¹ Iyyania iyyohoi hullo era firiwajak anyar edi iyyohoi hitigiemita inno hiyyo ille elik, Hotobiaŋa iyyohoi egigilo to wati innohoi agalik. ² Hetiluak illak hegiamai hirro inno obis, anyar etidiet isia ahide nobotie. ³ Obe ifa Kristo etumuno wan no honyie. Ati ara iyya nyia nafa egiorohini, "Imoriti inno liyya inne illafa omoro itai, ohuyek ta hanaŋ.'' ⁴ Innafa egiorohini beren, egiorohini te iyyohoi, hijo anyar ewoun iyyohoi iko dihan, to hisiŋa ne errumu iyyohoi to hiram nohonyie. ⁵ Isiara Hollum lo hitila iko hisiŋa hesiara ta hatai higigilo nobotie iyya ojio hiram no Yesu Kristo. ⁶ Atta itai daŋ nobotie hisio hitahuo mune iko lohuo nahatai to Hollum, Monye la Habu lohoi Yesu Kristo. ⁷ Iyyania iruho wati innahatai iyya inna eruhuni Yesu Kristo itai, to mune no Hollum. ⁸ Itiyyen hijo ottu ifa Kriso a hegiamani to Judei hetuhutahini hijo harasa Hollum bisan te itieriti innafa esio inyia to monyie hohoi, ⁹ iko to hiyyo illo olufa hesiara lohuo to Hollum to hamelehini nohonyie. Iyya egiorohini hijo, "Esio iso nayya to hoi mune to hiji ho hiyyo illo olufa ajo hidofe edolo mune to fure nohoi.'' ¹⁰ Enyiak hidofe hijo, ''Itumune itai hiyyo illo Jentail, iko hiyyo illohonyie.'' ¹¹ Atta itai hinyiak hijo, "Itihabue Habu, itai daŋ hiyyo illo Jentail; isiara hiyyo daŋ hetahuo inyia.'' ¹² Enyiak isaiya hijo "Owuon iso hadde illo Yesu, ojo inija lie odioto iso eleitok la hatamonok. Do honyi owuon iso hatamonok to golon do honyi." ¹³ Iyyania, isiara Hollum lo hiyyen hetufutak itai ho mune daŋ iko himwara to huruk nahatai, anyar edule itai to hiyyen, to golon no Loyiri lo Olibo. ¹⁴ Ayyen nayya ta wan nanaŋ, halasira iko inasria hanaŋ, hijo efut itai ho libe. Eyyen itai hirro inia, itiyanai wati innahatai to hirro inia. Ehum hidofe nayya daŋ hiŋere egiorohini ta hatai hijo anyar esiŋ itai wati innahatai. ¹⁵ Ati egiorok nayya ta hatai to golon te innak hirro hijo anyar etigilu nayya itai, to hisiori nafa esio Hollum ta hanaŋ. ¹⁶ Awak ifa Hollum hijo anyar ara nayya hegiamani lo Yesu Kristo le efahahini to hiyyo illo Jentail, anyar esio nayya sayye inno Hollum iyya fadiri. Anyar egiama nayya inna hatara ahisiori ne eruk inyia, ne esio Loyiri lo Olibo. ¹⁷ Owuon mune nanaŋ to Kristo iko to hirro inno Hollum. ¹⁸ Abe nayya awak hiro te innak hirro binno, ati ero iso nayya to hirro inne egiemini ta nayya hijo anyar obe hiyyo illo Jentail omiasa. Isia hirro inne egiemini to hiro iko te igem, ¹⁹ Ojio to golon no hituhutita iko iduariti, ojo to golon no Oyiri lo Olibo. Ara inna ania, hijo anyar eyari hiyyo illo Yerusalem, man Ilirikam, sayye inno Kristo. ²⁰ Awak ifa nayya hiro sayye inno Yesu, ati obe ara ta mai ne etiruni hiyyo Kristo to fure hame, hijo hotobiaŋa nayya aduho to hitieri no lobo tuŋani. ²¹ Iyya egioro hijo: "Egonyu iso hiyyo illafa holobe elimahini to hosie, ojio illafa holobe etiru inyia oyyen.'' ²² Awak ifa nayya hiba ta hatai inyiahita arria, ati obe ifa hikoi ta hanaŋ hawoŋ ta hatai. ²³ Ati iyyania, enyie nayya halawuon iko nobo mai to doŋiok niyya, ajo nayya awak awoŋ ta hatai ta ŋasi innafa ho beren. ²⁴ Le eno nayya Spain, awak nayya hiwolo itai dia, ajo hidofe awak anyar efahak itai nayya, la attohu daŋ loton he itai. ²⁵ Ati iyyania, ahu nayya a Yerusalem hegiamari to heruhok dia. ²⁶ Olibo binno ta Masedonia iko Aciaya hesiarari iluahiti innohosie to lociaŋak inno owuon to hiji heruhok inno Yerusalem. ²⁷ Dede, ara ifa mune nohosie, iko to hiyyo illa awak tara hosie iluahiti. Lo ottubai hiyyo illo Jentail te iluahiti inno oyirihien innohosie, isiara hidofe isia hototubahini to hirro inno oremik hiluak wati innohosie. ²⁸ Le esahak nayya igem inna ojo hidofe ayyen hijo efwotu isia iluahiti innafa ettuttubak hiyyo, atta nayya iso eno Spain hefonyari itai to hiko inna. ²⁹ Ayyen nayya hijo la awoŋ nayya ta hatai, eyyani iso naŋ ta hatai mune iko jaha no Kristo. ³⁰ Iyane efia nayya itai, halasirak ta habu lohoi Yesu Kristo, ojo to mune to no Oyiri, hijo anyar edule itai ika naŋ nobotie to mojo no Hollum ta nayya. ³¹ Itimoje hijo anyar etuluahini nayya tara hiyyo illo omiasa hiram no Yesu to Yudea, anyar eruk hiyyo igem nanaŋ to heruhok niyya to Yerusalem. ³² Itimoje hijo anyar attu nayya to mune iko ta wahan no Hollum, anyar arrumu hidofe nayya ika tai daŋ yiri. ³³ Isiara Hollum lo himwara hotowuana daŋ hatai bi daŋ. Amen.