¹ Ta halu ho hiro huna, egonyu naya anjilo esuru afau te ido, lotoŋita iŋanyit ne iwudo nobe hucuŋi ojo oyita ta hani nohonyie haririk. ² Enief inyia munu nafa owuon ho beren, ara hidofe inya hetisiahani iko Sitan, atta anjilo efitak inyia ŋasi alif. ³ Ebirok anjilo inya ewure ata esionok ojo hidofe egafulok inya te iwure hijo hotobiaŋa Sitan enyak hinyaba hiyo illa fau man ottubari ŋasi alif nobotie. Ta halu ha ŋasi inne ebusahini iso inyia lobo saa kai. ⁴ Egonyu naya hitolojita iko hiyyo ille ettole dia illo owuon ho duaran haŋotori hiyyo. Egonyu naya hiyyo illo oŋuto hossi innohosie to hiruk to nohosie to Yesu, ojo hidofe to hiram no Hollum. Isia illia illafa ebo hitihabuo ciaŋ iko rijori honyie ojo hidofe obe essiho to homomitek innohosie, iko ta has hosie. Enyiak isia wuaran ojo hidofe ara ettaha iko Kristo ta ŋasi alif. ⁵ Obe iso ilak hayok ebuhu man ottubari ŋasi alif. Ara ina hebuhu hitieri. Isiara ille ebuhu ojo halibok hotomune te hebuhu hitieri. ⁶ Obe ye hitarrihi enyiak wuana ho golon. Ara iso isia fadirihien illo Hollum iko illo Kristo nyo elohittok iso isia iko inya ŋasi alif. ⁷ Lo ottubai ŋasi alif, ohoni iso Sitan to kijan to nohonyie. ⁸ Ojiŋu iso inyia enyiabari obiehien inno hiyyo bi daŋ ta fau illo owuon ta ŋacio aŋwan inno fau inne elliloŋo hijo- Gog iko Magog--hettuttubari isia harriomori. Ara hihiana no hosie iyya siŋata na haari ne ettok. ⁹ Afanu isia to missihi inno fau daŋ he kolori mai no owuanari heruhok illo Hollum ojo mai nemuno iyyohoi. Ati odou hima te'ido hetturori isia. ¹⁰ Ebirohini iso henyiabani lo hiyyo a hotwai hima no owulo binno, tamai nebirohini ciaŋ iko hekilani loteler. Orumek iso isia hitigiama ta far iko ta tari mak. ¹¹ Ta halu ho hiro inia, egonyu naya hitoloji no obolo ojo hidofe obuor, atta naya egonyu lobo ettole dia. Erruat fau he ido ade tara honyie, ati obe ifa mai nobo to hosie erruacie. ¹² Egonyu naya hayok-- ettaha iko hiyyo assai illo oweta to hosiere ho hitoloji nohonyie, atta hiŋa buuhi. Enyiak hidofe hiŋa nobo Buk no Wuaran. Oŋoto ifa hiyyo to hiro ine egioro to buhi. ¹³ Afanu hayok ade to hotwe hari. Ojo hima ata hisio hayok illafa illo owuon dia, man orumehini hayok ŋoto nohosie to hirro inafa egiama isia. ¹⁴ Ebirohini ifa ye iko hima a hotwai ho hima no odule mak. ¹⁵ Lobe fure no lobo orrumehini negioro to Buk no Wuaran, ebirohini iso inyia a hotwai hima nettok no odule.