¹ Ifwotu tuŋani lobe huruk nohonyie ogol, ibaŋa etirisa iko isia to hiram ne epal iko no obis. ² Owuon lobo le egigilo hijo aremik inyie daha sihin no oliew, ojio lobo heruhoni atta hijo, adaha jiacio hame. ³ Isiara tuŋani la adaha hirro daŋ hotobiaŋa inyia omiana tuŋani lo obe adaha isia daŋ; isiara hidofe tuŋani lo obe adaha hirro daŋ hotoŋot tuŋani la adaha hirro bi daŋ. Eruk Hollum inyia. ⁴ Iyye ŋai, iyye le eŋot hegiamani ho lobo tuŋani? Owueta iso inyia te ettok lohonyie lo oremik hiŋot inyia. Oremik iso Habu etiwetik inyia. ⁵ To hikoi nia, egigilo illak hijo olibo far nobo agalik nobo. Ojo lobo egigilo hijo erri holoŋi inia bi daŋ. Anyar eyyen itai hijo erri holoŋitek inia daŋ nobotie. ⁶ Ilia ille etihabuo Habu ta far no olibo, ehuma isia ania hetihabuori Habu; Ilia illa adaha, adaha isia etihabuori Habu, nyo esiara inyia humo to Hollum. Tuŋani lo obe adaha, ebo hidofe inyia daha ta Habu, esiara hidofe inyia humo to Hollum. ⁷ Hotobiaŋa lobo tuŋani tara hohoi amanya to wan nohonyie hame, ojio hidofe hotobiaŋa oye ta wan nohonyie hame. ⁸ Ojio le emanya iyyohoi, emanya iso iyyohoi ta Habu, ojio la aye iyyohoi, eye iyyohoi ta Habu. ⁹ Inyia nia oyeri Kristo atta manya inyiak, hijo anyar ara inyie Habu lo hayok iko ilia illa amanya. ¹⁰ No nyo eŋotok iyye ilasi hoi? No nyo erriŋa iyye no orru te ilasi hoi? Efu iso iyyohoi daŋ wueta to hosiere ho hittoloji no Hollum. ¹¹ Nyo egioro hijo, "Iyya a manya nayya,'' ojio Hollum, "Ta hanaŋ origoŋo huŋuta daŋ ta fau, ojo ŋadiafa daŋ esio humo to Hollum.'' ¹² Efu iso iyyohoi bi daŋ etuhutek to Hollum hirro inne egem iyyohoi to Hollum. ¹³ Iyyania, hotobiaŋa iyyohoi enyiak hiŋot lobo tuŋani, ati anyar obe iyyohoi emak lobo tuŋani hotohuye te iciemiti hunna ta fau. ¹⁴ Ayyen nayya binno ta fure na Habu Yesu hijo, obe nobo sihin ne ebwot ta wan nohonyie ta daha. Ati le eruk inyia ania ta wan nohonyie hijo, orru, orru iso to honyie. ¹⁵ La ara to hiram no ŋiria nia odiahari ilasi hoi, enyie iyye helot to to mune. Baŋa etihari to hiram no ŋiria nohoi mune nafa oyeri Kristo te ilasi hoi. ¹⁶ Baŋa ebusak hirro inne emuno hijo olibo hotojo hiyyo hijo orru. ¹⁷ Obe obie no Hollum ara ŋiria iko mata hame, ati ara ibisiti inno Hollum, himwara, ojio mune to Loyiri lo Olibo. ¹⁸ Le egiama iyye to Kristo ania, etumuno iso iyye Hollum atta illak hiyyo huruk iyye. ¹⁹ Iyyania hetisiahai hirro inno himwara iko hirro inne etidioto iyyohoi ahide daŋ nobotie. ²⁰ Ibaŋa etihar igem no Hollum to hiram no ŋiria. Olibo hirro bi daŋ, ati orru to tuŋani la adaha atta ilasi honyie hotohuye. ²¹ Obe olibo ha adahari hiriŋo, ojio hidofe ha amatari balu, iko innak hirro inno oremik hisio jore te ilasi hoi. ²² Egigilo mahu iyye hijo obenobo sihin no orru ne egiama iyye, ati ottunak tohoi hame iyye iko Hollum lohoi. Isiara jaha hotowuana to tuŋani lo obe oŋot wan nohonyie to hirro inne eruk inyia hijo olibo. ²³ Ojio le ekuyya iyye to hirro inne ebe iyye ewak daha, nyo obe obis to huruk nohoi. Ojio lo obe obis to huruk nohoi, era iyye heyyani la adaha iyye.