¹ Ta halu ho hirro hunna, etiru naya hutuhien inno iluluŋ no hiyyo arria inno owuon te ido inno ojo, "Alleluya, etilohini, ohuo, illo ojo owuon ohuo, golon to Hollum. ² Obis ŋoto nohonyie ojo isia ara dede, nyo oŋot inyia isomo ne ettok nafa etihar fau te isomiti innohonyie, ati elienyu Hollum hoto no hegiamak illohonyie, nafa etiwo inya." ³ To hitarrihi nohonyie enyiak isia hijo, "Alleluya! Nyo odiote furo no hasuahari nohonyie mak. Oruboho ⁴ maruak tomwana arik ha aŋwan iko iyyeti aŋwan inno owuar ta fau atta isia hitihabuo Hollum le ettole to hara man atta isia hijo, "Amen, alleluya." ⁵ Ottu hiram to hitoloji nia nojo, "Hesiara hitihabuo to Hollum lohoi itai hegiamak illohonye daŋ, itai ille ebaŋ inya, itai hullo hittiŋi daŋ iko hullo hittaha." ⁶ Atta naya etiru nobo hutuk nettok iyya hutuk no hiyyo ariai, owuon iyya nyietta na haria, ojo hidofe iyya huttuada no hila no ojo, "Alleluya! Nyo ara Habu a Hollum lohoi, hekumoni lo hirro daŋ, nyo ara inyia heniefitani. ⁷ Hesiara mune iko hitihabuo ojo lohuo nyo eba hitihabuo nobolo binno ojo esio ohuo! to mune no hiyama no Lonyi Ker awŋ, ojo ehuhum noŋoruo honye wan nohonyie. ⁸ Eciofok hiito noŋoruo boŋo nelahaman, no opipiak ojo hidofe olibo. Etuhutek boŋo nohonyie hihumita inno obis inno hiyyo illo Hollum. ⁹ Atta anjilo hiro ta hanaŋ hijo, "Isiara lia ille elliloŋini to hidihita no Lonyi Ker hotomune. ¹⁰ Arigoŋ naya ta fau to hosiere ho hejek innohonye hetihabuori inyia. Attati inyia hijo ta hanaŋ, "Baŋa ehuma ania nyo ara naŋ pit iyya iyye iko halasira hoi hullo owuon ho hirro inne egonyu isia inno Yesu. Itihabue Hollum. Nyo ara hiyyen no Yesu iyya hekiluni no hirro inna afanu." ¹¹ Atta naya egonyu ido aŋa, ata naya hiwolo, awoŋ kusan no obuor, dia efurek ifa isia lia lowuon to horwuoŋ honyie hijo, "Ara tuŋani le ettole to horwuoŋ, heruhoni lobis. Oŋoto inyia to bisan atta hidofe hitiriomo. ¹² Owuon honyehite innohonyie iyya ŋadief no hima, ojo tamuho innohonyie obore. Egioro fure nohonyie hijo obe lobo tuŋani loyyen inyia ati oyyen inyia ta wan nohonyie hame. ¹³ Eciefita hofito nedduttohini to hoto, ara fure nohonyie Hiram no Hollum. ¹⁴ Ejufuta ifa oseŋer ille ido inyia ojo inyie owuon to horwuoŋ ho kusan no obuor, leciefita boŋo ne elahama ojo hidofe obuor nolibo. ¹⁵ Ottu demi no ofi to hutuk nohonyie no oŋotori inyia hiyyo daŋ ta fau, ottoŋita iso inyia to bilata. Eririo inyia hifioŋ inna ajalaŋi ewudo nara iyya jore nobolo no Hollum aduaran lo ogol bino. ¹⁶ Egiorohini fure nohonyie to hofito nohonyie ojo to muro nohonyie hijo, "Habu lo habuok iko haboloni lo habolok.'' ¹⁷ Egonyu naya anjilo lo owueta to holoŋ. Atta inyia hilliloŋo to hutuk no okuat to cieŋ daŋ, "Ifanu, itittubai nobotie to daha netok no Hollum. ¹⁸ Ifanu itidahai hiriŋo no wati inahatai habuok, hiri ino etaha illo oseŋer, hiri wati inno hiyyo ilo hittaha, hiri ino kusani iko hiyyo ille ettole to horwuoŋite innohosie, hiri ino wati ile efita daŋ iko illo obe efita, ojo hidofe illo obe wati innohose obolo." ¹⁹ Egonyu naya ciaŋ ojo habuok illo fau iko oseŋer ilohosie. Otubahin ifa isia oriomori iko lia le etole to kusan ho oseŋer honye. ²⁰ Eniefu ifa isia ciaŋ he iboni henyiabani nafa ehuma hituhutita to hosiere honye. Enyiaba inya to hutuhita inia hiyo ilafa omoju higierita inohonyie ojo etihabuo rijori nohonyie. Ebirori ifa isia daŋ lohorik ilo owuar a hotwai hima no odule mak ojo owulo no. ²¹ Oye ifa hiyyo arria to fere no tuŋani lia lo owuon to hide ho kusan, fere no ojiŋu to hutuk no tuŋani lowuon to horwuoŋ ho kusan. Enya cieŋ daŋ wati ino hayok illohosie.