¹ Teya etuhutek anjilo naya hari no hifioŋ ino wuaran, hifioŋ ino olibo lirlir iyya miraya, to hifioŋ inia onyior isia to hittoloji no lonyi Ker, iko no Hollum. ² Tohiji ho bore nagala onyior hifioŋ inia tohiji hikoi no bore nagala to oger hahari ino lowuon yani no wuaran ne eŋarak haŋer tomon harik, odule hiŋara yafajin daŋ. Ara fara no yani nyia inne etilibori hiyyo iŋweti inno fau inna. ³ Obe iso nobo ipit. Owuon iso hittoloji no Hollum ojio no lonyi Ker to bore nagala, egiama iso hegiamak illohonyie to honyie. ⁴ Egonyu iso isia homom nohonyie ojio fure nohonyie to homoŋitek innohosi. ⁵ Obe nobo tari enyiak wuana dia, obe iso isia enyiak wahan cialai no lomo iko ho no holoŋ; nyo edia iso Habu Hollum isia ojio isia atta hitihabuo mak. ⁶ Atta anjilo hijo ta hanaŋ, "Ara hiro hunna dede ojio hidofe obis. Atta Habu, Hollum lo oyirihien lo hekilak, efahu anjilohien ilohonyie hetuhutek hegiamak ilohonyie hiro ino ofu hidoŋ kuak.'' ⁷ ''Toriŋai! Atu nayya kuak! Hotomune tuŋani la abaŋ hiro ino hekilak ino buk ina.'' ⁸ Nayya Yoani! Nayya lia etiru hirro hunna ajo hidofe egonyu isia, ifa etiru nayya ajo egonyu isia, atta nayya rigoŋi ta fau to hosiere ho hejek inno anjilo etihabuori inyia, ta anjilo lafa etuhutek nayya hirro inia. ⁹ Atta inyia hijo ta hanaŋ, "Hotobiaŋa iyye ehuma ania! Ara nayya hegiamani daŋ he iyye, iko halasira hoi, hekilak, ojio ilia illa abaŋ hiro nobuk inna. Itihabue Hollum!'' ¹⁰ Ojio inya ta hanaŋ, "Baŋa esahak hirorita inno buk ina, nyo eliaha holoŋ. ¹¹ Ibusak tuŋani le egiama hirro inno obe obis hegiamai hipalita. To tuŋani le ebwot hoo nohonye, isiara inyia hehumai hibwotita. Ojio to tuŋani lo olibo, isiara inya hegiamai hiro ino olibo. To tuŋani lo olibo, hotodule libe.'' ¹² Toriŋai! Attu nayya kuak, owuon hisorita innanaŋ ta hanaŋ inno adumari nayya hiyyo daŋ lobotie lobotie to hirro inne egiem isia. ¹³ Ara nayya alfa iko omega hosiere iko halu, ara nayya hitieri ojo hicuŋi. ¹⁴ Isiara ilia hullo ellilla hofi innohosie hotomune, nyo owuon isia holibe no oremik isia adahari tara yani iko hajiŋahini to doŋe te ikatin inno olibo. ¹⁵ Tabali owuon ŋohe, ojo hemumualak, hasomok, hattohok ojo hetihabuok ho rijorihien iko hiyyo illo omuno hirro inno teler. ¹⁶ Naya, Yesu, efahu naya anjilo lalaŋ ta hatai anyar letuhutek hiro inia ta hatai ho Kelesiaha. Ara nayya hadeti to woyyo no Davide, haheri lo opipiak ille ho taŋati motie.'' ¹⁷ Ero Loyiri iko hoduoti hijo, "Ifanu!'' Isiara tuŋani le etiru hotojo hijo, "Woŋ!'' Iyye tuŋani le ebwoto, isiara inyia hawoŋ, ojio to tuŋani la awak inyia, isiara inyia to bolioŋ hotodumu hifioŋ inno wuaran. ¹⁸ Elimak nayya ta hatai daŋ ho hiyyo ille letiru hirorita hunna lero buk inaŋ, kuya awak lobo afonik innak to hirro hunna. Ofonik iso Hollum to honyie daŋ iŋweti inne egioro to buk inna. ¹⁹ Kuya la abuanyu lobo tuŋani hirorita hunna ade to buk te inna ade, eyari iso Hollum hisiori nohonyie tara yani no wuaran ojio hidofe tara doŋe no olibo inne egioro to buk inna. ²⁰ Lero to hirro inia ojio hijo, "Dede! Attu naya kuak." Amen! Woŋ, Habu Yesu! ²¹ Isiara hamehini na Habu Yesu hotowuana daŋ ho hiyyo. Amen.