¹ Esiarahini ifa ta hanaŋ iciemit nara iyya hofito. Atta nobo hutuk hijo ta hanaŋ, "Te'tte, inno to ciem haji no Hollum iko altari iko hiyyo daŋ ille etihabwo dia. ² Ati baŋa ociem bali na haji imojit, nyo ara ifa nyia no hiyyo illo obe eruk to Hollum. Eririo iso isia to hejek innohosie mai no odua yafajin tomwana aŋwan ha arik ³ Esio iso naŋ duaran to suti illallaŋ lohorik hekiluni to holoŋitek alif nobotie hisiha arik ho tomwana ille, ojo hidofe eciefok iso isia siwali. ⁴ Ara suti lohorik illia iyya yani no hiyali iko hiwetiti inno lomo innafa owueta to hosiere ha Habu la fau. ⁵ Lewak lobo tuŋani eriafu isia, ottu iso hima to hutuhien innohosie atta hisok miorok illohosie. Ottohe iso hiyyo tuŋani lawak eriafu isia. ⁶ Owuon suti illia ho golon hesionohini ido hijo hotobiaŋa hai ottu le ekila isia. Owuon isia ho golon heloitori hifioŋ a hoto anyar etattur fau ho ŋwai lero isia. ⁷ Lesok isia igem nohosie, ottu iso ciaŋ te iwure nobe hisidi etiriomori isia. Omir ojo hidofe atta attohe isia. ⁸ Ofer iso wati innohosie to hikoi no bore gala nettok ( ne elliloŋo hijo ara Sodoma iko Masir) tamai nafa esihohini hiyyo Habu. ⁹ Afanu iso hiyo ta masik inno olufa, woyyojin, hirorita, ojo doŋiok orriŋari wati innohosie atta hibo hebusak isia te ilume holoŋitek hunik he inak. ¹⁰ Omuno iso hiyyo daŋ illa lamanyar ta fau to ye to nohosie. Acia iso isia ojo hidofe esiara hisiorita to motiarak illohosie nyo etigiama ifa suti lohorik hiyyo illa amanya ta fau. ¹¹ Ati ta halu ho holoŋitek hunik ho hiji no holoŋ, ajiŋak hiyyehita no oyiri no wuaran tara Hollum isia man owueta isia to hejek innohosie. ¹² Nia etiru ifa isia hutuk nottu te'ido no ojo to hosie, "Ifanu itai daŋ inni!" Ofu iso isia e ido to hitiran, ojo miorok illohosie orriŋa. ¹³ To saa nia, ekikiro fau binno atta ŋati hitattomoni ahuye. Atta hiyyo alif hattarik ye to okitik ojo hawuarak illohosie atta baŋi ojo hidofe esio ohuo to Hollum le ido. ¹⁴ Attuhuni run hitarrihi, itirriŋe, run hitahunihi nottu kwak. ¹⁵ Atta anjilo hitahattarihi hihut ikakan, atta hutuhien hiro te'ido no ojo, "Era obie na fau obie na Habu lohoi ojo hidofe no Kristo lohonyie. Eniefita iso inyia mak." ¹⁶ Oruboho maruak tomwana arik ille ettole to kurusi innohosie to hosiere ho Hollum to homomite innohosie afau atta hitihabuo Hollum. ¹⁷ Atta isia hijo, "Esio iyyohoi to hoi humo, Habu Hollum, hekumoni lo hirro daŋ, lafa owuon iko lowuon man iyyania, nyo eyari ifa iyye golon nohoi nettok atta iyye hitiara hikumo. ¹⁸ Eloŋojita ifa hiyyo daŋ, ati iyyania awoŋ jore nohoi. Awoŋ saa newu iyye aŋotori hayok ojo hidofe newu iyye esiarari hegiamak, hekilak, heruhok, illa abaŋ iyye, illo hittaha, iko illo hittiŋi hisiorita innohosie. Awoŋ saa to hoi hetatturori hiyyo ille etatturo fau." ¹⁹ Atta haji no Hollum te ido ŋa ojo senuk no himwara nohonyie aliew tohotwai. Awoŋ himiadaha no hila aliew, etitta hide, atta okitik hitir binno, ojo telle nettok atta hifut binno.