¹ Iyya ebis iyyohoi to huruk, ewuon iyyohoi iko himwara iko Hollum ta Habu lohoi Yesu Kristo. ² Te inyia errumu iyyohoi huruk to hamehini inna ne ewuetari iyyohoi. Emuno iyyohoi to golon ne esiara Hollum te iyyohoi to mwoi, golon ne efu iyyohoi hihor to lohuo no Hollum. ³ Obe ara inna hame, ati emuno iyyohoi to hitigiemita innohoi. ⁴ Eyyem iyyohoi hijo eyyani hitigiama dihan. Ojio dihan eyyani, ojio dihan eyyani golon no mwoi. ⁵ Obe hiyyen no mwoi etiŋarijok, nyo ejuhohini ifa mune no Hollum ta tajia innohoi to Oyiri lo Olibo, lafa esio iyyohoi. ⁶ Nafa he elik iyyohoi, oye ifa Kristo to hiyyo illo obe ara heruhok to Hollum. ⁷ Ati obe ifa lobo tuŋani eruk ye to hiyyo. Inyia tuŋani lo oremik ye to tuŋani lo olibo. ⁸ Ati etuhutek Hollum mune nohonyie te iyyohoi, hera iyyohoi heyyak, oye Kristo te iyyohoi. ⁹ Ati binno iyyania, ebis iyyohoi to hoto nohonyie, etilohini iso iyyohoi te inyia tara jore no Hollum ¹⁰ Man helara iyyohoi miorok, atta iyyohoi emwarahini to Hollum to ye no Lonyi honyie, ta halu ho himwara nohoi to honyie, nafa etilohini iyyoho to manya nohonyie. ¹¹ Obe ara te inna hame, ati emuno iyyohoi to Hollum ta Habu lohoi Yesu Kristo, te inyia efwotu iyyohoi himwara nohoi. ¹² Iyyania, to tuŋani lobotie, ojiŋu hiyyau ta fau, ojio to hikoi nia, ojiŋu ye afau to hiyyata. Atta ye esarik to hiyyo daŋ, nyo eyyau hiyyo daŋ ta fau. ¹³ Man ottuni hifahita, owuon ifa iyyau ta fau, ati obe nobo ŋoto no hiyyau holobe hifahita. ¹⁴ Odule ifa ye hikumo man ta Adam man to Musa, man to hiyyo illo obe eyyau iyya Adam, la ara iyya inyia lafa ottu. ¹⁵ Ati obe hisiori ara iyya hipali. La ara to hiyyau to tuŋani lobotie nia oyeri hiyyo arria, attati hamehini no Hollum iko hisiori to hamehini no tuŋani lobotie, Yesu Kristo, esio to hiyyo arria. ¹⁶ Obe hisiori ara iyya hirro inno tuŋani le eyyau. Ojio to hikoi nobo, atta ŋoto no ye awoŋ to hiyyau no tuŋani lobotie. Ati to nobo hikoi, hisiori ne eyyani bisan ta halu no heyyau no hiyyo arria. ¹⁷ La ara to hiyyau nobotie, ottu ye to tuŋani lobotie, obore iso hiyyo ille efwotu hamehini nettok iko hisiori no bisan ne eniefita manya no Yesu Kristo. ¹⁸ Iyyania, iyya to hipali nobotie orrumu hiyyo ye, ara iso hidofe ania to libe no tuŋani lobotie, ottu hitibisa no manya to hiyyo daŋ. ¹⁹ Iyya to hipali no tuŋani lobotie, atta hiyyo arria hira heyyak, to huruk no tuŋani lobotie, atta hiyyo arria arrumu bisan te inyia. ²⁰ Ati ottu hifahita iko hiyyau, hijo anyar egiama hipali, ati ta mai ne egiamari iyyau, odule iso hidofe hamehini no obolo. ²¹ Eba hirro inia, hijo iyya eniefita ye iyyau, eniefita hidofe iso hamehini to bisan to manya no osio fur ta Habu lohoi Yesu Kristo.