¹ Tojo hiyyo daŋ hatabaŋa hiyyo illo owuon to hosiere, nyo obe nobo hilohittok owuon to lobo tuŋani aracie nyia no ottu tara Hollum. Hollum onyimu hiyyo illo owuon ettaha ta hatai. ² To nia, tuŋani le edefer to okuma nia, edefer hidofe inyia to Hollum omita; ojo ilia illo omitta hirro inno okuma nia, eyyani iso isia ŋoto ta wati innohosie. ³ Hotobiaŋa ettaha etibaŋa hiyyo ille egiama na anyar, ati isiara hetibaŋa hiyyo ille egiama no orru to hiyyo. Hewak itai manya obe hitibaŋa ne ettaha ta hatai? Igiamai hirro inno obis, ojio iso isia atta bai itai. ⁴ Ara ettaha hegiamak illo Hollum, illafa onyimuni to libe nahatai. Ojio le egiama itai no orru, dede anyar ati ebaŋ itai, owuon isia iko golon ha abahari itai. Ara isia hegiamak illo Hollum, illafa efahu inyia ha abahari hiyyo ille ehuma no orru. ⁵ Anyar ebaŋ itai isia, obe ara hijo hotobiaŋa isia abaha itai, ati to higigilo no olibo. ⁶ Nyo to nia inyia nia edumari itai musuru. Nyo ara ettaha a hegiamak illo Hollum, awak hegiamak illo okuma idumuti innohosie. ⁷ Todumai to hiyyo daŋ ille eyau iyye horosi to hosie: musuru to hiyyo illa awak musuru; hidumiti to hullo hetudumak; baŋi te ilia awak baŋi. ⁸ Baŋa lewuon iko horos ho lobo tuŋani, aracie mune no wati. Ojo to lia ille lomuno onyihari honyie inyia etufutak hifahita. ⁹ Ojio hifahita hunna tomon hijo, "Baŋa ehuma hirro inno somon. Baŋa ottohe. Baŋa lahahala. Baŋa ladaya.'' Ojo lowuon nobo hifahi no Hollum, ottubahini iso to higierita hunna: " To mune onyihari hoi iyya nia emunori iyye wan nohoi." ¹⁰ Obe mune oremik hitihar onyihari ho lobo. To nia, ara mune a hitufuti no hifahita. ¹¹ Nyo to nia, eyyen iyye sa, hijo era hada sa no hoi no hacieŋuni to jio. Ati iyyania eliaha etilohini nohoi to nafa leruk iyyohoi. ¹² Eno harie ojo far atta hawoŋ aŋati. To nia hebusak oko oger igemita inne idumele, heciofok irremiti inno cialai ¹³ Hetilote no lobis, iyya to holoŋ, obe ara to hitihabuo iko hiboto; hotobiaŋa, iyyohoi edule loton to hirro inno somon, iko daya no hirro, obe ara to ŋalafa iko haini. ¹⁴ Ati anyar edule itai wuana to hosiere ho Yesu Kristo, hotobiaŋa itai egigilo hesiarari wati innahatai te iwahiti inno wan.