¹ Hidofe elimak naŋ ta hatai, halasira, ta nyalami to no Hollum, isiara wati innahatai a hisiori no lowuar, inno olibo, heruho Hollum, na lara igem nahatai. ² Hotobiaŋa itai era iyya hiyyo hullo ta fau, ati anyar eloito higigilita innahatai. Igiamai ania anyar eyyen sihin no olibo ojio hidofe obis to hosiere ho Hollum ³ Ajo nayya, to hamehini nafa esiarahini ta hanaŋ, hijo hotobiaŋa illak hiyyo to hiji hatai egigilo binno ta watik innohosie agalik illak. Ati isiara isia hegigile to hiko no obis, iyya nia esiarahini Hollum to tuŋani huruk nohonyie. ⁴ Iyya ewoun iyyohoi iko ŋacio arria to wan nobotie, ati obe iso ŋacio inia owuon he igem nobotie, ⁵ iyyohoi inne ewuon arria to wan nobotie to Kristo, ejio hidofe ewoun iko ŋacio ta wan nobotie. ⁶ Ewuon iyyohoi he hisiorita inno olufa te liboi ta nafa esiarahini hini te iyyohoi. Iyya ara hisiori no lobo hikila, egiemai iyya awak huruk no honyie. ⁷ Iyya lara hisiori no lobo lwaha, ibusak inyia hotoluahai. Iyya lowuon lobo iko hisiori no hisiŋa, isiara inyia hesiŋa. ⁸ Lara hisiori no lobo hittitto, isiara inyia hettitto; iyya lara no lobo hisiara, isiara inyia hegiemai nobotie, hegiemai to bisan; iyya lara hisiori no lobo na nyalami, isiara hegiemai to mune; ⁹ Isiara mune hotowuana obe hinyiaba. Iyyalai hirro inno orru, iniafa hirro inno olibo. ¹⁰ To hiram no mune na halasira, itimune wati innahatai, to hiram no baŋi, itibaŋ wati innahatai. ¹¹ Ta hiram ne igem, ibaŋa etibasa igem. To hiram no Loyiri ibaŋa etibasa. To hiram na Habu, igiamai to honyie. ¹² Itumune to hiyyen nahatai inyia. Itidiha to hitigiemita innahatai. Itudule mojo. ¹³ Itubwan iko heruhok hirro inna agalik ta hatai. Itirrumu nobo hikoi ne eremihini itai etuhutari himorot nahatai. ¹⁴ Itijok hiyyo illetigiama itai; tojok, hotobiaŋa itai epit. ¹⁵ Itimune iko liyya illo omuno; itiye he ilia illo oyio. ¹⁶ Ituwuana iko higigilo na hatai nobotie. Ibaŋa egigilo to ikoi no hitidara, ati iruho hiyyo illa ara assai. Ibaŋa elofere to higigilita innohoi. ¹⁷ Baŋa odumak irruti iko irruti. Igiamai hirro inno olibo to honyehite ho hiyyo daŋ. ¹⁸ Lo olibo, iyya egonyu itai, itiwuanai ho hiyyo, bidaŋ na lanyar. ¹⁹ Ibava elienyuta wati te innahatai, halasira, ibusak hikoi to jore no Hollum. Egioro hijo, "Ara hilionyo nanaŋ; aduma iso nayya,' ojio Habu." ²⁰ "Ati lo owodo mioroni lia, isiara to honyie daha. Le eboto inyia iko hure, isiara to honyie hifioŋ hatamat. Le egiem iyye ania, efurok iso iyye iluluŋi inno hima to hoo honyie.'' ²¹ Hotobiaŋa run odilok itai, ati itigalik run to libe.