¹ Atti nyo ilibiti owon ho Yudea? Ojio ara libe no goto nyo? ² Agalik ina to ikotin daŋ. To hitieri, eruk ifa isia to hitilieta tara Hollum. ³ Ojio ŋa lobe ifa illak illo Yudea owuon ho hiruk? Oremik biaŋan no huruk no hosie ehumak heruhok ilo Hollum hoto biaŋa eruk? ⁴ To biaŋan no hikoi, isiara Hollum hoto rumehini dede hara era hido ho telerok. Iyya nafa egiorori inyia, ''Anyar oremik iyye etituhutek ibisiti inno hirorita inohoi, ojio hidofe oremik golon awoŋ iyye amai ho oŋotori.'' ⁵ Atti ojio iso biaŋan no ibisiti innohoi etuhutek bisan no Hollum, egiem iso iyyohoi nyo? Obe Hollum ara lo oru, iyye lia hitidia jore, ara inyia? Ero nayya iyya to higigilita inno hiyyo. ⁶ Hoto biaŋa inyia. Ati oŋot iso Hollum fau jai? ⁷ Ati iyya ojio dede no Holum to iteleriti inne naŋ ibusak to ohuo nohonyie, nyo oŋot inyia nayya eyyani? ⁸ Nyo obe inya ojio, iyya etelerik iyyohoi ŋelimak hijio, iyya to hirro innafa eijo iyyohoi ''Hegiamai irruti, anyar afanu bahati ilibiti?'' Olibo ŋoto nohosie. ⁹ Nyo ati? ebusak iyyohoi wati inno hoi? Obe luŋa. Ati etisiahak iyyohoi daŋ to Yudea iko Grik, to hosie daŋ, to wuana no hosie ho hiyyata, ¹⁰ iyya nafa egiorori inyia, obe lobo lobotie lo obis. ¹⁰ Iyya nafa egiorori inyia, obe lobo lobotie lo obis. ¹¹ Obe lobo le etiiru. Obe lobo le ejufuta halu no Hollum. ¹² Oyyitoi isia daŋ ade, atta isia daŋ ŋahariai obe lobo le egiem ilibiti, obe, obe luŋa oso ariai agalik lo botie. ¹³ Atta hidofe ogoloho inno hosie ŋa iyya ilumioho. Innafa enyieb ŋadiafa innohosie. ¹⁴ Ojio hiyyeri no munu owuon to ogieri inno hutuhe inno hosie. Ojio hutuhe inno hosie efut ho ittoriti ojio hitidiehita. ¹⁵ Ojio hejek innohosie olot kwak-kwak ejuhori hoto ade. ¹⁶ Hitiharita iko hitabanita wuana te ikotin inno hosie. ¹⁷ Obe isia oyyen hikoi no wuaran. ¹⁸ Obe nobo baŋi no Hollum to honyiehite innohosie.'' ¹⁹ Iyyania eyyen iyyohoi hijio ojio hitimanyita nyo, ero inyia to liyya owuon ho hitimanyita, to hitieri hijio, anyar mahu esionohini hutuhe innohosie. Ojie Hollum atta hitiraŋ hirorita innohosie bi daŋ. ²⁰ Ara inna iyya lobe lobe wan ne etuhutek to higiemita inno hifahita inno egonyu inyia. To hifahita afanu ofioroho inno hiyyatta. ²¹ Ati iyyania to biaŋan no hifahita inno obis eyyen ifa iyyohoi Hollum, inne loyyen hifahita ojio hekilak. ²² Iyyania, to bissan no Hollum to hiruk to Yesu Kristo to hiyyo ilafa daŋ eruk. Ojio nobo higigiala obe. ²³ Ette isia daŋ ŋeyau ojio afanu ilo osuk to Kwatan no Hollum, ²⁴ to hahehini to hamehini ania to hitiluaha inno owuon to Yesu Kristo. ²⁵ Esio Hollum Yesu Kristo anyar ara hetilahani to hiruk no hoto no honyie; esio inyia Yesu iyya hetihutani lo bisan no honyie iko to ŋeno no honyie to hiyyata innafa to hitilik no honyie taji. ²⁶ Eduoŋ inia daŋ to hitiyaha no bissan no honyie to no ena, to honyie anyar etuhutek wan no honyie to bisan, ojio hidofe etuhutek hijio inyia to wan to no honyie ara hetilahani to hatai daŋ iyya to hirruk no Yesu. ²⁷ Aji ifa owuon hitidara? Obe ofonihini. Ta masik innari? To egiamari? Obe, Ati ta masik inno hiruk. ²⁸ Atta iyyohoi eticuŋik teyya hijio etuhutek tuŋani to huruk ojio obe ara to egiem no hifatihita. ²⁹ Ati hara Hollum Hollum loYudea hamai? Ojio hidofe inyia obe ara Hollum lo GJntails? Dede, lo Jentails hidofe. ³⁰ Ara Hollum dede lobotie, anyar etuhutek inyia goto to hiruk, ojio ile obe ogoto iko hiruk. ³¹ Efuhai iso iyyohoi bisan to hiruk? Obe iso inyia oremik, iyya ettoŋita iyyohoi hitimanyita.