¹ Ifa lojio Ker laŋa iduanyit hitahattarihi, owuon ifa dwai liŋ te ido saa nobotie. ² Atta nayya egonyu anjilohien hattarik illo owueta to hosiere to Hollum, ojio ikakan hattarik esiarahini to hosie. ³ Atta hidofe lobo anjilo awoŋ, lo ottoŋita tobok no yiel no lowuon iko attagoŋ, ottu wueta ta altari. Esiarahini ifa attagoŋ no lobolo to honye anyar honyie le timojori inyia hiyyo illo Hollum, illo lodwa ta altari to hosiere ho hekumoni lie lowuon ta hara. ⁴ Furo na attagoŋi ho mojo no heruhok illafa oye odioto ahide ta has inno anjilo. ⁵ Odumu anjilo lia tobok no lowuon ha attagoŋ atta hefutak hima ta altari. Teyya ebiru inyia afau man orruori, owuana himedek no hila ojio ihuhuta ne hila, hi medehita ojio okitik. ⁶ Iyyania, owuon anjilohien hattarik iko ikakan innohosie hattarik atta isia hitiara huta. ⁷ Atta anjilo hitieri hihut ikakan nohonyie, atta moruo iko hima ne eddia iko hoto. Atta ŋati hitahunihi na fau ahuye atta asuahari. Ojio hidofe yani atta asuahari, atta miyaŋ igara suaha. ⁸ Atta anjilo hitarrihi hihut ikakan nohonyie atta nobo sihin nettok no owulo iko hima ne ebirohini ta hari ne ettok. ⁹ Atta hitahunihi na hari yite iyya hoto, atta hirro inna amanya daŋ to hotwe hari ye, ojio hidofe baburi inno owuon ta hari daŋ hitihara. ¹⁰ Atta anjilo hitahunihi hihut ikakan nohonyi atta haheri no obolo binno no owulo iyya hima no ohuyu to hide. ¹¹ Odek inyia ta ŋati hitahunihi no hariak iko lotilihi. Ara fure no haheri nyia Hiyyeri, atta ŋati hitahunihi no hifioŋ hira hiyyeri atta hiyyo daŋ ye arria illa amat hifioŋ innafa odua. ¹² Atta anjilo hitaŋwani hihut ikakan nohonyie, ojio hitahunihi no holoŋ atta awurori, iko hitahunihi no yafa ojio hitahunihi no hahier. Atta hitahunihi nohosie yite imoli; atta holoŋ hitahunihi iko hitahunihi na tari owuon ania obe cialai ¹³ Atta nayya hiwolo, atta naŋ etiru lobo imuhu lafa efirita to hiji he ido, le ellilloŋo to hutuk no okuat hijo, "Orrun, orrun, orrun to hiyyo illa amanya ta fau, to ikakan hunik hunna holobe anjilohien hunik ehut.''