¹ Holobe itai eyyen, (ero nayya to hiyyo ille eyyen hifahita), hijo eniefita hifahita tuŋani ta manya nohonyie daŋ? ² Efita hiito noŋoruo na ayama to hifahita to oliawa halamanya oliawa honyie, ati lo oye oliawa honyie, ebusahini inyia to hifahi no hiyama. ³ Ojio halamanya oliawa honyie, le eno hiito noŋoruo manya ho lobo hiito oliawa, atta inyia hira esomo. Ojio lo oye oliawa, atta inyia wuana ho bolioŋ tara hifahi, obe inyia enyiak hira esomo le eno inyia manya ho lobo tuŋani. ⁴ Iyyania, halasira iko hanasira hanaŋ, aye ifa itai to golon no hifahita nafa eyeri itai iko Kristo. Ati iyyania attube itai iko tuŋani lafa ebuhu to ye. To nia, eremik iyyohoi eŋarak igemita inno olibo to Hollum. ⁵ Nafa helewuon iyyohoi to wati innohoi, egiama ifa iwahiti inno wati innohoi, etidioto ifa hifahita iwahiti hunna orru man eŋarak igemita inno orru man eyyani ye te iyyohoi. ⁶ Ati iyyania ahehini iyyohoi bolioŋ tara hifahita. Aye iyyohoi te inyia nafa efit iyyohoi. Hijo anyar egiama iyyohoi to hirro hunna ara ŋejuho to Loyiri, obe ara to hirro maruahi inne egioro to hifahita. ⁷ Enyiak iso iyyohoi hijo jai? Hara mahu hifahita ta wati te innohosie iyyau? Hotobiaŋa ara ania nobo. Na abe ifa nayya ayyen iyyau, nobe ifa ara to hifahita. Na abe ifa nayya ayyen daya no obe ifa hifahita ojio, "Hotobiaŋa iyye edaya.'' ⁸ Ati ojio iyyau atta eyari mai nohonyie tara hifahita atta eyyani ta hanaŋ daya. No obe hifahi, no oye iyyau ⁹ Ifa beren, awuar ifa nayya holobe hifahi, ati ifa awoŋ hifahi, atta iyyau wuaran, ajo nayya aye. ¹⁰ Hifahi nafa eyyik hiyyo hijo eyyani iso wuaran, oyite enyiak eyyani ye ta hanaŋ. ¹¹ Eyari iyyau nayya, atta hinyieb nayya. To hifahita, atta attohe nayya. ¹² Ati odua hifahi, ojio hidofe olibo, obis ojio hidofe owuon na anyar. ¹³ Atta sihin nafa olibo hira ye ta hanaŋ, Hotobiaŋa ida ara ania. Horemik iso hidofe hifahi no olibo heyyani ta hanaŋ ye? Obe nobo! Egiamari iyyau libe heyyanini ta hanaŋ ŋoto no ye. Iyyania, egonyu iyyohoi run ne iyyau. Egiamari hifahita inno olibo inno Hollum heturuori igem no Hollum. ¹⁴ Obe nobo hipali to hifahi, egiama hirro inno Hollum ojio hidofe olibo. Nayya lia awuon iko hipali, adule naŋ hira atuŋani le epito te iyyau. ¹⁵ Nyo hirro inne egiama nayya, abe nayya ehum hiyyen. Abe naŋ egiem hirro inna awak nayya higem, ¹⁶ Ojio hirro inna aliwari nayya, egiama nayya isia. Ojio le egiem nayya hirro inna abe nayya awak, eruk nayya daŋ hijo olibo hifahita. ¹⁷ Ati iyyania, obe ara nayya lia enyiak higiama, ati iyyau na amanya ta hanaŋ. ¹⁸ Ayyen nayya hijo obe nobo sihin no olibo na amanya ta hanaŋ, owuon wahan hegiamari hirro inno olibo ta hanaŋ, ati abe naŋ aremik higem isia. ¹⁹ Awak nayya higem sihin no olibo, ati abe naŋ egiem. ²⁰ Abe nayya awak higem nobo sihin no orru, ati arrumu nayya wan nanaŋ egiama inyia, ati iyyau na amanya ta hanaŋ. ²¹ Arrumu nayya nobo sihin ne egiama ta hanaŋ na awak higiama no olibo, ati odule orrute wuana ta hanaŋ. ²² Etidara nayya to hifahita inno Hollum to tuŋani lo owuon ta hanaŋ. ²³ Ati egonyu nayya innak hirro inne egiama ta wan hanaŋ. Etiŋalafa luŋa imohiti hunna ŋejuho to hoo hanaŋ. Odule hiniefita nayya te imohiti inne iyyau nia owuon ta wan hanaŋ. ²⁴ Nayya tuŋani le epala! ŋai iso oremik etuluahu nayya to wan inna oye? ²⁵ Ati humo hidofe binno to Hollum to Yesu Kristo Habu lohoi! Nayya ta wan egiama to hifahi no Hollum iko to higigilo nanaŋ daŋ. Ati la ara ta wahan no wan nanaŋ, atta nayya higiama to wahan ne iyyau.