¹ Ohut anjilo hitamieti ikakan nohonyie. Atta nayya egonyu haheri nafa ohuyu te idou afau. Omoju ifa haheri nya iŋanyiti inno hisieni no lowuon ahikat ahisieni no udori inna obe hicuŋi. ² Inya aŋa hisieni ne iwudo inna obe hicuŋi, ojo oyole no furo atta hirre ahide te iwudo nya inna erosi. Etiryok furo nia ottu to hotwai he iwudo holoŋ iko oyyami edumele. ³ Ottu ijufe afau tara furo nyia, esio ifa to hosie duaran inna owuon iyya iŋorit no tosi a fau. ⁴ Ojo hidofe elimak to hosie hijo ibaŋa eturu miyaŋ iko yani ojo hirro hunna esur ta fau, ati isiara heturuo hiyo ilo obe owuon iko iduanyit no Hollum to homomite hosie. ⁵ Obe ifa ojo to hosie hijo itittohe hiyyo innafa niyya ati itigiamai isia to diahai no obolo man to yafajin miet. Ara iso diahai no hosie iyya idiehit no hiito leŋor tuŋani. ⁶ To holoŋitek niyya etufa iso hiyyo ye ati obe isia orrumek, awak isia ye ati olita ye tara hosie. ⁷ Ara maa iyya kusani huna ehuhuma hafuyeri oriomori amai ho fere. To hosi hosie owuon tamuho iya yeli ojo homomite inohosie ocielu homomite inno hiyyo. ⁸ Owuon isia iko hofir iyya inno ŋoruo ojo hala inohosie owuon iya hala ino emioho. ⁹ Owuon iko bileta huna ogol bino to suhiara inohosie. Ojo hitiri no hiyo ilo hosie etir iyya hitiri no tolomirioho iko kusani ariai huna onyor oriomori. ¹⁰ Owuon ho lisara innohosie hunna owuon iko iŋoriti iyya inno tosi; owuon iko hifiriwa to lisara innohosie hunna odule riomo hiyyo man yafajin miet. ¹¹ Owuon habu lohosie, inyia anjilo te iwure inna obe owuon iko hucuŋi. Owuon iko fure no ellilloŋo Eberei hijo ara Abadon, ojo to hirori no Grik ara inyia Apolon inna ara hetiruoni. ¹² Ati iyyania esohini irruti inno hitieri, ati ihuma riŋa! Ta halu hosie, arasa irruti arik hunna ofu afanu. ¹³ Ta anjilo hitileji, ohut ikakan nohonyie, ajo naŋ atta etiru hutuk no ottu tara muwarak inno altari no yeli no esio to hosiere ho Hollum. ¹⁴ Ati ero hutuk ta anjilo hitileji lo owuon iko ikakan hijo, "To hek anjilohien ilia oŋwan ille efita to oger ha hari nia hittok no Efarate." ¹⁵ To anjilohien oŋwan, ilia ehuhuma iyyania ta saa inna, to holoŋ nyia, to yafa nyia iko to hiŋa nyia, ohehini isia hijo anyar ofu toho ŋacio no hiyyo hitihunuhi. ¹⁶ Ara oseŋer hulo ehianahini to horuwoŋitek ho kusani. Etiru naŋ hihenita inohosie. ¹⁷ Egonyu ifa naŋ husani to higigilo nanaŋ iko ilafa orrek to hosie: Owuon isia iko felehi to suhiana, huna odo, imoli na ara iya bulu ojo nobo amuniek. Ara hosi inno kusani iyya hosi inne emioho, ojo to hutuhe inohosie, otu hima, furo, iko nohon. ¹⁸ Attohori hitahinuhi no ŋacio inno hiyyo to hitigemita inia hunik: hima, to furo iko to nohon no ottu to hutuhe hosie. ¹⁹ Owuon golon no kusani to hutuhe iko to lisara innohosie--ojo lisara innohosie ara iyya munok, hidofe owuon iko hosi hunna ohonyak to hiyyo horroŋon. ²⁰ To hiyyo illak, ilia illafa ebuha iko hattohori to hitigemita niyya, obe isia eruk hipalita inno higemita innohosie, obe hidofe isia etiwet hitihabuo nohosie to miniaŋa iko rijorihien inno moru, inno yeli, inno bileta iko inno hoyyek--saŋ hunna obe oriŋa, hunna obe etira, iko hunna obe olot. ²¹ Obe isia eruk hipalita innohosie, inno toho, inno hibwana iko hirro inno somon ojo koi inno hoho.