¹ Atta nayya egonyu ido ŋejuk iko fau inna ŋejuk, nyo olite ido maruani iko fau maruani, ojio hari ne ettok olita. ² Atta nayya hidofe egonyu doŋe no odua, Yerusalem ŋejuk, no ottu afau te ido tara Hollum, ehuhumahini iyya hoduoti ta hayamani honyie. ³ Atta nayya etiru hutuk no ottu tara hittoloji no ojio, "Ituwolo! Mai na amanyari Hollum iko hiyyo illohonyie, amanya iso inyia he isia. Ara iso isia hiyyo illohonye, ojio Hollum ta wan lohonyie owuon iso he isia, ojio hidofe ara a Hollum lohosie. ⁴ Opotu iso inyia hidenya ade to honyehite innohosie, obe iso nobo ye, kuyya hidofe, hijiriŋa, yio, kuyya hidofe diahai. Olite hirro innafa ho beren. ⁵ Ojio tuŋani le ettole to hara atta hijo, "Ituwolo! Etiŋejuk nayya hiro daŋ. Ata inya hijo, "Igiorok inna ta fau nyo osiru hirro hunna ojio hidofe ara dede." ⁶ Atta inyia hijo ta hanaŋ, "Esaha hirro hunna bidaŋ! Nayya Alfa iko Omega, hitieri iko hucuŋi. To tuŋani le ebwoto, esio iso nayya to honyie amatat tara otilik iko hifioŋ no manya no obe inya oduma. ⁷ Lia le eyyale, ara iso inyia harutani lo hiro hunna, ajio naya ara a Hollum lohonyie, ojo inya ara lonyi hanaŋ. ⁸ Ojio to hiyyo illa abaŋ, illo obe owuon iko huruk, ille ebwot, hattohok, hasomok, hadufak, hamojok ho rijorihien, iko telerok ta mai daŋ, ara iso mai nohosie to hima no owulo binno iyya no okuore. Ara nia ye hitarrihi.'' ⁹ Ta halu ho hirro hunna, ottu lobo anjilo lobotie awoŋ ta hanaŋ, atta lobo lafa lo owuon iko sahani hattarik inne efut iko iŋweti, atta inyia hijo, "Woŋ eni. Etuhutek iso nayya iyye hoduoti na ayama hiyyo, oŋoruo lonyi Ker.'' ¹⁰ Atta inyia eyari nayya ade to Loyiri to nobo doŋe ne ettok atta etuhutek nayya doŋe no odua, Yerusalem no ottu afau te ido tara Hollum. ¹¹ Owuon ifa Yerusalem iko lohuo no Hollum, ojio inya owuon lo opipiak iyya yiel no olibo, iya moru no olibo bino. ¹² Owuon ifa inya iko ohitir ne esaga iko ikatin tomon harik, iko anjilohien tomon ha arik te ikatin. Ojio te ikatin egioro fureta inno woyyojin tomon ha arik inno durre inne Isarail. ¹³ To oko idoŋi no holoŋ, owuon ifa ikatin hunik dia, ojo to oko ŋolon, owuon ifa ikatin hunik ojo oko hide , owoun ikatin hunik, ojo oko isut hoholong owun ikatin hunik. ¹⁴ Owuon ifa woyyojin tomon ha arik illo ohitiri inno doŋe ojio fureta inne efahat tomon ha arik inno lonyi Ker. ¹⁵ Ojo tuŋani lafa ero ika naya owuon hofito iciemit na ara dahab haciamari bore no gala, ikatin innohonyie,iko ohitir nohonyie. ¹⁶ Ara ifa hisagaji nohonyie iyya ilatit nohonyie. Ociama inyia bore na gala te iciemit ojo hisagaci inohonye ara hisihai tomon ho miet. Ojio hidofe hisagaji nohonyie iko ilatit nohonyie. ¹⁷ Ociem hidofe inyia ohitir nohonyie, ara ifa ibolorit nohonyie 144, le eciem tuŋani ne erri hidofe to ciama na anjilo. ¹⁸ Oduhohini ohitir nohonyie to moru inno opipiak ojio hidofe oduhohini doŋe to yiel no olibo ojo hidofe opipiak iyya miraya. ¹⁹ Etilahaman isia hitierita inno ohitir to moru inno olibo binno. Opipiak ifa morru hitieri iyya miraya no ojio hiyyo Jasfer, ojio hitarrihi ara safire, ojio hitahunihi nohonyie no owuon te ikat, ojo hitaŋwani nohonyie ara emeralda, ²⁰ ojo hitamieti nohonyie ara onis, ojo hitileji nohonyie ara karnelia, ojio hitahattarihi nohonyie ara krisolia, ojo hitahottohunihi nohonyie ara berilio, topas, krisofrase, jasin, iko ametisa. ²¹ Ara ifa ikatin inia tomon ha arik, ahalajin tomon ha arik; egiemini ifa ikatin inia daŋ tara ikat nobotie. Ara ifa ikota inno bore nagala a dahab, no onyil iyya miraya. ²² Abe ifa nayya egonyu nobo haji imojit to bore gala, nyo ara ifa Habu Hollum Lo ogol iko lonyi Ker ara ahaji imojit to hose. ²³ Obe ifa hotwai nahaŋ awak nobo holoŋ iko nobo hidie na yafa, hediari nyo edia ifa lohuo no Hollum dia. Ojio lomo nohonyie ara lonyi Ker. ²⁴ Olot iso hiyyo daŋ ta fau to cialai no bore nagala nia. Eyyani iso hakuok illo fau lohuo to honyie. Olot iso hiyyo ille etilohini to cialai nohonyie. ²⁵ Obe iso ikatin innohonyie esiono ta far, obe iso nobo harie to honyie. ²⁶ Eyyani iso isia mune iko baŋi no hiyyo to honyie, obe iso nobo sihin ne ebwot oremik ajiŋak dia. ²⁷ Obe iso hidofe lobo tuŋani le eyyau innak hirro inne eyyani irri iko hinyiebita oremik ajiŋak dia, ati hiyyo ille egioro fureta innohosie to Buk no Wuaran no lonyi Ker.