¹ Ta halu no hirro inia, egonyu naya lobo anjilo lesuru te ido lowuon ho duaran no obolo ojo ohwuo eticiela nohonyie fau. ² Oyo inya le eyoro hijo, "Ahuye, Ahuye Babilonia, doŋe nettok. Era inya mai na amanyari meniaŋa ariai, mai na amanyari oyirihien ino ebwot. ³ Emat misihi daŋ balu no mune nohonyie somon neyyani iyyania to honyie jore no Hollum. Eyyau habuok illo fau iyyau no somon iko inya. Abarai hapociok illo fau binno to golon no hitihara nohonyie manya." ⁴ Ata naya etiru nobo hutuk notu te ido hijo, "ifanu ade tara honye, hiyo ilalaŋ, hotobiaŋa itai ewoun iko hiyata inohonyie, hotobiaŋa itai ewoun iko hitigiemita inohonye. ⁵ Nyo ofwana inyia hiyyatta innohonyie man ebariri isia te ido, atta Hollum agilu irruti innohonyie. ⁶ Itudumak to honyie hiyata inohonyie to hirro ine egiem inya; eharrik inya to kos, eharik ariai hipalita innohonye. ⁷ Etahuo inyia wan nohonye ojo inyia amanya te irruti, iyyania isiara to honyie diahai iko hitigiama no osiru to honye. Nyo egigilo inyia ta taji to nohonyie hijo naya habu, abe naya ara ihidak ati abe iso naya ayen iyiti. ⁸ To nobo holoŋ, afanu iso hitigemita innohonyie; ye, tariha, ojo hiŋa. Esok iso hima inyia, nyo ogol Habu Hollum, ojo hidofe ara haŋotoni lohonye." ⁹ Oyyo iso habuok illo fau illafa eyyau he inyia hirro inno somon atta hidofe yio te inyia legonyu isia furo no hasuahari nohonyie. ¹⁰ Oweta iso isia alamarai nyo abaŋ isia hitigiama no honye honye atta hijo, "Oru, orru Babilonia, doŋe nettok, Babilonia bore na gala no ogol! awoŋ baha nohoi ta saa nobotie." ¹¹ Oyyo hapocok illo fau ojo hidofe atariha to hiram to nohonyie, nyo enyiei lobo tuŋani le enyaŋu ipociti odule ¹² hinyaŋa yiel nohonyie, moru inno opipiak, honoron inne elahaman, silhi, iko rori daŋ inno hoyyek, hala inno tomie, baburi ojo buyya nohonyie. ¹³ Sinamoni, hitiŋwojita, attagoŋ, hiyali no hiito noŋorwo, baluo, hiyali no jati, hofwo, geme, husuŋ, kioro, kusani, piti ojo oholioho inno hiyyo. ¹⁴ Ojo iso isia hijo, esohini haŋer innafa edaya iyye attati hilahaman iko ibariti innohoi hisaha nyo obe iso isia enyiak arrumehini. ¹⁵ Oyio iso hapocok ille etinyiaŋa hirro innia atta bura inyia nyo abara isia to hirro inno doŋe nia. Oweta iso isia te iloma nyo abaŋ isia hitigiama nohonyie. ¹⁶ Ojo iso isia hijo, "Orru, orru to doŋe nettok, eciofo ifa inyia boŋojin inne imoliha inne elahaman ojo hidofe odo; ecefita ifa inyia yiel iko honoron inno opipiak ojo inno obwor. ¹⁷ Ati ta saa to nobotie otture ibariti inno hittaha. Oweta ettaha illo baburi te iloma iko hiyyo daŋ illo orrumek ibariti innohosie te igem na hari. ¹⁸ Atati isia yoo to hegonyu nohoise furo no osuahari doŋe nettok atta isia hijo, "Nari doŋe nia ne erri iyya doŋe inna?" ¹⁹ Atta isia ahuttok huron a hosi innohose ojo hidofe ewuoloŋita; oyo isia atta bura inyia ojo hidofe daŋ ero hijo, "Orru, orru to doŋe nettok, nyo orrumek hiyyo illa abara daŋ ibariti innohose to doŋe nia nyo abara inyia. Ta saa to nobotie, atta inyia ture. " ²⁰ '' Itimune te inya, Ido, itai heruhok, lefahat, ojo hekilak, nyo eyyani Hollum ŋoto to honye." ²¹ Adumu anjilo lelotir binno moru nara iyya hiriai nettok atta ebirok inyia a hotwai hari atta hijo, "Ebirohini iso Babilonia doŋe nettok to golon iyya inna, ati obe iso enyiak aliew. ²² Hidofe, obe iso herribok illo tefelleŋi, iko hedolok, hahutak, herramitak ojo hahutak he hahan, obe iso enyiak etirini ta hatai. Obe hidofe iso enyiak arrumu lobo hehuhumani lo hirro ta hatai. Obe iso nobo hitiri no tauna enyiak etirini ta hatai. ²³ Obe iso nobo lomo enyiak hidia ta hatai. Obe iso hutuhien inno hayamak iko inno hoduo inna ayama hiyyo enyiak etirini, nyo obore ifa hapocok agalihini, ojo te ibwana innohoi, enyiaba ifa iyye hiyyo daŋ. ²⁴ Nyo orrumehini hoto no heyak sayye iko inno hiyyo illo Hollum, iko hoto no hiyyo daŋ illafa ottohori daŋ ta fau."