1
Teyya, enyie nobo ye no oŋot hiyyo te ilia illo owuon to Yesu Kristo.
2
Te imanyiti inno Oyiri no wuaran to Kristo Yesu ahek inyia nayya tara manya ne iyyau iko ye.
3
Nyo ehum Hollum sihin no obe hifahita oremik hihum nyo elik watik innohosie. Atta inyia efahu Lonyi honyie iyya heyyani hijo hatara ahisiorita ne iyyau. To nia atta inyia attohe iyyauno to wan nohonyie.
4
To nia eremik iyyohoi hifaha ifahita, iyyohoi hullo ebe elot te iwahiti inno duaran ati to duaran no Oyiri lo Olibo.
5
Nyo ilia illo olot te iwahiti inno wan, egigilo isia te imuniti inno wati innohosie. Ati ilia illo olot te iwahiti inno Oyiri ne egigilo isia to hirro inno Oyiri.
6
To koi inno egigilo tuŋani iyya ye, ati to koi inne egigilori Oyiri inyia wuaran iko himwara,
7
nyo to koi inno tuŋani eyyani hira mereni to Hollum, ati obe olibo te imanyiti inno Hollum, kuya ara iso iyya.
8
Ilia arra to tuŋani obe oremik hitimuno Hollum.
9
Ati te inyia, obe iyye emanya to tuŋani ati to Oyiri, lara dede hijo amanya Oyiri no Hollum to hoi. Ati lobo tuŋani lolobe iko oholio na Habu, obe inyia ara tuŋani lo honyie.
10
Lowuon Habu tohoi, oye wan to hiyyata, ati owuar Oyiri te ibisiti.
11
Owuon Oyiri no honyie nolia ille etidietu Yesu to ye amanya to hoi, inyia lia ille etidietu Kristo tara ye esio iso hidofe manya nolowuar to wati tara Oyiri no honyie, na amanya tohoi.
12
Ilasira hanaŋ iyyania, era iyyohoi ahiyyo illo horos ati ebe iyyohoi era ahiyyo illo horos no wati hejufutari imanyiti inno wati.
13
Nyo ejufuta itai imanyiti inno wati ati eye iso itai, ati lattohe itai hihumita inno wati to Oyiri, ewuar iso itai.
14
Nyo ille edihori Oyiri lo Hollum, ara isia onyirok ho Hollum.
15
Obe itai ara apiti hullo obe abaŋ, ati ara itai lonyirok ho Hollum to Loyiri ne esio Hollum ta hatai, atta iyyohoi hillilloŋ, "Monye hohoi.''
16
Oyyen Oyiri to wan no honyie hijo era iyyohoi durre illo Hollum.
17
Ara durre, ojo hidofe harutak, harutak illo Hollum iko hani nobotie, ojo ottubahini ho harutak iko hani nobotie iko Kristo, ara dede hijo etaban iyyohoi iko inyia, ati etahuo iso hidofe iyyohoi he inyia.
18
Iyya egigilo nayya hijo hitaban ne iyyania obe ara nolibo anyar eticelik iko kwatan noleu tohoi iso.
19
To hiwak no hitila iko heyyik ne hetiliek no onyirok ho Hollum.
20
Elohitohori run iyyeti daŋ, obe ifa ara to wahan nohosie,
21
ati ara ifa to wahan no Hollum lia ara a Habu lohosie, ati owuon iyyeti iko heyihini hijio ohek iso isia hifita no run atta afanu manya to kuatan no durre illo Hollum.
22
Eyyen iyyohoi man iko iyyania hijio esuduta iyyeti daŋ hidofe eburaŋita iyya hiito noŋoruwo na awak hitado.
23
Obe ara iyyeti hame, ati hisuduta nohoi ta tajia innohoi , ŋefwotu ida iyyohoi Oyiri nafa ara hiiteri no hisiorita inno Hollum.
24
Esuduta iyyohoi ejo hidofe etila holoŋ no omojuni iso Hollum iyyohoiadure illohonyie na lara hahohini na wati innohoi. Nyo etilohu iyyohoi to heyihinin. Iyyania heyihini no oleu obe ara heyihini, ŋai lia eyyik to hirro inne egonyu inyia?
25
Ati le eyyik iyyohoi to hirro huna ebe iyyohoi egonyu, ati etila iyyohoi to dihan dee.
26
To hikoi lobotie, oluak Oyiri hidofe to hilik no hoi. Ojo iyyohoi obe eyyen hijo emojo iso iyyohoi jai, ati ojo Oyiri to wan no honyie oluaha te iyyohoi te idiehiti.
27
inyia lia etufa tajia oyyen ofioroho inno Oyiri no Olibo, nyio oluaha inyia to fure no heruhok iyya to wuahan no Hollum.
28
Eyyen iyyohoi hijio egiama Hollum to hirro daŋ anyar eyyani libe to liya hullo omuno inyia, ojo ille ellilloŋo inyia to wahan to nohonyie.
29
Illafa oyyen Hollum, onyimu ifa inyia isia hehuhumari iyya Lonyi honyie hijio anyar lara Lonyi honyie aloŋieu te ilasira honyie illo oluŋa.
30
Ellil,oŋu inyia lia illafa ociorohini daŋ. Te ilia hullo ellilloŋu inyia, etimworik hidofe te ilia hullo etimworik inyia esio inyia kuatan nohonyie to hosie.
31
Ejio iso hidofe iyyohoi nyo to hirro huna? ara Hollum lo hoi, ŋai lia obe awak iyyohoi?
32
Iyye lia obe ewuon ho saman iko hawuanari ho hiito lohoi ati isiara inyia ade te iyyohoi daŋ, obe iso inyia hidofe iko inyia ania hisio iyyohoi hirro daŋ?
33
ŋai lia oremik arrosok nobo hiram to lonyimot illo Hollum? Etimorik ifa Hollum isia.
34
ŋai lia oremik enyiak aŋotok to honyie? Obeŋ lobo. Ara Yesu Kristo lafa oye hidofe ebuhu atta hittole ta hani inyiet no Hollum, lia omojo te iyyohoi.
35
ŋai iso lia etipiek iyyohoi ade tara mune no Kristo? Hara hitigiama, kuya hiŋa, kuya aŋatture, kuya irruti, kuya hitilafuho iko demi iso?
36
Iyya le egioro hijio, " Te ilibiti innahatai, ottohe hiyyo iyyohoi daŋ to holoŋ nafa nya. Ati ewuon iyyohoi iyya kioro hunna ara oŋotot."
37
Ati eyyale iyyohoi hirro hunna daŋ to lia omuno iyyohoi daŋ.
38
Nyo ayyen naŋ hijo obe nobo sihin oremik hitipiek iyyohoi to mune no honyie; obe, ara ida hido ye, wuaran, anjilohien, letaha ilo johien, iduwariti, hirro huna oyiif, hirro hunna afanu, igoliti inno johen,
39
hirro niyya te idou, hirro hunna ta fau, kuya nobo sihin te iyyeti daŋ; to hirro hunna daŋ, obe nobo oremik hitipiek iyyohoi to mune no Hollum no lowuon to Yesu Kristo Habu lohoi.