iso nayya hitifitaŋ itai hijo anyar ejoria itai." ²⁰ Ero ifa Isaya toŋere hijo, To hiyyo hullo obe osiaha nayya orrumu iso isia nayya. Etiliek iso naŋ wan nanaŋ hiyyo illo obe efia nayya." ²¹ Ati to hiyyo inno Isarail, ero inyia hijo, "Ahu iso nayya adule hihalama has innanaŋ to hiyyo hullo omiasa iko to illo odua tajia."