¹ Anu efu iso iyyohoi hijo? Hedule iso iyyoho te iyyau hijo anyar odule hamehini? ² Hotobiaŋa hido ara ania. Iyyohoi illafa eye te iyyau, No nyo edule iyyohoi wuana dia? ³ Holobe itai eyyen hijo iyya ebatisohiniifa hiyyo arria to Yesu Kristo, ebatisohini hidofe isia daŋ to ye nohonyie? ⁴ Enuhahini ifa iyyohoi daŋ he inyia to batisimo to ye nohonyie. Eba hirro inia dede hijo iyya nafa ebuhuni Kristo tara hayok to lohuo no Monye, anyar hidofe elot iyyohoi ta manya ŋejuk. ⁵ Le ettubahini iyyohoi he inyia to rijori iko to ye nohonyie, ettuba iso iyyohoi he inyia to hebuhu nohonyie. ⁶ Eyyen iyyohoi hijo, esihohini ifa tuŋani maruani lohoi he inyia, hijo anyar orrun wan no iyyau. Edoŋ hirro inia hijo hotobiaŋa iyyohoi epito te iyyau. ⁷ Tuŋani lafa oye, etibisahini inyia haliboni to hiram ne iyyau. ⁸ Ati la aye iyyohoi iko Kristo, eruk iyyohoi hijo efu iso hidofe iyyohoi manya daŋ he inyia. ⁹ Eyyen hidofe iyyohoi hijo ebuhu ifa Kristo tara hayok, enyie inyia halara ahayoni. Enyie ye heleniefita inyia. ¹⁰ Ta nafa oyeri inyia, oye ifa inyia inyiahi nobotie hawurori golon no hiyyau. Ati iyyania amanya inyia, amanya inyia to lohuo no Hollum. ¹¹ To hikoi nia, anyar hidofe emanya itai ta wati innahatai hayok te iyyau, ejio itai era hawuarak to Hollum to Yesu Kristo. ¹² Hotobiaŋa iyyau eniefita wan nohoi hijo anyar egiama iyye iwahiti innohonyie. ¹³ Baŋa esio nobo wan nohoi hatara hepitoni te iyyau, hotobiaŋa ara igemi ne irruti no hirro inne ebwot. Ati isiara masik inno wan nohoi to Hollum hatara igemita inne egiamari te igem no obis. ¹⁴ Hotobiaŋa iyye ebusak iyyau hatara ettok to wan nohoi. Obe iyye ewuon to golon no hifahita, ati ewuon iyye to hamehini. ¹⁵ Nyo ati? Edule iso iyyohoi te iyyau to biaŋan nohoi wuana to hifahita, ati to hamehini? ¹⁶ Hotobiaŋa ara ania. Obe itai eyyen hijo era itai piti to hirro inne ewak itai, tuŋani le ebaŋ itai? Eremik iyye hira pit te iyyau, ne eyyani ye, kuyya hidofe eremik iyye anyimu baŋi Hollum, ne eyyani manya no obis iko Hollum. ¹⁷ Ati humo to Hollum! Nafa beren era ifa itai piti ille iyyau, ati iyyania, ebaŋ itai ta tajia innahatai daŋ hitiyana inna nafa esio iyyohoi ta hatai. ¹⁸ Iyyania, ahehini itai bolioŋ tara iyyau, atta itai hira hegiamak illo hirro inno obis inno Hollum. ¹⁹ Ero nayya iyya tuŋani to run no wati innahatai. Iyya nafa esiarari itai wati innahatai apiti to hirro inne ebwot iko inno orru, te ikoi nia iyyania, isiara wati innahatai piti te ibisiti inno olibo. ²⁰ Nafa hera itai piti ille iyyau, ewuon ifa itai bolioŋ tara hirro inno obis inno Hollum. ²¹ Hara ifa libe nohosie nyo? Ewuon itai iyyania he irri to hirro innafa egiama itai, innafa ecuŋ to ye. ²² Ati iyyania awuana itai bolioŋ tara iyyau atta itai hira piti to Hollum, egiama itai iyyania hirro inia inne eyari itai to hirro inno olibo atta eyyani manya no osio fur. ²³ Ara idumuti inne iyyau ye, ati ara hisiori no Hollum manya no osio fur, to Yesu Kristo Habu lohoi.