¹ Atta nayya egonyu lobo anjilo lo ogol ottu te ido ille etiho te itiran ojo ohilok owuon ahide honyie. Ocialari homom nohonyie iyya holoŋ ojo hejek innohonyie owuon iyya ŋadief no hima. ² Ottoŋita inyia buk ille hitiŋ la aŋa ta hani honyie. Oriek inya heju ne inyat to hari inna hittok ojo heju ne ihoroŋ to otifor na hari. ³ Okuat hillilloŋo nohonyie binno iyya emie lo owuon ta mai na alama. Ellilloŋo inyia atta hitir no okuat binno, atta hitir hattarik hiro, ⁴ Awak ida nayya egiorok, attati nayya etiru hutuk te ido no ojio, "Iŋofok hirro inne etiru iyye tara hitirita inia hattarik. Hotobiaŋa iyye egiorok isia ta fau.'' ⁵ Atta anjilo lara egonyu nayya lara owueta ta hari ne ettok iko ta fau, hitidiet hani nohonyie ne inyiet e ido. ⁶ Ettuŋo ifa inyia to tuŋani lo odule manyamak, lafa oyyeu ido iko hirro daŋ inno owuon dia, fau iko hirro inno owuon daŋ dia, ojio hari iko hirro daŋ inno owuon dia, atta anjilo hijo, "Obe iso nobo hilliŋa no holoŋ nyia. ⁷ Ati to holoŋ no ohu anjilo hitahattarihi ahutari ikakan nohonyie, atta iso hirro inne eŋofohini inno Hollum tubai, iyya nafa erarari inyia to hegiamak illohonyie, hekilak.'' ⁸ Atta hutuk ne etiru nayya te ido hinyiak hiro ta hanaŋ: "Ino, todumu waraga nyia no owuon ta hani ha anjilo lia lo owueta ta hari iko ta fau.'' ⁹ Atta nayya eno ta anjilo, helimahini inyia hesiara ta hanaŋ waraga ne ettiŋ. Atta inyia hijo ta hanaŋ, "Iyari waraga nia atta iyye hinyia inyia. Esio iso hosehe nohoi hotodiahai, ati ofifil iso to hutuk nohoi iyya hisio.'' ¹⁰ Adumu nayya waraga nettiŋ ta hani ha anjilo, atta nayya hinyia inyia. Ofifil ifa binno iyya hisio to hutuk hanaŋ, ati ta halu ho hinyia nanaŋ inyia, atta hosehe nanaŋ diahai binno. ¹¹ Attati lobo tuŋani hijo ta hanaŋ, "Todule hiro binno to hiyyo, doŋiok, hirorita iko to habuok.''